Números 18
18
Sacerdotekunapa imam ruwanankumanta
1Aarontam Tayta Dios nirqa:
Qanmi churikikunapiwan chaynataq Leví ayllukunapiwan huchayuq kankichik santuariopa contranpi huchallikuy kaptinqa. Sacerdote kaynikichikpi mana allinkunata ruwaspaykichikmi ichaqa qanwan churikikunalla huchayuq kankichik. 2Ñoqaman asuykamuwanaykichik carpapi qanwan churikikuna serviwaspaykichikqa Leví aylluykichikkunawanmi yanapachikunkichik. 3Paykunaqa kamachisqaykita ruwaspankum carpapi serviwanqaku, santuariopi serviciokunamanwan altarmanmi ichaqa ama asuykunqakuchu, chaynapi qamkunawan kuska ama wañurunankupaq. 4Paykunam yanapasunki ñoqaman asuykuwanaykichik carpapi tukuy ima ruwanaykikunapi. Leví ayllumanta mana kaspaqa amam asuykamusunkichikchu. 5Qamkunallam santuariotawan altartaqa nanachikunkichik, chaynapim Israelpa mirayninkunapa contranpi manaña piñakusaqñachu. 6Ñoqam Israelpa mirayninkunamanta Leví aylluta rakirqani qamkunaman qonaypaq, chaynapi ñoqaman asuykuwanaykichik carpapi servikunankupaq. 7Altarpi ruwanakunatawan “Chuyay-chuyay” lugarpi ruwanakunatam ichaqa qanwan churikikunalla ruwankichik. Sacerdote kaynikichikqa qamkunallapaqmi, chay llamkaytam qamkunaman qoykichik. Pipas mana sacerdote kachkaspa ruwanaykichikta ruwaqqa wañuchisqam kanqa.
Sacerdotekunapawan Leví castakunapa mikunanmanta
8Aarontam Tayta Dios nirqa:
Qowasqanku ofrendakunata nanachikunaykipaqmi churarqayki. Israelpa mirayninkunapa qowasqanku sapaqchasqa ofrendakunatam qanman chaynataq churikikunaman qoykichik. Chay ofrendakunam qamkunapaq kanqa, chayqa wiñaypaq kamachikuymi. 9Ñoqapaq kañananku ofrendakunamantam qampaq kanqa: Kawsaykunamanta ofrendakuna, Israel miraykunapa huchamanta otaq culpamanta animal wañuchisqanku ofrendakuna; chaynaqa ñoqaman ofrecewasqanku ofrendakunam qampaq chaynataq churikikunapaq sapaqchasqa kanqa. 10Chay sapaqchasqa ofrendakunataqa qarikunallam santuariopi mikunkichik. Chaykunataqa chuyapaqmi hapinkichik.
11Israel miraykunapa kuyuchispa ofrecewasqanku ofrendakunapas qampaq chaynataq qanwan yachaq qari churikikunapaqwan warmi churikikunapaqmi kanqa. Chayqa wiñaypaq kamachikuymi. Chaytaqa aylluykimanta haykam chuya kaqkunallam mikunqaku. 12Qoykitaqmi ñoqa Tayta Diosman ofrecewanankupaq Israel miraykunapa puntallaraq hurqosqanku aceitetapas, vinotapas hinaspa trigomanta ofrendatapas. 13Cosechapa punta rurunmanta ñoqa Tayta Diosman apamuwasqankupas qampaqmi kanqa. Chaykunataqa mikunqaku aylluykimanta chuya kaqkunallam. 14#Lv 27.28.Israel miraykunapa sapaqchapuwasqan ofrendakunapas qampaqmi kanqa.
