Miqueas 2
2
Ñakarichikuq runakuna castigasqa kananmanta
1¡Ay, imallapiraq rikukunqaku!
puñusqankupi mana allinta tantearuspa
achikyaramuptinñataq kamachikuq kasqankurayku
chay mana allin tanteasqankuta ruwayman churaqkuna
2Paykunam hukpa chakranta otaq wasintapas munaruspaqa
suwaypawan qechuruspa hapikuykunku,
dueñontapas aylluntinta ñakarichispam
lliw herencianta qechurunku.
3Chayraykum Tayta Dios kaynata nin:
Ñoqapas qamkunapa contraykichikpim
mana allinnikichikta tanteachkani,
chaymantaqa manam lluptinkichikchu,
ñakarinaykichik punchaw chayamuptinmi
uchuychallaña purinkichik.
4Chay punchawkunapim qamkunata asipayaspa kaynata takipayasunkichik:
“Pasaypaq tuñichisqam rikurirunchik,
Diosninchikpa munaychakunan llaqtanchikmi
mana pipa nanachikusqan hukpa makinman chayarun,
chakranchikunatapas enemigonchikunam partenakurun”, nispanku.
5Chayraykum Tayta Diospa llaqtan ukupiqa
manaña allpaykichikpas kanqañachu.
Pantachikuq llulla profetakunamanta
6Profeta tukuqkunam
Diospa profetankunata ninku:
Ama yanqakunata willawaykuchu,
manam ima sasachakuypas pasawanqakuchu, nispanku.
7Jacob castakuna, qamkunam kaynata tanteanakunkichik:
¿Tayta Diospa espiritunchu pisiparun?
¿Kaykunachu ruwayninkuna?
¿Manachum Tayta Diosqa allin ruwaq runata yanapaykun? nispaykichik.
8Qayna punchawmi llaqtay karqankichik,
kunanqa enemigoyñam rikurirunkichik.
Guerramanta hawkalla kutimuqkunapatapas
enemigoykichikmanta hinaraqmi
allin pachallantapas qechunkichik.
9Llaqtaypi warmikunatam wasinkumanta qarqonkichik,
uña wawankumantapas
ñoqapa qosqay honorninkutam qechurunkichik.
10Hatarispa kaymanta pasaychik,
kayqa manam samana lugarñachu;
anchata qanrachakurusqanraykum
pasaypaq chinkachisqa kanqa.
11Sichum huk runa llullakuspan kaynata ninqa:
“Vinoraykum, aqaraykum qampaq profetizasaq”, nispa,
chayna runam qamkunapa profetaykichik kanqa.
Llaqtanta Tayta Dios librananmanta
12Jacobpa mirayninkuna cheqaptapunim huñunasqaykichik,
Israelmanta puchuqkunatam huñumusaq.
Ovejakunata corralman huñuchkaq hinam huñusqaykichik,
pastokunapi huñuchkaq hinam huñusqaykichik,
hinaptinmi waranqantin-waranqantin runakuna hinaraq qaparinkichik.
13Ñanta kichaqmi ñawpaqninkuta rinqa,
paykunañataqmi ñanta kicharuspa
llaqtapa punkunta lloqsinqaku.
Reyninku Tayta Diosñataqmi
paykunapa ñawpaqninta rinqa.
Currently Selected:
Miqueas 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012