Proverbios 22
22
1Qori-qollqemantapas aswan allinqa
ancha reqsisqa kaymi,
qori-qollqemantapas aswan allinqa
kuyasqa respetasqa kaymi.
2Apupas wakchapas chaynakamallam kanku
Tayta Diospa unanchasqan kasqankupim.
3Allin tanteakuq runaqa
sasachakuyta qawarispam suchurikun,
mana yachayniyuq runam ichaqa
sasachakuyman yaykuruspan ñakarin.
4Tayta Diosta uchuychakuspa kasukuyqa
apuyaytawan ancha reqsisqa kayta hinaspa kawsakuytam apamun.
5Mana allin runapa ñanninqa
kichkakunapa trampakunapa huntasqanmi tarikun,
vidanta llakipayakuq runaqa
chaykunamantam karunchakun.
6Warmataqa imaynam kawsanantayá yachachiy,
yuyaqña kaspapas chay yachasqanmantaqa
manam sapaqchakunqachu.
7Apuqa wakchakunapim munaychakun,
prestakuqñataqmi prestaqninpa criadon rikurirun.
8Mana allin kaqkunallata tarpuqqa
sasachakuyllatam cosechanqa,
Tayta Diosmi piñakuy tawnanwan tuñichinqa.
9Runamasinta llakipayaq runaqa,
wakchakunaman mikuykachisqanraykum
bendecisqa kanqa.
10Piñanakuylla maskaq runata qarqorusqaqa
piñanakuypas, cheqninakuypas,
kaminakuykunapas tukurunqam.
11Allin kawsakuq runaqa,
sumaq rimayninwanmi
reypa kuyakuyninta haypan.
12Tayta Diosmi yachaytaqa nanachikun,
llulla runapa rimasqantam ichaqa yanqacharun.
13Qella runaqa kaynatam nin:
“Hawapiqa leonmi kakuchkan
ñanpim sipiruwanman”, nispa.
14Qosan engañaq warmipa siminqa
uku-uku pozom;
Tayta Diosta piñachiq runaqa
chay pozomanmi wichiykunqa.
15Mana allinkuna ruwayqa
warmakunapa sonqonpim tarikun,
ichaqa latigowanmi corregikunqa.
16Apuyananrayku wakchata ñakarichiq runaqa,
otaq apuman qoykuq runaqa,
wakchayaypim tukunqa.
Yachayniyuqpa rimarisqankunamanta
17Yachayniyuq runapa rimasqantaqa
rinrita kicharispa sumaqta uyariy,
yachachisqaykunapiyá sumaqta yuyaymanay.
18Umaykiman churakuspa
simikiwan rimaptikiqa kusichisunkim.
19Kaykunatam kunan yachachiki
Tayta Diosman hapipakunaykipaq.
20Kimsa chunka yachachikuykunatam
qampaq qellqarqani,
chaykunaqa yachaytawan
sumaq rimaykunatam qosunki;
21chaynapi cheqap kaqta yachachisuptiki,
pipas tapusuptiki imam kaqta willakunaykipaq.
-1-
22Wakchataqa wakcha kasqanraykuyá
ama imantapas qechuychu,
mana piniyuq runatapas
amayá juezpa qayllanpiqa ñakarichiychu.
23Paykunamantaqa Tayta Diosmi nanachikun,
imallantapas qechuqtaqa Tayta Diosmi ñakarichinqa.
-2-
24Chaylla piñakuruq runawanqa
ama amistadta armaychu,
piña-piña runawanqa
ama kuskapas puriychu.
25Yanqañataq mana allin ruwayninta qatipakuspa
vidaykita sasachakuyman qaykuruwaq.
-3-
26Ama haykapipas prometekuychu
hukpa manukusqanta paganaykipaqqa.
27Mana pagayta atispaykim
puñunayki camatawanpas qechurachikuwaq.
-4-
28Tayta-mamaykipa churasqan linderokunataqa
ama haykapipas suchuchiychu.
-5-
29Pipas ruwananta allinta llamkakuqqa
reykunatam servinqa,
manam huk runataqa servinqachu.
Currently Selected:
Proverbios 22: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012