Isaías 2
2
Nacionkunata Dios hawkayachinanmanta
(Miq 4.1-3)
1Diosmi qawachirqa Amospa churin Isaiasman Judá nacionpas, Jerusalenpas hamuq punchawkunapi imaynam kananmanta.
2Tukupay tiempokunapim Tayta Diospa templonpa kasqan orqo,
wakin orqokunamantapas aswan hatunraq kanqa.
Chaymanmi llapallan nacionkuna hamunqaku.
3Achka nacionkunamantam nana-nanaq runakuna hamuspanku kaynata ninqaku:
“Tayta Diospa orqonman hamuychik,
Jacobpa Diosninpa templonman hakuchik,
paymi allin kawsakuyta yachachiwasun,
munasqanman hina purinapaq”.
Sionmantam Diospa kamachikuynin lloqsimunqa,
Jerusalenmantam Diospa yachachikuynin lloqsimunqa.
4 #
Jl 3.10. Diosmi nacionkunata juzganqa,
paymi llapa llaqtakunapa cheqninakuyninkuta allichanqa.
Chaynapim espadankutapas rejakunamanña tikranqaku,
lanzankutapas rutunakunamanñam tikranqaku.
Manañam nacionpurapas wañuchinakunqakuñachu,
guerrapaqpas manañam yachachinakunqakuñachu.
5Jacobpa mirayninkuna hakuchik,
Tayta Diospa kanchayninpiña purisunchik.
Hatun tukuqkunata castigananmanta
6Diosnilláy, runaykikunatam saqerunki,
Jacobpa mirayninkunatam saqerunki.
Intipa lloqsimunan lawpi layqakunapa huntasqan kasqanrayku,
Filistea llaqta hina qatipaqkunapa huntasqan kasqanrayku,
huklaw llaqtayuq runakunawan hukllawakurusqankurayku.
7Kay nacionqa qori-qollqewan huntasqam kachkan,
llapa kapuqninkupas mana yupay atiymi.
Kay nacionqa caballokunawan huntasqam kachkan,
carretankunapas mana yupay atiymi.
8Makinkuwan ruwakusqanku idolokunapa
huntaykusqanmi allpankupas kachkan,
chaykunapa ñawpaqninpim qonqorakunku.
9Kayna penqaypim runakuna tarikun,
kayna mana allintam ruwarunku,
paykunataqa ama pampachayñachu.
10 #
Ap 6.15. Llapa runakuna,
Tayta Diospa mancharikuypaq qayllanmanta
qaqakunapi pakakamuychik,
allpamanpas pakakuq ustuychik.
Tayta Diospa hatun kanchariyninmanta pakakuychik.
11Hatun tukuq runakunapas uchuychasqam kanqaku,
hatunchakuqkunapas kumuykachisqam kanqaku.
Chay tiempopiqa Tayta Diosllañam hatunchasqa kanqa.
12Tukuy Atiyniyuq Tayta Diospa punchawninmi hamuchkan,
hatun tukuqkunata uchuychananpaq,
hatunchakuqkunata tuñichinanpaq;
13chaynatam ruwanqa Líbano orqopi cedro sachakuna hinaña,
Basán lawpi encina sachakuna hinaña kaptinkupas,
14moqokuna hina, orqokuna hina altoy-altoyña kaptinkupas,
15hatun torrekuna hinaña kaptinkupas,
qaqay-qaqay perqa hinaña kaptinkupas,
16Tarsis lawpi barcokuna hinaña kaptinkupas,
sumaq kuyayllapaq barcokuna hinaña kaptinkupas.
17Hatun tukuq runakunam uchuychasqa kanqaku,
hatunchakuq runakunam tuñichisqa kanqaku.
Chay tiempopiqa Tayta Diosllañam hatunchasqa kanqa.
18Idolokunataqa pasaypaqtam chinkachinqa.
19Runakunam Tayta Diospa mancharikuypaq qayllanmanta
machaykunapi, allpa uchkukunapi pakakunqaku.
Diospa piñakuyninmantam lluptinqaku,
Diospa chuyay-chuyay qayllanmantam ayqenqaku.
20Chay punchawpim llapa runakunaqa,
yupaychanankupaq qorimanta qollqemanta ruwakusqanku
idolonkunata wischunqaku.
Masukunapa ukuchakunapa kasqanmanmi chaykunata wischunqaku.
21Kay pachata ñakarichinanpaq Tayta Dios rikurimuptinmi
mancharikuypaq qayllanmanta runakuna pakakunqaku,
Diospa hatun kayninpa kanchariyninmantam pakakunqaku;
qaqapa raqrankunamanmi yaykunqaku,
orqopi machaykunamanmi ustunqaku.
22Mana valeq runapiqa ama hapipakuychikchu,
runapa kawsayninqa huk samay hinallam.
Currently Selected:
Isaías 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012