Zacarías 13
13
1Chay tiempopim huk pukyumanta yaku lloqsiptin, chay yakupi Davidpa mirayninkunawan Jerusalenpi yachaqkuna huchankumantawan millakuypaq mana allin ruwasqankumanta chuyanchakunqaku. 2Tayta Diosmi kaynata nin: Chay punchawpim, kay nacionmanta idolokunapa sutinta chinkachiptiy manaña yuyayllapas yuyarinqakuñachu. Profetakunatawan mana allin espiritukunatapas pasaypaqtam chinkarachisaq.
3Chaynapim pipas hinallaraq profetizaptinqa, hina tayta mamallan ninqa: “Llullakuspa Tayta Diospa sutinpi rimasqaykiraykum wañunkipuni”, nispa. Pipas profeta tukuqtaqa ¡hina tayta mamallanmi espadawan tuksirunqa! 4Chay tiempopiqa profetakunapas llullata willakusqankumantam penqakunqaku. Manañam pipas profetapa qaramanta capanwan churakuykuspaqa runamasinta engañanqañachu. 5Aswanqa sapakamam ninqaku: “Ñoqaqa manam profetachu kani, chakrapi llamkakuqllam, warmaymantapacham chakrallapi llamkani”, nispa. 6Sichum pipas tapunqa: “Chaynaqa, ¿imataq chay cuerpoykipi heridakunaqa?” nispa , hinaptinqa paymi ninqa: Amistadniykunapa wasinpim kaynaramuwanku, nispa.
Ovejakuna michiqta wañuchinankumanta
7 #
Mt 26.31; Mr 14.27. Tukuy Atiyniyuq Tayta Diosmi kaynata nin:
Espada, michiqniypa contranpi hatariy,
yanapaqniypa contranpi hoqarikuy,
michiqta wañuchiptikim llapa ovejakuna cheqenqa.
Ñoqañataqmi uñachakunapa contranpi makiyta hoqarisaq, nispa.
8Tayta Diosmi kaynata nin:
Hinaptinmi kay pachapi llapallan yachaqkunamanta
kimsa parten wañuspa chinkanqa,
huknin partellanñam hinapi puchunqa.
9Chay puchuqkunatam
qollqeta hina ninapi chulluchisaq,
qorita hinam chuyanchasaq.
Hinaptinmi paykuna qayakamuwaptinku
ñoqañataq uyariykuspay kaynata nisaq:
“Llaqtalláy” nispay,
paykunañataqmi ninqaku:
“Tayta Diosllam Diosninchikqa”, nispanku.
Currently Selected:
Zacarías 13: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
