2 SAMUEL 15

Absalom fok kulo kay mulla

1Bugol kayni, Absalom gar keke-ma-duura kepe hiɗi kulumayna, nam gar sum kuɗum dok-vasl may. 2Nam ka fok kulo graw culum culum, ka col goy vun hagata vi vun-galana, la sa ka hiɗi law jaram hiɗi sa'a, nam min tuɗ tam mulla kay deɓa ni, Absalom yum de', jobom ala, naŋ hay hoyok-ziy marige de', hay li ma san hot ditawa ala nan hay hoyok-ziyna vi Israyel ma tan nalana ni, 3Absalom hot dum ala: Lawta vaŋ ŋaa'a, ɗigere kaw. May la naŋ tuɗawa tam mulla, sa ma humaŋ mayɗi 4Absalom di'e: Wulin kayni, ma tunan kay ka kitat hay nagat tani ɗawn mi gige? Sa ma law ka jaram hiɗi sa'a lebo kita ka kalamu kaw, hinim co tanu, nan ma gut kuɗumu. 5La sa co talamu kay girif gaa vokomu, nam vum ɓalam de', bowom de', fetem yalam goy de'. 6Sum sa tuɗ tam mulla kay ka kitata kaf Absalom ka li tisiya ki kayn nala. Nala Absalom ka muɗ dik sum sa Israyella ŋolo kuɗumu.

7Hay vatta vi busata dok-fiɗita, Absalom di tam mulla: Hinan tuɗ hay Hebron kay hob vun va ma nan yum kanu vok Ma-Vatɗina. 8Kay hay li ma nan ay hay Gesur hay Siriya kayni, nan yi va kan ala: La Ma-Vatɗin hotaniyawa hay Yerusaleme ni, nan min sunumu. 9Mulla dumu: Tuɗaŋ hiɗi sle'ta. Nala Absalom fokay kulo'o, nam kalay hay Hebron.

10Absalom cuk sum sa sunna hay nagata vi Israyel kafe, kay disi ala: Hay li ma nigi hum buwna vi togolomnawa, nigi ma di ala: Absalom ka tuni mulu hay Hebron. 11Sum sa hay Yerusalem kis-ma' sa fi yita tap kuɗ Absalom, nisi tuɗis kayn misi ɦawa nala, dir va ne' kaw may kirsiɗi. 12Hay li ma Absalom ka li ɗifinna, nam gi sunda hay hoyok-ziyna vi Gilo kay gar Akitofel ma Gilona, ma vul gatta mi Davidna. Sum sa fok lawta muɗ dono ŋolo, sum sa kuɗ Absalomna vokŋa visi muɗi ŋol suwa.

David pirawa, Absalom kal kulo hay Yerusalem

13Sa kep co'o, nam ka vi labara mi David ala: Sum sa Israyella diksi muɗi minim mi Absalom. 14Nala David di tam sa sunda valam kaf sa ay hiɗi namu hay Yerusalem: Yawgi kulo'o, piraya, kay Absalom ɗawn as hin sa kuɗay iriɗi, ligi koloyo kay kala; la naɗi, nam ma co kay koloyo, nam ɗawni ma lay joo'o ŋolo, sum sa hay hoyok-ziyna nam ma calsi goy hiɗi kew-gaferaŋa kafe kaw. 15Sa sunda vi mulla di talamu: Numa ma li kuɗ va ma naŋ mulla dum dina. 16Mulla kalay goyo, sum sa vo valamna kaf tapay kuɗumu, nam hin boy sa sunumna doogo tam ziyna kay nisi ŋomomu. 17Mulla kalay goyo, sumun kaf tapay kuɗumu, nisi lak tam ziy ta cawta. 18Sa sunda valam kaf, sa Keretiyena, hiɗi sa Peletiyena kaf cap galamu; sa Gatna kaf, sumun ir kis-karkiya, sa tapay kuɗum hay Gat pana, kal vokomu.

