Isaías 1
1
Judá nacionpi runakuna ancha huchallikuq kasqankumanta
1 # 2 R 15.1-7; 2 Cr 26.1-23. # 2 R 15.32-38; 2 Cr 27.1-9. # 2 R 16.1-20; 2 Cr 28.1-27. # 2 R 18.1—20.21; 2 Cr 29.1—32.33. Judá nacionpi rey Uziaspa, rey Jotampa, rey Acazpa hinaspa rey Ezequiaspa munaychakusqanku punchawkunapim, Judá nación chaynataq Jerusalén llaqta imaynam kananmanta Amozpa churin Isaiasman visionpi Tayta Dios qawachirqa.
2Cielokuna uyariychik, kay pacha qampas uyariy, Tayta Diosmi kaynata nin:
Warmakunatam hatunyanankama uywarqani,
paykunam ichaqa contraypi hatarirunku.
3Toropas dueñontaqa reqsinmi,
asnopas dueñompa ruwapusqan corraltaqa reqsinmi.
Israel llaqtaymi ichaqa mana reqsikuq
hinaspa mana uyarikuq rikurirun.
4¡Ay, huchasapa runakuna
imaynaraq kankichik!
mana allin ruwaykunawan intusqa runakuna,
mana allinlla ruwaq miraykuna,
mana penqakuq churikuna.
Tayta Diosmantam karunchakurunkichik,
Israelpa Chuya Diosnintam piñarachinkichik,
hinaspam qepancharunkichik.
5¿Imanasqataq ñakarichinaytaraq munankichik?
¿Hinallaraqchu mana kasukuq kankichik?
Tukuy umaykichikpi heridayuqmi kachkankichik,
sonqoykichikpas nanay-nanaymi kachkan.
6Chaki pampaykichikmanta uma puyuknikichikkamam
mana imaykichikpas sanoqa kanchu,
aswanqa toqyasqa, punkisqa,
mana pipa hampisqan,
mana pipa watasqan,
mana pipapas aceitewan llusiykusqan
kichasqa heridakunallam kachkan.
7Nacionnikichikmi purmachkan,
llaqtaykichikkunam ninawan rupachkan,
qawasqaykichikpi hinam tarpusqaykichiktapas
qayllaykichikpi huklaw runakuna mikuchkan,
enemigoykichikkunapa purmachisqanraykum
allpaykichikpas chunnichkan.
8Uvas chakrapi chuklla hinam
Sión llaqtaqa sapallanña qeparun.
Pepino chakrapa chawpinpi hatus hinam,
enemigonpa muyurusqan llaqta hinam,
sapallanña qeparun.
9 #
Gn 19.24; Ro 9.29. Sichum Tukuy Atiyniyuq Dios
kamallatapas mana puchuykuwaptinchikqa
Sodoma, Gomorra llaqtakunamanñachá
rikchakuchwan karqa.
Diosta imaynam yupaychanamanta
10Sodoma llaqtapi kamachikuqkuna,
Diospa Chuya siminta uyariychik.
Gomorra llaqtapi runakuna,
Diosninchikpa yachachikuyninta uyariychik.
11Tayta Diosmi nin:
¿Imapaqtaq valen achkallaña animalkuna wañuchipuwasqaykichik?
Amiruniñam carnerokunapa malta torokunapa wiran kañapuwasqaykichiktapas,
carnerokunapa chivatokunapa yawarnin chaqchusqaykichiktapas millakuruniñam.
12Qamkunam hamunkichik ñoqawan tupanaykichikpaq.
Ichaqa ¿pitaq kamachisurqankichik temploypa pationta sarutyanaykichikpaq?
13Mana valeq ofrendakunataqa amaña apamuwaychikchu,
chay ofrendakunapa qosnintapas millakuruniñam.
Musoq killakunapi, samana punchawkunapi
fiestakunapaq huñunakuynikichiktapas manam munaniñachu.
Huchallikuq runakunapa fiestankunataqa amiruniñam.
14 #
Am 5.21-22. Musoq killakunapi huñunakuynikichiktapas
hatun fiestaykichikkunatapas
pasaypaqtañam cheqniruni.
