2 MULIYANA 21

Manase mulla vi Yuda

2 Lml 33:1-20

1Manase tun hay mulda kayni busata valam asay doogo yam ma'. Nam ti mulda hay Yerusalem ir busat dok-vasl yam vasl. Sulum ya' Hefsiba. 2Nam li sle ma joo'o kir Ma-Vatɗina, liwista vi sum sa Ma-Vatɗin munsi vok gurona vi Israyella nam tap kuɗa'a. 3Liyn ma ɗiŋiriŋŋa ma bulum Ezekiyas hom goyna nam hot inim kulo'o lo, nam in giwin-ma-ɗifinna kulo'o mi Baal, nam kot Astarte, ki Akab mulla vi Israyel li'ays nala, nam girif gaa vok slen ma dukalawn kaf, sunumu kaw. 4Nam in giwin-ma-ɗifinna hay ziyna vi Ma-Vatɗina, Yerusalem kayni mi liyn ma Ma-Vatɗin di ala semda van ma yi hayamuna. 5Nam in giwin-ma-ɗifinna mi slen ma dukalawna kaf, kalaf hay wur-daŋŋa vi ziyna vi Ma-Vatɗina ma' kafe. 6Nam ŋal goora valam hay kuta, nam ɗuw ɗugulla hiɗi guyna kay li gul-yalda hiɗi namu, nam lak sum sa job kuɗ ŋusiyana hiɗi sa di kay slen ma voksina, nam li sle ma joon vokom suwa suwa tam Ma-Vatɗina, kay ɓulakam dikamu. 7Lawayn Astarte ma nam kotomna, nam colom kalaf hay ziyda vi Ma-Vatɗina. Kayni ti ziyda ta Ma-Vatɗina di tam David hiɗi Salomon goora valam ala: Hay ziyd zawni hay Yerusalem, ziyda ta nan vileka'a jar jafna vi Israyel kafe, kayni ti ziyda ta nan min tun semda van haya'ta.#21:7 Ɗuw hay 1 Mul 9:3. 8Nan min jigeɗ sem sa Israyella goy gine'e hiɗi nagata ta nan vula' mi sumaysita loɗi, may as li kayni hay li ma nisi li hiɗi ŋali kay ŋom slen ma nan disit kafna, hiɗi gatta ta nan ɗo' tisiya, vula' tisiya hay ɓam Musus kaw. 9May nisi min humɗi, Manase viysi goyo, kuɗ kayni nisi muɗ li joota suw jaf-sumuna sa Ma-Vatɗin vatsi voksina.

10Nala Ma-Vatɗina law tisiya hay vun sa sunda valam sa jobta ala: 11Kay Manase mulla vi Yuda li slen ma liwisna, kay nam li joo'o suw sle ma sum sa Amoriyan lum jewemna kafe, kay nam kal sumuna vi Yuda hay sulukŋa, kalam nam nala kaw hiɗi lawayn ma waana valamu, 12yo! Humgi va ma Ma-Vatɗin Lawna vi Israyel dumna: Nan min hin joota co kay Yerusalem hiɗi Yuda kafe, joo na'ta ma ŋel hum sum sa huma'na. 13Nan ma ŋra zigewn gaa kay Yerusalem ki zigew ma ŋaɓ Samariyan nala; ŋram ki ziyna vi Akab nala, nan ma tok Yerusalem goyo, ki san kor hay tasat goyo, hot kuluɓa' gaa danani nala. 14Caw vocota van ma hinna nan ma noyom goyo, nan ma vulsi goyo hay ɓam sa gawt kisina; nisi ma muɗ mi ɓuraŋŋa hiɗi va ma tina vi sa gawt kisi kafna, 15kay nisi li slen ma joo'o vok iranu, nisi ɓulakan dikanu, tun caw hay buur ma sumaysi kalay goy hay Egipte pa ta-ta vaydi.

16Sum sa may li va ma jooɗin kaw Manase ɦoksi busuwsi goy ŋolo, ta-ta nam hob hay Yerusalem goy ka' noŋ kafe, tapay hiɗi kayni kaf nam ka li suluku, nam kal jafna vi Yuda hay sulukŋa, hay li ma nam li slen ma joo'o kir Ma-Vatɗina.

17Caw lopna vi Manase ma hinina, sle ma nam lum kafna, suluk ma kal tuwam hayamna, kayni kaf ka ɗoy hay ɗerwelda vi Labar-Ma-Liyna vi muliyana vi Yuda. 18Manase miti kuɗ sumiyamu, nisi pum hay jardeŋŋa vi ziyna valamu, hay jardeŋŋa vi Uzza. Goora valamu Amon ti mulda hay baŋalamu may.

Amon mulla vi Yuda

2 Lml 33:21-25

19Amon muɗ mul kayni, busata valam asay dok-ma' yam ma', nam ti mulda ir busat ma' hay Yerusalem. Sulum ya' ala Mesullemet, goota vi Haruz ma Yotbana. 20Nam li slen ma joo'o kir Ma-Vatɗina, ki Manase bulum nala; 21nam poy hay hagata ta bulum poy haya'ta kaf, nam sun lawayn waana sa sumiyam sunsiysna, nam girif gaa vok lawayn namna kaw; 22nam noy Ma-Vatɗina Lawna vi sumiyan goyo, min tuɗ hay hagata vi Ma-Vatɗin loɗi. 23Sa sunda vi mulla Amon fok lawt kalamu, nisi cum goyo vo hay ziyna valamu. 24May sum sa hay nagatna ci sum sa ci Amonna goy kafe; sum sa hay nagatna tun goora valam Yosiyas baŋalam hay mulda.

25Caw lopna vi Amon ma hinina, slen ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Yuda. 26Nisi pum hay zulda valamu, hay jardeŋŋa vi Uzza. Goora valam Yosiyas mus baŋalam hay mulda may.

Currently Selected:

2 MULIYANA 21: Massana

Highlight

Compare

Copy