Proverbios 20
20
1Vinoqa runatam manaña penqakuqta ruwan,
aqañataqmi yanqakuna rimaqta ruwan;
macharuspaqa ima ruwasqantapas manam yuyakunchu.
2Reypa piñakuyninqa
malta leonpa qapariynin hinam,
reyta piñachiq runaqa
vidantam wañuyman qaykukuchkan.
3Runapa alabakuyninqa
piñanakuymanta asurikuymi,
mana yachayniyuqmi ichaqa
piñanakuyta hatarichin.
4Qella runaqa tarpuy tiempopipas manam tarpukunchu,
chayraykum cosecha tiempopi mañakuspapas mana tarinqachu.
5Runapa tanteasqankunaqa
lamar qocha hina uku-ukum,
yachayniyuq runam ichaqa
imaynam hayparuytapas yachan.
6Achkaqmi kuyapayakuq kasqankumanta alabakunku,
chaywanpas confiakunapaq hina runataqa
¿pitaqsi tarinman?
7Allin ruwaq runaqa allin kawsakuypim purin,
churinkunapas pay hina kawsaspankuqa ancha kusisqam kanqaku.
8Juzganan trononpi rey tiyaykuspanqa
qawariyllanwanraqmi ima mana allintapas tarirun.
9Manam pipas ninmanchu:
“Sonqoyta chuyancharusqayraykum
mana huchayuqña kani nispaqa”.
10Tayta Diosqa cheqninmi
mana cabal pesotawan suwakuq balanzataqa.
11Huk jovenpa allin kawsasqanqa
ruwayninkunapim qawachikun.
12Uyarikunapaq rinritapas,
qawakunapaq ñawitapas,
iskaynintam Tayta Dios unancharqa.
13Ama puñuyta kuyaychu, wakchayaruwaqmi,
ñawikita kicharispaqa tantawanmi saksanki.
14Rantiqqa ima rantisqantapas
“kayqa manam valenchu” ninmi,
pasaruspanñataqmi rantirusqanmanta alabakun.
15Yachaywan rimaqqa
qorimantawan alhajakunamantapas aswan valorniyuqmi.
16Mana reqsisqa runata garantizaqtaqa
pachanta qechuspa prendapaq apakuchunku.
17Runaqa anchallatañam munan engañaspa ganasqan mikuytaqa,
ichaqa siminmi aqopa huntasqan rikurirunqa.
18Allin consejowanmi
ima ruway munasqapas allinqa qespin,
allinta tantearispam
guerramanqa yaykuna.
19Cuento qepi runaqa
pakasqa kaqtapas willakachakurunmi,
cuento qepi runawanqa
ama hukllawakuychu.
20Tayta-maman ñakaq runaqa
manchakuypaq tutayaypim wañunqa.
21Qallariyninpi imapas chaylla armasqa kaqkunaqa
qepa punchawkunapim sasachakuyta apamun.
22Ama niychu:
“Vengakurusaqmi” nispaqa,
Diosllapi hapipakuy
paymi rantikipi ruwanqa.
23Tayta Diosqa millakunmi
mana cabal pesotawan
suwakuq balanzataqa.
24Runataqa Tayta Diosllam maymanpas pusan,
manam pipas yachakunchu imayna tukuruytapas.
25Mana allinta tantearispa
Tayta Diosman imatapas prometekuchkaspa
qepataña ñakakuyqa manam allinchu.
26Yachayniyuq reyqa
mana allin runakunata cheqerachispam
ruedawan ñitirachin.
27Runapa espiritunqa
Tayta Diospa mecheron hinam,
paymi runapa sonqonta kuchun-kuchun reqsin.
28Reytaqa waqaychan
cheqap kaywan kuyapayakuymi,
llakipayakuyñataqmi trononta takyachin.
29Jovenkunapa hatunchakuyninqa kallpanmi,
yuyaqkunapa hatunchakuyninñataqmi soqo chukchayuq kaynin.
30Azotepa nanayninqa mana allin runatam hampin,
castigoqa runapa sonqontam chuyanchan.
Currently Selected:
Proverbios 20: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012