1 SAMUEL 1
1
ELI HIƊI SAMUEL
Eli, mul-ma-ɗifinna hiɗi sa ma ka kitata hay Silo
1San kepe ay hay Ramatayim-Sofim, kulo kay hiɗiyta vi Efrayim, semda valam Elkana, namu mi goora vi Yeroham, goora vi Elihu, goora vi Tohu, goora vi Suf, ma Efratana. 2Boyna valam ka ma', ta kepta ya' Anna, ta heta ya' Peninna; Peninna gurona va' ka'a, may Anna goor va' mayɗi. 3Hay busat kaf, san kayni fokay hay hoyok-ziyna valam pa, kal hay Silo kay tuɗ girif gaa vok Ma-Vatɗina vi vok-ma-duura, kay li ɗifin talamu kaw. Gurona vi Eli sa ma'na ka li lop hay liy namna, kayni si Hofni hiɗi Fineyas, nisi si muliyan-sa-ɗifinna vi Ma-Vatɗina.
4Hay buur ma Elkana ka li ɗifinna valamu, nam vul galla mi cata valam Peninna, mi guro-jufayna hiɗi guro-boyna va' kafe, 5may Anna nam vula' galla va' ŋol suw sem ma', kay Anna Ma-Vatɗin geta'a, may jufa' mina' ŋol suwa. 6Hina'ta da' vun ma galakŋa, kay muɗa' a dika' ɓulak kuɗ hin ma Ma-Vatɗin hina' getayna. 7Hay busat kaf slen ka li ki kayn nala. Hay buur kaf ma Anna tuɗ kulo hay ziyna vi Ma-Vatɗina, Peninna ka da' law ma galakŋa dok-doko. Ki kayn nala na' ka tiya, min ti fu noŋɗi. 8Jufa' Elkana ka di ta'a: Anna, nak tiy kay mige? Nak min ti fuɗi kay mige? Dikag muɗi yor ŋolo kay mige? Nan may kirag suw guro sa doogonɗi su?
9Hay Silo nisi ti'e ci'e kaw, bugol kayni Anna fok kulo'o. Mul-ma-ɗifinna Eli ka musi kay kuroŋgolla, goboy hiɗi vun-ziyna mara kepe vi Ma-Vatɗina. 10Hiɗi yorta hay dika'a, Anna siɗaw tam Ma-Vatɗina, zimiy ma kira'na ka jaŋ goyo. 11Na' yi va ka'a ka di ala: Ma-Vatɗina vi vok-ma-duura, la naŋ min cuk iraŋ kay lasta vi gorvota vaŋu, la humaŋ ka gaŋ kanu, la yaŋ may jok gorvota vaŋɗi, nan gorvota vaŋ damni la naŋ vulan goor ma jufu, nan ma vulum maŋ naŋ Ma-Vatɗina hay buura irita valam kafe, kewta-welda as jik kuɗ ɗuŋusam noŋɗi. 12Hay li ma na' ka musi ta-ta vok Ma-Vatɗina kay siɗaw ki kayn nala, Eli ka sara' vuna'a. 13Anna ka law hay dika' kalafi, ka muzuk kayn mi vuna' ɦawa, sa may huma' dela'ɗi. Eli var ala na' ka ɦoyay kay dolayna, 14nam di ta'a: ɦoyna vag ma vat lancitige? Vatag dolay ma tagŋa goyo. 15Anna hot dita: A'a, sam-ŋolla, nanu ti cata ta ka hay lasta, nan may ci vinɗi lay, ci dolay ma ɦoyaŋɗi lay; may nan ka dum mi Ma-Vatɗin kayn mi sle ma hay dikanna. 16Naŋ ma ɗuw gorvota vaŋu ki cata ɦay-ɦayta naɗi, nan ka lawa ta-ta wulini kayni kay lasta vanu hiɗi yorta vi dikanu na' suwiya. 17Eli sli ditiya di'e: Tuɗag hiɗi toyta, Lawna vi Israyel ma hum siɗawta vagu. 18Na' di'e: Hin gorvota vaŋu fi slugota vok iraŋ fige. Cat kayni kaliya. Na' ti'e, voka' muɗiya, may ki jew nala loɗi. 19Nisi fokay kulo hay graw culum culum, hay li ma nisi girif gaa vok Ma-Vatɗin girifna, nisi hotay vo hay ziyna visiya hay Rama.
Vu'da vi Samuel
Elkana bur tam cata valam Anna, Ma-Vatɗina humam gum ka'a. 20Jar busat na'ta, Anna sli haya, na' vuɗ goor kepe, na' tunum selem ala Samuel, kay na' di ala: Nan jobom kayn tam Ma-Vatɗina.
21Jufa' Elkana hiɗi sum sa hay ziyna valam kaf kalay li ɗifin ma hay busata tam Ma-Vatɗina, kay hob vun va ma nam yi kalamna kaw. 22May Anna min tu'ɗi. Na' di tam jufa'a: Hay li ma vun goor slaawa goyo, nan ma naramu, kay vulum mi Ma-Vatɗina, nam ma mus ɗawni dok-doko. 23Jufa'a Elkana di'e: Lag va ma kirag ŋaana, nak ma cuba ta-ta vunam sli tuwa. Ma-Vatɗin ma hob vun dita valamu hobge. Na' musiya, na' ka vulum miira, ta-ta vunam sli goy tuwa.
24Hay li ma vunam sla'awa goyo, na' kalay hiɗi namu. Na' yaw luway-jufayn ɦidi, sli dutta-kusta ta hiɗi futuwn kepe, hob birim-tilin kep hiɗi vinna. Na' maram hay ziyna vi Ma-Vatɗina hay Silo. Goora ka goor tuwa. 25Nisi ŋat luway-jufayna, nisi tuɗ goor tam Eli. 26Anna di tam Eli: Sam-ŋolla, humaŋu, naŋ ka iriya, nanu ti cata ta col vok iraŋ tani hay buur hena kay siɗaw Ma-Vatɗina. 27Nan siɗaw kayni kay gar goor kayni, nala Ma-Vatɗina hum siɗawta vanawa. 28Nala kaw, nan min vulum goy mi Ma-Vatɗina, buurta irita valam kaf nam vuli mi Ma-Vatɗina. Bugol kayni nisi dab voksi gaa vok Ma-Vatɗina hay liy namna.
Currently Selected:
1 SAMUEL 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001