2 MULIYANA 20

Moyn vi Ezekiyas

Es 38:1-8; 2 Lml 32:24-26

1Hay na'ta kayni, moyn vi Ezekiyas, goboy cum mati. Sa ma jobta Esaya goora vi Amos co katalamu, ka dum ala: Ma-Vatɗina ka di ala: Gaŋ bolaŋ mi ziyna vaŋu, kay naŋ ka mita, naŋ ma mus iri loɗi. 2Ezekiyas muɗ iram goy kat tuw-ziyda, ka siɗaw tam Ma-Vatɗin ala: 3Hih! Ma-Vatɗina, humaŋ ma gaŋ ala nan poyay vok iraŋu hiɗi ɗigerta, hiɗi dikga ta gasita, nan li sle ma ŋaana vok iraŋu kaw! Ezekiyas tiy hiɗi zimiyn ŋolo.

4Esaya kalay goyo, hay li ma nam goboy co hay wur-daŋŋa kayni, Ma-Vatɗina ka dum yoboyna ala: 5Hotaŋu, daŋ mi Ezekiyas ma ŋolla vi sumuna van ala: Lawna vi buŋ David ka di ala: Nan hum siɗawta vaŋawa, nan wi zimiy ma jaŋ goy kiraŋŋawa. Humaŋu, nan min yeraŋ goyo, co hay buurta ɦidit ɗawni, naŋ ma jik kulo'o hay ziyna vi Ma-Vatɗina. 6Nan min cuk busat doogo yam vasl vun buura vaŋu. Nan ma butaŋ goyo, naŋu hiɗi hoyok-ziyn tani, nan min butgi goy hay ɓam mul ma Asiriyana, nan ma ŋom hoyok-ziyn tani, kuɗan nanu, kuɗ David ma sunda vanu kaw.

7Esaya di'e: Sligi vuɗna vi gu-gumna ma beɗay hambulla kepe, nisi slumu, lum vun mil-goɗoŋŋa, Ezekiyas muɗi ŋaa'a may.

8Ezekiyas di tam Esaya ala, va ma min ɗek tan ala nan ma muɗ ŋaa'a, hay buurta ɦidita kaw nan ma jik kulo hay ziyna vi Ma-Vatɗinan mi mige? 9Esaya dumu: Kayni ti ɗekka ta Ma-Vatɗin min li taŋu, kay naŋ ma wi ala nam ma hob vun va ma nam dumna: Ɗuŋus-fatta ma ter voka' kay vun-ziy ma jikŋa doogo lebo hot goy bugola' kay vun-ziy ma jikŋa doogo su? 10Kay a ɗuŋus-fatta ter voka'a kay vun-ziy ma jikŋa doogo kayni mi va ma goor ɦawa, may ŋaat kayni na' ma hot goy bugola'a kay vun-ziy ma jikŋa doogo. 11Ki kayn nala Esaya ma jobta siɗaw Ma-Vatɗina, nam hot ɗuŋus-fatta goy bugola' kay vun-ziy ma jikŋa vi Ahas doogo, hay liyn ma ɗuŋus-fatta ka jikay gaa hayamna.

Mul ma Babilonna cuk sumun kat Ezekiyas

Es 39

12Hay liy namna kayni, Berodak-Baladan, goora vi Baladan mulla vi Babilon gi ɗerwelda mi Ezekiyas, vulum sle kaw, kay nam humi labara kay moyna vi Ezekiyas. 13Ezekiyas vi rogoy nisina, liyn ma slena valam ma tek#20:13 Tek ŋolo min di ala ti gurjut ŋolo. ŋolla ka hayna nam ɗeksita, doorota hiɗi ora, aromatna hiɗi mul ma ŋaana, sle-ma-duura valamu, slen ma ka hay timgilla valam kafna: Va mara ma hin hay ziyna vi Ezekiyas hiɗi sle ma ir valam kafna ma nam ɗeksit kirsiɗi mayɗi.

14Bugolda Esaya ma jobta co kat mulla Ezekiyas, nam ka dum ala: Sumun kayni daŋ mige? Nisi may arige pa? Ezekiyas hot dita: Nisi may gine'e, hay nagata Babilon pa. 15Esaya hot di lo: Nisi wum kalaf hay ziyna vaŋ mi mige? Ezekiyel hot dit ala: Nisi wi sle ma kalaf hay ziyna van kafe. Va ma hay timgilla vanu ma nan ɗekem kirsiɗi mayɗi. 16Nala Esaya di tam Ezekiyas: Humaŋ yoboyna vi Ma-Vatɗina: 17Humaŋu liyn ka co'o: Hay liy namna ɗawni, slen ma hay ziyna vaŋu, slen ma sumiyaŋ tokomu ta-ta hay buur ma vaydina, nisi ma kalam goy hay Babilon, va mara ne' kaw ma hinɗi, din Ma-Vatɗina. 18Nisi ma yaw gurona vaŋu, gurona vaŋ sa may goy hay naŋ pana, sa naŋ vuɗsina, nisi ma lisi sa patayna, kay laksi sun hay ziyna vi mulla vi Babilon. 19Ezekiyas hot dit mi Esaya ala: Yoboyna vi Ma-Vatɗin ma naŋ dumna kayn nam ŋaa'a. Nam hot di lo ala: Sle'ta hiɗi toyta ma li'e hay buura vi irita van kaf naɗi su?

20Caw lopna vi Ezekiyas ma hinina, sle ŋulo ma nam lum kafna, nanige nam jugoɗ goloŋga ŋolda hiɗi ɦoora, nanige nam gi niyn kulo hay hoyok-ziyna, kaf kayni ka ɗoy hay ɗerwelda vi Labar-Ma-Liyna vi muliyana vi Yuda ɗisu? 21Ezekiyas miti kuɗ sumiyamu, goora valam Manase ti mulda hay baŋalamu may.

Currently Selected:

2 MULIYANA 20: Massana

Highlight

Compare

Copy