Proverbios 5
5
Qosanta engañaq warmiwan ama wichinamanta
1Churilláy, yachachikuyniyta sumaqta uyariy,
consejasqaykunata sumaqta uyariy,
2chaynapi llutanta ama rimanaykipaq,
aswanqa yachaywan rimanaykipaq.
3Qosanta engañaq warmipa rimayninqa
mielmantapas aswan miskiraqmi,
aceitemantapas aswan llampuraqmi,
4tukupayninmi ichaqa ajenjo hina qatqe,
iskay filoyuq espadamantapas aswan kuchukuqmi.
5Chayna warmipa ñanninqa wañuymanmi apakun,
payqa wañuqkunapa kasqanmanmi pusakun
6payqa kawsay ñantapas wischupakunmi,
manam maynin purisqantapas musyakunchu,
ñanninpas paypaqqa urmachikuqmi.
7Chaynaqa, churilláy uyariwaspayá
nisqaykunamanta ama rakikuychu.
8Chayna warmimantaqa anchurikuy,
ama punkunmanpas asuykuychu,
9chaynapi mana reqsisqakunawan kallpaykitapas ama tukunaykipaq,
wataykikunatapas millay runakunawan ama usuchinaykipaq,
10yanqañataq mana reqsisqakuna kallpaykiwan saksakunmanku,
llamkasqaykipas mana reqsisqapa wasinpi tukunman.
11Chaynapiqa machuyaspaykim kallpayki pisiptin
qepa punchawkunata ñakakuwaq,
12yanqañataq ñakakuspa niwaq:
“Imapaqraq rimapayawasqankuta qepancharqani,
imapaqraq anyawasqankuta wischupakurqani,
13yachachiwaqniytapas manam kasurqanichu,
consejawasqantapas manam uyariqpas tukurqanichu,
14kunanqa llaqtamasiykunapa qayllanpim
yaqalla sasachakuyman chayaruni”, nispa.
15Yakutapas kikikipa pozoykimanta tomakuy,
pukyuykimanta lloqsiq yakuta tomakuy.
16Pukyuykipa yakuntaqa ama usuchiychu,
amataqyá callekunamanpas yanqaqa usuchiychu.
17Pozoykipa yakunqa qamllapaqyá kachun,
amayá mana reqsisqakunamanqa qoychu.
18Pukyuykiqa Diospa bendecisqanyá kachun,
joven kaspa casarakusqayki warma yanallaykiwanyá kusikuy,
19payqa ancha kuyayllapaq sumaq luwichu hinam;
kuyakuynillanwan tukuy tiempo contentakuy,
paypa kuyakuynillanpi tukuy tiempo kusikuy.
20Churilláy,
¿Imapaqtaq hukpa warminwan wichiwaq?
¿Imapaqtaq hukpa warminta abrazawaq?
21Runapa ñanninqa Tayta Diospa qayllanpim kachkan,
imayna kawsasqantapas qawachkanmi.
22Mana allin runataqa
mana allin ruwayllanmi chaqnarunqa,
kikinpa huchallanmi waska hina teqorunqa,
23mana kasukuyninmi wañurachinqa,
mana yachaywan ruwayninmi chinkarachinqa.
Currently Selected:
Proverbios 5: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012