Proverbios 25
25
Salomonpa wakin rimasqankunamanta
(25.1-29.27)
1Kaykunapas Salomonpa rimarisqan yachayniyuq rimaykunam; kaykunatam Judá nacionpa reynin Ezequiaspa serviqninkuna qellqarqaku.
2Diospa hatunchakuyninqa
imapas pakasqa kaqkuna waqaychayninmi,
reypa hatunchakuyninñataqmi
chay pakasqa kaqkunata yachaykuypi riy.
3Hanaq pachapa sayayninwan,
kay pachapa uku-uku kayninwan,
reykunapa imam tanteasqanqa
mana haypay atiymi.
4Qollqepa akasqanta siksirusqaqa
alhaja ruwaqpa makinmantam
kuyayllapaq alhaja lloqsimun.
5Reypa qayllanmanta mana allin runata qarqosqaqa
trononpas allin arreglo ruwaypim sapinchakunqa.
6Reypa qayllanpiqa ama alabakuychu,
amataq ancha reqsisqa runakunapa kasqanpipas sayaychu.
7 #
Lc 14.8-10. “Kayman qespimuy” nisuynikim aswan allinqa,
reqsisqayki kamachikuqkunapa qayllanpi
penqayman churasqa kanaykimantaqa.
8Quejamanqa amayá chayllaqa kallpaychu,
yanqañataq runamasiki penqayman churarusuptiki
mana ima ruwaytapas atiwaqchu.
9Yanqamanta tumpasuqniki runapa qayllanpiqa rimarikuyá,
hukpa willasusqaykitaqa amayá willakachakuychu;
10yanqañataqmi uyariqniki penqayman churasunkiman,
penqaypi kaynikita manaña allichay atinaykikama.
11Qollqewan adornasqa qorimanta manzana hinam
tupaqninpi sumaq rimaykunaqa.
12Qorimanta anillo hinam,
akllasqa qorimanta collar hinam,
kasukuq runata yachaywan qaqchaykuyqa.
13Rupay tiempopi ritipa chiriykuynin hinam
willakuyta apachikunapaq runaqa,
chayna runaqa kamachiqninpa sonqontam kusichin.
14Wayrapa apanan mana parayuq puyu hinam
mana imallantapas qokuykuchkaspa
“qorqanim” nispa alabakuq maqlla runaqa.
15Kamachikuqpa piñakuynintaqa
pacienciawanmi tanichina,
sumaq rimayqa rumi sonqotapas pakinmi.
16Abejapa miskinta tarispaqa
atisqallaykitayá mikuy,
yanqañataq aminaykikama mikuruspa kutirachiwaq.
17Vecinoykipa wasinmanqa amayá kutitikraychu,
yanqañataq amirususpayki cheqnipakurusunkiman.
18Runamasinpa contranpi llullakunata rimaq runaqa
martillo, espada, ñawchi puntayuq flecha hinam.
19Sasachakuy tiempo chayamuptin
iskay uya runapi hapipakuyqa
moqasqa chakiyuq puriy hinam,
otaq utu kirupa nanakuynin hinam.
20Llakisqa runata takipayayqa
vinagreta heridaman talliykuy hinam,
chiri tiempopi pachata llatanakuruy hinam.
21Enemigoyki yarqaymanta kaptinqa mikuykachiy,
yakumanta kaptinpas tomaykachiy.
22 #
Ro 12.20. Chaynata ruwaspam
uyanta penqakuymanta ruparichinki,
Tayta Diosñataqmi pagapusunki.
23Norte lawmanta hamuq wayraqa
paratam apamun,
cuento qepi runapa rimayninñataqmi
runata piñachin.
24Mana allin warmiwan
hatun wasipi yachaymantaqa
altospa kuchunpi yachaymi aswan allinqa.
25Imaynam yakunayasqapaq chiri yaku,
chaynam karumanta chayamuq allin willakuypas.
26Putka yakuyuq pukyu hinam
allin ruwaq runaqa mana allin runapa qayllanpi katkatatayninqa.
27Abejapa miskinta achkanpi mikuyqa manam allinchu,
alabasqa kayta maskaypas manam allinchu.
28Mana cercoyuq tuñisqa llaqta hinam
genionta mana sujetay atiq runaqa.
Currently Selected:
Proverbios 25: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012