Números 20
20
Qaqamanta pawamuq yakumanta
(Ex 17.1-7)
1Punta kaq killapim, Israelpa mirayninkuna Zin chunniqman chayaruspanku Cades lawpi samarurqaku. Chaypim María wañukurqa, hinaptinmi pamparurqaku.
2Yaku mana kasqanraykum runakuna Moisespa chaynataq Aaronpa contranpi hatarirurqaku. 3Moisespa contranpi rimaspankum nirqaku:
¡Amalaya Tayta Diospa wañuchisqan runakunawan kuska wañukuchwan karqa! 4¿Imapaqtaq Tayta Diospa runankunata kay chunniqman pusamuwarqankiku, ñoqaykupas chaynataq animalniykupas kaypi wañunaykupaq? 5¿Imapaqtaq Egiptomanta kay mana imapa kananman pusamuwarqankiku? Kaypiqa manam imatapas tarpuchwanchu. Manam higospas, uvaspas, granadapas nitaq yakupas tomanaykupaq kanchu, nispanku.
6Chaymi Moiseswan Aarón, runakunapa qayllanmanta Diosman asuykuna carpapa punkunman pasaspanku pampakama kumuykurqaku, chaypim Tayta Diospa kanchariynin paykunaman rikuriykamurqa. 7Hinaptinmi Moisesta Tayta Dios nirqa:
8Tawnata hapispa wawqeki Aaronwan runakunata huñuychik; hinaspa paykunapa qayllanpi yaku pawamunanpaq qaqata rimapayay, chaynapim qaqamanta lloqsimuq yakuta runakunapas chaynataq animalkunapas tomanqaku, nispa.
9Chaymi Moisés, Tayta Diospa qayllanmanta tawnata hoqarirqa, paypa kamachisqanman hina. 10Qaqapa ñawpaqninman runakunata Moiseswan Aarón huñuruptinkum, Moisés nirqa:
Uyariychik rumi sonqo runakuna: ¿Kay qaqamantachu tomanaykichikpaq yakuta hurqorusaqku? nispa.
11Chaynata niruspanmi Moisesqa makinta altoman hoqarispan, tawnanwan iskaykama qaqata waqtarurqa, hinaptinmi achka yaku pawaramuptin runakunapas chaynataq animalkunapas tomarqaku. 12Ichaqa Moisestawan Aarontam Tayta Dios nirqa:
Ñoqapi mana hapipakuspa Israel miraykunapa qayllanpi mana hatunchawasqaykichikraykum, qosqay allpamanqa Israelpa mirayninkunawan kuskaqa mana yaykunkichikchu, nispa.
13 #
Ex 17.1-7. Chay yakutam Meriba nispa suticharqaku. Chaypim Israelpa mirayninkuna Tayta Dioswan atipanakurqaku, chaypitaqmi chuya kasqanta paykunaman qawachirqa.
Edom castakuna Israelpa mirayninkunata harkakusqankumanta
14Cades lawmantam willakuqkunata Moisés kacharqa Edom nacionpa reyninta kaynata nimunankupaq:
Castayki Israelpa mirayninkunam kaynata nimusunki: Tukuy ñakariykuna pasasqaykutaqa yachankim. 15Ñawpaq taytaykum Egipto nacionman ripukuspan chaypi unay watakuna yachamurqaku. Aswanqa Egipto runakunam ñawpaq taytaykutapas chaynataq ñoqaykutapas ñakarichiwarqaku. 16Chaymi Tayta Diosta qayakuptiyku uyariykuwaspanku angelninta kachamurqa hinaspam Egipto nacionmanta hurqoramuwarqaku. Kunanqa allpaykipa linderonwan tupaq Cades llaqta lawpiñam kachkaniku. 17Ama hina kaspa allpaykipa chawpinta pasarachiwayku. Manam tarpusqa ukuntachu nitaq uvas huertantachu risaqku, manataqmi pozoykipi yakutapas tomasaqkuchu. Allpaykita pasarunaykukamam hatun ñanllanta rispayku mana maylawmanpas muyusaqkuchu, nispanku.
18Ichaqa Edom nacionpa reyninmi nirqa:
Manam allpaypa chawpintaqa pasawaqchikchu, pasaptikichikqa qamkunawan peleaqmi lloqsimusaqku, nispa.
19Hinaptinmi Israelpa mirayninkuna nirqaku:
Hatun ñanllantam risaqkuqa, sichum pozoykipi yakuta ñoqaykupas otaq animalniykupas tomaruspaqa pagapusqaykikum. Ama hina kaspa pasarachiwayku, nispanku.
20Ichaqa Edompa reyninmi nirqa:
¡Manam kaynintaqa pasawaqchikchu! nispa.
Hinaspam qari-qarillaña paykunapa contranpi achkallaña tropayuq lloqsimurqa. 21Allpan chawpinta pasanankuta mana munaptinmi Israelpa mirayninkunaqa huklaw ñannintaña pasarqaku.
Aaronpa wañukusqanmanta
22Israelpa mirayninkunam Cades lawmanta lloqsispanku Hor sutiyuq orqoman chayarurqaku. 23Edom nacionwan tupaq Hor orqopim Moisestawan Aaronta Tayta Dios nirqa:
24Aaronmi wañukuspan Israelpa mirayninkunaman qosqay allpaman mana yaykunqachu, Meriba yakupa waqtanpi mana kasuwasqaykichikrayku. 25Chaynaqa, Moisés, Aarontawan churin Eleazarta Hor orqoman pusay. 26Hinaspam Aaronpa sacerdote pachanta hurqospa churin Eleazartaña pachachinki. Chaypim Aarón wañukunqa, nispa.
27Chaymi Tayta Diospa kamachisqanta Moisés ruwarqa. Llapa runakuna qawachkaptinkum Hor orqoman rirqaku. 28#Nm 33.38; Dt 10.6.Chaypim Aaronpa sacerdote pachanta hurqospan churin Eleazartaña pachaykachirqa. Chay orqopa puntanpim Aarón wañukurqa. Moiseswan Eleazarñataqmi chay orqomanta kutimurqaku. 29Aaronpa wañukusqanta yacharuspankum Israelpa mirayninkuna kimsa chunka punchaw llumpayta waqarqaku.
Currently Selected:
Números 20: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
