Números 24
24
1Israel runakunata Tayta Dios bendeciykuy munasqanta Balaam yacharuspanmi manaña wakin kutikunapi hinaqa Diospa imam nimunanta uyariq rirqañachu, aswanqa chunniq lawman qawarispanmi, 2Israelpa mirayninkunata ayllupuralla samasqankuta rikururqa, hinaptinmi Diospa Espiritun Balaamman huntaykurqa. 3Chaymi Balaam kaynata profetizarqa:
Ñoqaqa Beorpa churin Balaammi kani,
ñoqaqa imakunatapas allintam rikuni,
4Diospa rimasqankunata uyariqmi,
Tukuy Atiyniyuq Tayta Diospa qawachisqanta rikuqmi kaynata nini:
5Jacobpa mirayninkuna,
¡mayna kuyayllapaqmi carpaykikunaqa!
Israelpa mirayninkuna,
¡mayna kuyayllapaqmi yachanaykikunaqa!
6Qamkunaqa rikchakunkichik
seqella plantasqa palmerakunamanmi,
mayu patanpi huertakunamanmi,
Tayta Diospa plantasqan áloes sachakunamanmi
yaku patanpi cedro sachakunamanmi.
7Israelpa mirayninkunaqa yakumantapas manam muchunqakuchu,
tarpukuyninkupaqpas manam yaku pisinqachu.
Reyninkupas rey Agagpa hawanpim munaychakunqa,
paypa munaychakuyninqa hatunmi kanqa.
8Paykunataqa Diosmi Egipto nacionmanta hurqomurqa,
búfalo hina kallpasapallañam payqa.
Israel runakunaqa Enemigon nacionkunatapas
pasaypaqtam chinkachinqa,
tulluntapas ñutuypaqmi ñutuparunqa,
flechankunawanmi tuksiypaq tuksiparunqa.
9 #
Gn 49.9. #
Gn 12.3. Israelqa león hinaraqmi kurkuykunpas,
china león hinaraqmi waqtapanpas,
¿Pitaq rikchachiyta atinman?
¡Bendecisuqnikikuna bendecisqa kachun!
¡Ñakasuqnikikuna ñakasqa kachun! nispa.
Hamuq punchawkunapaq Balaam rimarisqanmanta
10Balaampa nisqanta uyarispanmi rey Balac anchallataña piñakurqa, piñakuymanta makintapas taqllakuspanmi Balaamta nirqa:
Enemigoykunata ñakanaykipaqmi qayachimurqayki, aswanqa kimsakamañam paykunata bendeciykunki. 11Chaynaqa, wasikiman ripuy. Ñoqaqa ancha reqsisqatam ruwaykiman karqa, aswanqa Tayta Diosmi harkakurun, nispa.
12Chaymi Balaam nirqa:
Ñoqapas kachamuwasqayki runakunataqa nimurqaniñam: 13“Yachasqayki palaciopi huntataña qorita qollqeta qowaptikipas, Tayta Diospa kamachiwasqanpa contranpiqa manam imatapas ruwaymanchu. Allin kaqtapas otaq mana allin kaqtapas kikillaymantaqa manam ruwaymanchu, Tayta Diospa niwasqallantam rimasaq nispay”. 14Kunanqa llaqtaymanmi kutikusaq, ichaqa hamuq punchawkunapi runaykikunata wak runakuna imam ruwananmantayá willaykusqayki, nispa.
15Hinaspam kaynata profetizarqa:
Ñoqaqa Beorpa churin Balaammi kani,
ñoqaqa imakunapas rikuqmi kani,
16Diospa rimasqankunata uyariqmi kani,
tukuy imapa hawanpi munaychakuq Diospa yachasqanta reqsiqmi kani,
Tukuy Atiyniyuq Diospa qawachisqanta rikuqmi kani,
mosqoypi revelacionkunata chaskiqmi kani.
17Rikuchkanim, ichaqa manam kunan kaqtachu,
qawachkanim ichaqa manam hichpallapi kaqtachu:
Jacobpa mirayninmantam huk chaska lloqsimunqa,
Israel ayllumantam munaychakuq #24.17 Rey hatarimunqa nispaqa rimachkanman Davidmantawan Jesucristomantam.Rey hatarimunqa,
Moab runakunapa umantam taqñunqa,
Setpa mirayninkunatam chinkachinqa.
18Edompa allpantam hapikuykunqa,
Seir orqopi kaq enemigonkunatam vencenqa.
Israelpa mirayninkunaqa atiywanmi imatapas ruwanqaku,
19Jacobpa mirayninmantam munaychakuq lloqsinqa,
payqa llaqtapi puchuqkunatam chinkachinqa, nispa.
20Amalec runakunapa allpan lawman Balaam qawarispanmi kaynata profetizarqa:
Amalec nacionqa wakin nacionkunamantapas
ancha reqsisqam,
ichaqa tuñichisqa kaspam wiñaypaq purmanqa, nispa.
21-22Cen runakunata qawarispanmi Balaam kaynata profetizarqa:
Cainpa mirayninkuna,
pakakunaykikuna mana yaykuy atinaña kaptinpas,
qaqa rumikunapiña qesachakuptikipas,
qesaykiqa kañasqam kanqa;
Asiria runakunam presota apasunki, nispa.
23Balaamqa profetizarqataqmi:
¡Ay! ¡Piraq kawsanqa tukuy kaykunata Dios ruwaptin!
24Chipre islamantam barcokuna hamunqa,
Asiriapa chaynataq Heberpa llaqtankunatam purmachinqa,
ichaqa kikinpas purmachisqam kanqa, nispa.
25Chaymantam llaqtanman Balaam kutikurqa, rey Balacpas ñannintam kutikurqa.
Currently Selected:
Números 24: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