Llasaq qepi hinam ñoqapaq chaykunaqa,
llumpaytañam amiruni.
15Makikichikta hoqarispa mañakamuwaptikichikpas
qamkunamantam ñawiyta asurichini.
Maynataña mañakamuwaptikichikpas
manam uyarisqaykichikchu.
Makikichikpas yawarwan qachachasqam kachkan.
16Mayllakuspa chuyanchakuychik,
mana allin ruwaynikichikta
qayllaymanta asuchiychik,
mana allin ruwaynikichikta saqeychik.
17Allinkuna ruwayta yachaychik,
ñakarichisqakunapaq allin arreglota ruwaychik,
mana tayta-mamayuqtawan viudakunata nanachikuychik, nispa.
18Tayta Diosqa nintaqmi:
Chaynaqa, tanteanakunapaqyá ñoqaman hamuychik,
cochinilla hina moradoña huchaykichik kaptinpas
ritita hinam yuraqyachisqaykichik,
carmesí hina pukay-pukayña huchaykichik kaptinpas
yuraq millwata hinam yuraqyachisqaykichik.
19Sichum kasuwaspaykichikqa
allpapa allinnin ruruntam mikunkichik.
20Mana kasuwaspaykichikmi ichaqa
guerrawan tukusqa kankichik.
Tayta Diosmi chaynata nin.
Jerusalenta Tayta Dios chuyanchananmanta
21¿Imanasqataq chuchumikayarunki
ñoqapi hapipakuq llaqta kachkaspaqa?
Ñawpaqtaqa runaykikunapas allin kawsakuqmi karqaku,
allin kaqkunallata ruwaspankum paykunaqa sumaqta kawsarqaku,
kunanqa runamasinku wañuchiqllañam rikurirunku.
22Qollqe hinam karqanki
kunanqa millakuypaq qacham rikurirunki,
vino hina munayllapaqñam karqanki
kunanqa millakuypaqñam rikurirunki.
23Kamachiqnikikunapas pasaypaq mana kasukuqkunam,
suwakunamanpas sayapakuqkunam.
Llapallankum qollqewan rantichikunku,
imapas chaskiruyllatam paykunaqa maskanku.
Mana piniyuqkunatapas manam nanachikunkuchu,
viudakunapa quejantapas manam allichankuchu.
24Chayraykum Tukuy Atiyniyuq Tayta Dios,
Israelpi munaychakuq Tayta Dios kaynata nin:
Kunanmi cheqniwaqniykunamanta cuentata mañasaq,
kunanmi enemigoykunamanta vengakusaq.
25Yapamantam atiyniywan qamkunata ñakarichisqaykichik,
qollqeta chulluchichkaq hinam qachaykichikta mayllasqaykichik,
chaynatam mana allin ruwaynikichikmanta sapaqchasqaykichik.
26Ñawpaq tiempopi hinam
jueznikikunatapas chaynallataq umachasuqnikikunatapas hatarichisaq.
Chaymi allinkuna ruwaqwan,
hinaspa Diosllapi hapipakuq llaqtawan
sutichasqa kanki.
27Sionpi yachaqkunatam
allinta ruwaspay librasaq,
lliw wanakuqkunatam
allinkunata ruwaspay librasaq.
28Mana kasukuqkunawan huchasapakunaqa ñutusqam kanqaku,
ñoqamanta karunchakuqkunaqa wañuchisqam kanqaku.
29Encina sachakuna kuyasqaykichikmantapas penqakunkichikmi,
idoloykichikkuna yupaychanaykichikpaq akllasqaykichik huertakunamantapas
uyaykichikraqmi pukayanqa.
30Rapinkuna wichirachisqa encina sacha hinam kankichik.
Manaña yakuyuq huerta hinam kankichik.
31Kallpasapa runapas qopa hinañam rikurirunqa,
ruwasqankunapas nina chispa hinañam kanqa,
manaña pipas amachaqnin kaptinmi kuskankuña ruparunqa.
Currently Selected:
Isaías 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012