1 PETER 3

Hum-vunda jar jufna hiɗi cata

1 Tim 2:9-15; Efes 5:22-33

1Nala kaw nigi boyna, humgi kuɗ jufaygiya, kay nisi sa may hay yoboynɗi kaw ma vi'e kuɗ poyta vi boyna visiya hay yoboyna, 2hay li ma nisi wi poyta vigiya hay peldetta hiɗi sli-yamda kulota. 3Hin ganta vigi li goy jiy tuwgiɗi, hiɗi ɗuŋus ma koti jifiynɗi, jaɓna ma hiɗi oraɗi, sligar ma wilenɗi kaw, 4May jifiyta vigiya ma li kalaf hay dikgiya, jifiyta ta ɓulakɗita hiɗi dikga ta ŋali hiɗi kiliŋi, kayni mi va ma jifiy ŋolo vok ir Lawna. 5Boyn sa peldetna sa ɓa-ɓana sa zam bam Lawna gan-tuwta visi ay ki kayni nala kaw, nisi hot yisi gaa kuɗ jufaysiya, 6Ki Sara hum kuɗ Abraham nala, na' yum ala mulanna kaw, wulini nigi muɗi si gurona va'a, la nigi li sle ma ŋaana, la nigi muɗ nari kay va noŋɗi kaw.#3:6 Ɗuw Ct 18:12.

7Nala kaw nigi jufayna, lakgi ŋali hiɗi boyna vigiya, ki doway ma to bay lopna nala, nigi ma slisi yisi kulo'o, kay nisi kaw tapay yaw vocota vi slugota vi irita hiɗi nigiya, kay va fi tel sidawta vigiɗi.

Sle ma bosiyom-tuwsin as lum jar-tuwsina

Rom 12:14-21; Mat 10:24-31

8Kay na'ta, nigi ma tap varta vigi kepe, tapgi lita vigi kep kaw, nigi ma li hobay hiɗi minda jar-tuwgiya, ligi slugota, hotgi yigi gaa kuɗ tuwgiya. 9Hotgi joot kay jootɗi, hotgi ŋulda kay ŋuldaɗi, may gigi bolda, kay nigi yiyay kay kayni, kay nigi ma fi slugota hay vocota.

10Kay na'ta la san min irita,

la nam min wi buur ma sle'ta kaw,

nam ma ŋom sinamu kay joota,

nam ma ŋom vunamu kay di yoboyn ma ɗutna kaw;

11Nam ma ja jaram goy hiɗi joota,

nam ma li ŋaata,

Nam ma gar sle'ta

jaŋ kuɗa'a kaw;

12Kay Bum-Sumuna iram ka cuki kay sa ɗigera,

Humam goy maliya kay hum siɗawta visiya kaw,

May Bum-Sumuna muɗ iram goyo

kay nisi sa li joota.#3:12 Ɗuw hay Es 8:12-13.

13La nigi ka ciwere kay li ŋaata, sa ma as kay ligi joota mi gige? 14May la nigi fi lasta kuɗ ɗigerta, sle'ta ka kigiya. Ligi nar kay sumunɗi, horgiɗi kaw. 15May nigi ma sli yam Kristu kulo'o hay dikgiya ki Bum-Sumuna vigi nala, lakgi kotiya kay hot dita tam san gigekaw ma jobgiya kay cubta-sle'ta ta ka hay dikgiya, may hiɗi zigin-zlata hiɗi narta kaw, 16hiɗi tap-wida ta ŋaata, kay mige nisi sa ŋulgiya lebo nisi sa di joo'o kay poyta vigiya hay Kristu kaw ma muɗ zulo'o. 17La kayni minda vi Lawna a nisi lasgiya hay li ma nigi li ŋaata, kayni ŋaa'a suw ma nigi li joota. 18Kay na'ta Kristu kaw miti sem kepe kay sulukŋa, nam ma ɗigera miti kay sa bay-ɗigera, kay naray tam Lawna. Nam fi mitta hay sliwna, may muɗi iriya hay Ŋusta. 19Hay Ŋusta na'ta nam kalay goyo kay kus yoboyna tam ŋusiyana sa ay hay daŋgayna, 20nisi sa ŋel gatta hay liyn ma jewna, hay li ma cubta-sle'ta vi Lawna ka ɦur voka'a, hay buur ma Nuwa ceɗ lumna, lum namna sumun cuk hayam kiɗaya, nisi glafandi ɦawa fi su'da goy jar niyna pa.#3:20 Ɗuw kayni hay Ct 7:7. 21Kayni mi ŋus baptisma ma suɗay wulini, baptisma may cuk gesna vi sliwn goyɗi, may siɗawta tam Lawna hiɗi tap-wida ta ŋaata, kuɗ dayta-kulota vi Yesu Kristu, 22nam ma kalay kulo'o hay wuralawna, ka hay gal ɓamta jufta vi Lawna, namu ma sa sunda-wuralawna sa gaŋeraŋa hiɗi sa donot kaf yisi hoti gaa kuɗumna.

Currently Selected:

1 PETER 3: Massana

Highlight

Copy

Compare