Números 10
10
Qollqe trompetakunamanta
1Moisestam Tayta Dios nirqa:
2Qollqemanta iskay trompetakunata ruway, chaykunataqa martillowanmi ruwanki. Chaykunam runakunata huñunapaq chaynataq maymi kasqankumanta ñawpaqman rinankupaqpas servikunqa. 3Iskayninta tocachiptikim qampa ñawpaqnikiman asuykuwanaykichik carpapa punkunman lliw llaqta huñunakamunqaku. 4Hukllanta tocachiptikiñataqmi, sapa ayllupi kamachikuqkunalla otaq Israel miraykunapi waranqa runakunapa kamachiqninkunalla qayllaykiman huñunakamunqaku. 5Iskaynin trompetata guerrapaq hina tocachiptikiñataqmi intipa qespimunan lawpi samaqkuna lloqsinqaku. 6Iskay kutikama guerrapaq hina tocachiptikiñataqmi sur lawpi samaqkuna lloqsinqaku. Chaynaqa, guerrapaq hina tocasqankum lloqsinankupaq señal kanqa. 7Runakuna huñunakunanpaqqa amam guerrapaq hinachu tocanqaku. 8Chay trompetakunataqa Aaronpa churin sacerdotekunam tocanqaku. Kayqa wiñaypaq kamachikuymi qamkunapaq chaynataq miraynikichikkunapaqpas kanqa.
9Nacionnikichikpi kachkaptikichik ñakarichisuqnikichik enemigo contraykichikpi hamuptinqa guerraman lloqsinaykichikpaqmi trompetakunata tocankichik, chaynapim ñoqa Tayta Diosqa mana qonqarusqaykichikchu, hinaspam enemigoykichikmanta librasqaykichik. 10Trompetakunataqa tocankichiktaqmi kusikunaykichik punchawkunapipas, fiestakunapipas, musoq killakunapipas, lliw kañana sacrificiota ofrecewaspaykichikpas chaynataq ñoqawan allinlla kasqaykichikmanta ofrendata ofrecewaspaykichikpas, chaynapim ñoqa Diosnikichik mana qonqasqaykichikchu. Ñoqa Tayta Diosmi Diosnikichik kani.
Sinaimanta lloqsisqankumanta
11Iskay kaq watamanña yaykuchkaptinkum, chay watapa iskay kaq killapa iskay chunka kaq punchawninpi, Tayta Diosman asuykuna carpapa hawanmanta puyu hoqarikururqa. 12Chaymi Israelpa mirayninkuna Sinaí chunniqmanta lloqsirqaku. Chay puyuñataqmi Parán chunniqpi sayarurqa. 13Paykunam lloqsirqaku imaynam Moisesman Tayta Diospa kamachisqanman hina. 14Puntatam Judá ayllupa banderan hinaspa tropankuna lloqsirqaku. Chay tropakunapa kamachiqninmi karqa Aminadabpa churin Naasón. 15Isacar ayllu tropakunapa kamachiqninmi karqa Zuarpa churin Natanael. 16Zabulón ayllu tropakunapa kamachiqninmi karqa Helonpa churin Eliab. 17Tayta Diospa carpanta paskaruptinkum Gersonpa hinaspa Meraripa mirayninkuna chay carpata apaspanku lloqsirqaku.
18Chaymantam Rubén ayllupa banderan hinaspa tropankuna lloqsirqaku. Paykunapa kamachiqninmi karqa Sedeurpa churin Elisur. 19Simeón ayllu tropakunapa kamachiqninmi karqa Zurisadaipa churin Selumiel. 20Gad ayllu tropakunapa kamachiqninmi karqa Deuelpa churin Eliasaf. 21Chaymantam Coat ayllukuna Diospaq sapaqchasqa kaqkunata apastin lloqsirqaku; samasqanku sitioman chayaspaqa, carpataqa tarirqaku sayachisqatañam.
22Chaymantam Efraín ayllupa banderan hinaspa tropankuna lloqsirqaku. Paykunapa kamachiqninmi karqa Amiudpa churin Elisama. 23Manasés ayllu tropakunapa kamachiqninmi karqa Pedasurpa churin Gamaliel. 24Benjamín ayllukunapa kamachiqninmi karqa Gedeonipa churin Abidán.
25Chaymantam Dan ayllupa banderan hinaspa tropankuna lloqsirqaku. Paykunam rirqaku llapallan campamentokunapa qepanta. Paykunapa kamachiqninmi karqa Amisadaipa churin Ahiezer. 26Aser ayllu tropakunapa kamachiqninmi karqa Ocranpa churin Pagiel. 27Neftalí ayllu tropakunapa kamachiqninmi karqa Enanpa churin Ahiram.
28Chayna seqesllanpim Israelpa mirayninqa soldadokuna hina tropa-tropa sapa kuti lloqsiqku.
Cuñadonta paykunawan rinanpaq Moisés nisqanmanta
29Huk punchawmi Madián ayllu suegron Jetropa churin Hobabta Moisés nirqa:
Tayta Diospa qowasqanku allpamanmi richkaniku, sichum ñoqaykuwan riptikiqa yanapasqaykikum. Israel ayllukunataqa Tayta Diosmi prometewarqaku yanapawanankupaq, nispa.
30 #
Ex 18.27. Hinaptinmi cuñadon Hobab nirqa:
Manam riymanchu, ñoqaqa llaqtaypi aylluykunapa kasqanmanmi kutikusaq, nispa.
31Chaymi Moisés nirqa:
Amayá saqeruwaykuchu, qamqa reqsinkim chunniqpi maypim samanayku sitiokunatapas, qamqa ñawiyku hina reqsichiwaqniykum kanki. 32Ñoqaykuwan riptikiqa, Tayta Diospa tukuy allin kaqkuna qowasqankutam rakisqaykiku, nispa.
33Tayta Diospa orqonmantam kimsa punchaw puriyta rirqaku. Chay kimsan punchawmi Tayta Diospa Arcan ñawpaqninkuta rirqa, samanankupaq sitiota maskastin. 34Campamentomanta lloqsiruptinkum Tayta Diospa puyun paykunapa hawanta rirqa. 35#Sal 68.1.Diospa Arcan apaqkuna puriyta qallaykuptinkum Moisés kaynata niq:
¡Dios Taytalláy, hatariy!
¡Enemigoykikuna cheqechisqa kachunku!
¡Cheqnisuqnikikuna qayllaykimanta lluptichunku! nispa.
36Diospa Arcan apaqkuna samaruptinkuñataqmi Moisés kaynata niq:
¡Dios Taytalláy, ñoqaykuman kutirikamuy!
¡Mana yupay atina Israelpa mirayninkunaman kutirikamuy! nispa.
Currently Selected:
Números 10: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
