1 LABAR-MA-LIYNA 10

MULDA VI DAVID

Mitta vi Sawul

1 Sam 31

1Sum sa Filistina dur sa Israyella, sum sa Israyella mun jaŋi vok sa Filistina, nisi cuk goy gaa'a, cap mita kulo kay hiɗiyt Gilbowa. 2Sum sa Filistin heb Sawul hiɗi gurona valam goboyo, nisi ci Yonatan, Abinadab hiɗi Malkisuwa gurona vi Sawul. 3nekka vi duura zor kayni kay Sawul; sum sa gi ɓarawta irsi cuk kalamu, tuwam tun caw vun bat-bat' voksi dono ŋolo. 4Sawul di tam sa ma ziy sle-ma-duura valamna ala: Pataŋ kew-gaferaŋa vaŋ goyo, jikanu, kay sum sa bay ka-gosayn lakŋi ma co lasanɗi. Sa ma ziy sle-ma-duura valamu may minɗi, kay tuwam muɗi nar ŋolo. Nala Sawul sli kew-gaferaŋa, gi tuwam gaa vunamu. 5Hay li ma sa ma ziy sle-ma-duura valamna wi ala nam mitiya, nam gi tuwam vun kew-gaferaŋa valamu, cap mita kaw. 6Ki kayn nala Sawul hiɗi gurona valam sa ɦidina mita, sumuna valam kaf fi mitta hay na'ta. 7Sum sa Israyella sa hay lokŋa kaf wi ala sa vun duura ka muni jaŋi, nisi wi kaw ala Sawul hiɗi gurona valam kaf fi mittawa. Nala nisi hin hoyok-ziyna visiya, muni jaŋi, sum sa Filistin co'o, lak hay baŋalsiya.

8Dolay kayni, hay buurta ka'ta hay li ma sum sa Filistin co'o kay fok sligar ma tam sum sa mitin goyo, nisi fi Sawul hiɗi gurona valam sa ɦidin miti kulo kay hiɗiyt Gilbowa. 9Nisi fok sligar ma talamna goyo, nisi slum yalamu, yaw sle-ma-duura valamu kaw, kalay hiɗi namu. Bugol kayni nisi vul labara ma ŋaana namna hay nagata vi sa Filistin kaf, hay ziyna vi lawayna visi kaf, tam sumuna visi kafe kaw. 10Nisi lak sle-ma-duura vi Sawul hay ziyda vi lawayna visiya, zok-ta'aramu nisi gaɓam kulo hay Tempella vi Dagon. 11Hay li ma sum sa hay Yabes hiɗi sum sa hay Galaad kaf hum sle ma sum sa Filistin lum tam Sawul kayni, 12sum sa donon kaf yaway kulo'o, nisi sli tuw Sawul hiɗi tuw gurona valamu, nisi pi zokŋa visi gaa kuɗ gu-terebintena hay Yabes, nisi li laata ir buur siɗiya. 13Sawul fi mitta kuɗ bay-vida valamu ta nam muɗ tuwam joo'o vok Ma-Vatɗina hiɗi na'ta. Nam may li kuɗ yoboyna vi Ma-Vatɗinɗi, nam kalay job kuɗ sum sa yi sem sa mitina.#10:13 Ɗuw hay 1 Sam 28. 14Nam min job Ma-Vatɗinɗi; nala Ma-Vatɗin cum goyo, nam jok mulda goy mi David goora vi Isay.

Currently Selected:

1 LABAR-MA-LIYNA 10: Massana

Highlight

Copy

Compare