19Mulla di tam Ittay ma Gatna ala: Naŋ kaw min tuɗay kuɗma'a kay mige? Hotaŋu, musaŋ hiɗi mulla, kay naŋ maŋ mi sa ma pulu, kay maraŋay kayn goy hay nagata vaŋ pa. 20Naŋ co tan kayn kamat de', vayɗi nan gaŋ goy kuɗan tulur tani tani, hay li ma nan kay tuwan kaw liy ma nan min tuɗ hayna nan wumɗi kayn may asɗi. Hotaŋu, hotaŋ guro-biyoŋ kuɗaŋ lay. Ma-Vatɗina li ŋaata hiɗi ɗigerta taŋu. 21Ittay hot dit tam mulla ala: Ma-Vatɗin ka iriya, mulla van ka iriya kaw. Liyn ma naŋ mulla van tuɗ hayna, nan gorvona vaŋ tuɗ kuɗaŋ lay, la kay mita la kay mus iriya kaw. 22Nala David di tam Ittay: Kalaŋis vokanu. Ittay ma Gatna kal vokomu hiɗi sumuna valam noŋ kaf, hiɗi gurosguray sa kuɗsin kaf.

23Liyn kaf muɗi mi tiyn valamu, ciriyn ka li ŋolo hay li ma sumun ka capa. Mulla ɦaw lokŋa vi Sedron kulo'o, sumun kaf ɦaw ɗiger hay hagata ta tuɗ hay fulda. 24Sadok kaw ay kuɗsiya, sum sa Levitna kaw ay hiɗi namu, nisi ka ziy timgilla vi bonota vi Ma-Vatɗina; nisi tun timgilla vi Lawn gaa'a, hay li ma sumun kaf kalay goy hay hoyok-ziyn kalla, Abiyatar kalay bugolda may. 25Mulla di tam Sadok: Hotaŋ timgilla vi Lawn kulo hay hoyok-ziyna, la nan fi slugotawa vok ir Ma-Vatɗina, nam ma hotaniya, iran ma cuk kay timgilla ma tuni hay ziyna valamna lo. 26May la nam daawa ala nan kiram ŋaa'a loɗi, nan zawni, hinim li va ma kiram ŋaana. 27Mulla hot di tam mul-ma-ɗifinna Sadok: Naŋ hum su? Hotaŋ hay hoyok-ziyn hiɗi toyta, hiɗi goora vaŋu Akimaas, hiɗi Yonatan goora vi Abiyatar, gurona vigi sa ma'na. 28Ɗuwgiya, nan ka cub hay liyn ma beɗna vi fulda, ta-ta nan ma fi labara vigiya. 29Ki kayn nala Sadok hiɗi Abiyatar hot timgilla vi Lawn hay Yerusalem, nisi lakay ɗawni may.

30David jik kulo kay hiɗiyt Olive. Hay li ma nam ka jika, nam ka tiya, yalam kusuɓiya, nam tuɗ kayni hiɗi selem gaa ɦawa'a; nisi kaf sa ay hiɗi namna yisi kusuɓiya kaw, nisi jik kulo kayni ka tiya. 31Nisi co tam David dum ala: Akitofel ka kuɗ Absalom jar sum sa fok lawtna. Nala David di'e: Ma-Vatɗina, yal ma Akitofel ɗekemna naŋ muɗum goy waa'a muɗge. 32Hay li ma David co kulo kay yam hiɗiyta, nam dab vokom gaa vok Lawna, ɗuw kayni, Husay ma Arkina co vok ir David, sligara valam goy jetiya, yalam goɓi hiɗi nagan goɓ may. 33David dumu, la naŋ tapay kuɗanu, naŋ ɗawn ma can neke. 34marya hotaŋ hay hoyok-ziyna, tuɗaŋ daŋ Absalom ala: Mulla, wulini nan muɗi mi sa ma sunda vaŋu, jew kayni nan sunum mi buŋu, may wulini nan min sunaŋ gi mi naŋu. Ki kayn nala yal ma Akitofel ɗekemna naŋ ma slugutumu, kay gutanu. 35Naŋ ma fi muliyan-sa-ɗifinna, Sadok hiɗi Abiyatar, slen ma sum sa vo vi mulla dum kafna, naŋ ma humumu, naŋ ma dum mi Sadok hiɗi Abiyatar. 36Gurona visi sa ma'na ka katsiya, Akimaas goora vi Sadok, hiɗi Yonatan goora vi Abiyatar: Slen ma nigi humumna nigi ma dum tisiya kay nisi maranta. 37Husay bana Davidna hot malam hay hoyok-ziyna. Hay na'ta Absalom kal kulo hay Yerusalem may.

Currently Selected:

2 SAMUEL 15: Massana

Highlight

Copy

Compare