15Israel runakunapa piwi churinkuwan, animalninkupa punta wawankupas ñoqa Tayta Diosman ofrecesqa kasqanraykum qampaq kanqa. Chaywanpas runakunapa piwi churinkunataqa chaynataq mana mikuna animalpa punta wawankunataqa pagaspam kutichikunqaku. 16Chaynataqa ruwanqaku nacesqanmanta huk killayuq kachkaptinmi. Santuariopi pesoman hinam iskay onza qollqewan kutichikunqaku. Santuariopi pesoqa karqa yaqa media onzam. 17Vacapa, ovejapa hinaspa cabrapa punta wawankunataqa ñoqapaq sapaqchasqa kasqankuraykum ama kutichikunqakuchu. Chay animalkunatam wañuchispayki yawarninta altarman chaqchunki, wirankunatañataqmi kañanki ñoqa Tayta Diospaq miskillaña asnariq ofrenda kananpaq. 18Aychankunaqa qampaqmi kanqa, wakin ofrendakunamanta kuyuchispa ofrecewanaykichik animalpa qasqonpas chaynataq ofrecewanaykichik animalpa alleq piernanpas. 19Israelpa mirayninkuna ñoqa Tayta Diospaq sapaqchapuwasqan ofrendakunatam qanman qoyki chaynataq qanwan yachaq qari-warmi churikikunamanpas. Chayqa wiñaypaq kamachikuymi kanqa. Chaymi wiñaypaq pactoy kanqa, qampaqpas chaynataq miraynikikunapaqpas, nispa.
20Aarontam Tayta Dios nirqa:
Israelpa mirayninkunapa allpanpiqa manam herenciaykipas nitaq ima kapuqnikipas kanqachu, ñoqam herenciaykipas chaynataq kapuqnikipas kasaq. 21#Lv 27.30-33; Dt 14.22-29.Leví ayllukunaman herencia qosqayqa kanqa Israel runakunapa cosechasqankumanta llapallan diezmo qosqankum. Chaytam asuykuwanaykichik carpapi serviwasqaykichikrayku qoykichik. 22Israelpa mirayninkunamanta wakin runakunaqa amam carpamanqa asuykunqakuchu. Yaykuspankuqa huchallikuruspam wañurunmanku. 23Asuykuwanaykichik carpapiqa Leví ayllukunallam servikunqaku. Imapipas pantaruspankuqa kikinkum huchayuq kanqaku. Chayqa wiñaypaq kamachikuymi. Israel miraykunapa allpanpiqa manam kanqachu Leví ayllukunapa herencianqa. 24Paykunapa herencianqa kanqa Israelpa mirayninkunapa cosechasqankumanta diezmokuna qowasqankum. Chayraykum nirqani: “Israelpa mirayninkunapa allpanpiqa manam herencianku kanqachu”, nispa.
25-26Leví ayllukunaman ninanpaqmi Moisesta Tayta Dios kaynata nirqa:
Israelpa mirayninkuna cosechasqankumanta diezmo qowasqankutam herenciaykichik kananpaq qamkunaman qoykichik. Chay diezmokunamantam qamkunapas diezmoykichikta rakispa ñoqa Tayta Diosman ofrecewankichik. 27Chay diezmokunataqa rakipuwankichik imaynam Israelpa mirayninkuna kawsaykunamanta rakipuwasqankuman hinam, trigo kaptin vino kaptinpas. 28Chaynaqa, Leví ayllukuna, qamkunam ñoqa Tayta Diosman Israelpa mirayninkunapa qosusqaykichik llapallan diezmokunamanta ofrecewankichik. Ñoqa Tayta Diospaq ofrendakunataqa sacerdote Aaronmanmi qonkichik. 29Tukuy ima chaskisqaykichikmantam ñoqa Tayta Diosman ofrecewanaykichikpaq kaqta rakinkichik. Ñoqapaq sapaqchasqa ofrendaqa allinnin kaqkunam kanqa.
30Chaynaqa, Leví ayllukuna, chay allinnin ofrendakunamanta ñoqapaq sapaqcharuptikichik puchuqninmi trigo kaspa otaq vino kaspapas qamkunapaq kanqa. 31Chaytam maypiña kaspaykichikpas aylluykichikkunapiwan mikunkichik. Chaymi asuykuwanaykichik carpapi serviwasqaykichikmanta pagoykichik kanqa. 32Chay allinnin kaqkunata ñoqaman ofreceruwaspaykichikqa, puchuqninta mikuspapas manañam huchallikunkichikñachu. Chaynata ruwaspaykichikmi Israelpa mirayninkunapa sapaqchapuwasqan kaqkunata mana qachachankichikchu, chaynapim mana wañunkichikchu.
Currently Selected:
Números 18: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
