Mateo 14
14
Bautizaq Juanta Herodes wañurachisqanmanta
(Mr 6.14-29. Lc 9.7-9)
1Chay tiempopim Jesuspa ruwasqankunata Herodes uyarirurqa. 2Chaymi criadonkunata nirqa:
Payqa Bautizaq Juanmi kawsariramun, chayraykum milagrokuna ruwananpaq atiyniyuqqa, nispan.
3Herodesmi Juanta hapirachimuspan cadenawan watasqata carcelpi wichqarachirqa. Chaynataqa ruwarqa wawqen Felipepa warmin Herodiaspa causanpim. 4#Lv 18.16; 20.21.#Lc 3.19-20.Juanmi Herodesta nirqa:
Manam allinchu paywan casarakuynikiqa, nispan.
5Chayraykum Herodesqa Juanta wañurachiyta munarqa, ichaqa runakunatam manchakurqa, Juanta profetapaq hapisqankurayku. 6Herodespa santonpim, Herodiaspa warmi wawan llapa runapa qayllanpi tusurqa, chaymi Herodesta gustaykusqanrayku, 7juraspan prometekurqa imapas mañakusqanta qonanpaq. 8Hinaptinmi sipasñataq maman umacharuptin Herodesta nirqa:
Bautizaq Juanpa umantayá platopi qoykuway, nispan.
9Chaymi rey Herodesqa llakikururqa, ichaqa convidasqankunapa qayllanpi prometesqanraykum qonankupaq kamachirqa. 10Hinaspam Juanpa umanta carcelpi qorumunankupaq kamaykachiptin 11platopi apamuspanku sipasman haywaykurqaku, payñataqmi mamanman qoykurqa.
12Hinaptinmi llapa discipulonkuna Juanpa cuerponta hoqarispa pamparamurqaku, chaymantam pasaspanku Jesusman willaykamurqaku.
Pichqa waranqa runakunaman mikuchisqanmanta
(Mr 6.30-44. Lc 9.10-17. Jn 6.1-14)
13Jesusmi Juanpa wañukusqanta yacharuspan, barcapi sapallan pasakurqa mana runakunapa kasqanman. Runakunañataqmi yacharuspanku llaqtankumanta lloqsispa chakiwan qatirqaku. 14Jesusñataqmi barcamanta uraykuspan chay achkallaña runakunata qawaykurqa, chaymi llakipayarikuspan paykuna ukupi kaq onqoqkunata sanoyachirqa. 15Yaqaña tutaykamuchkaptinmi payman asuykuspa discipulonkuna nirqaku:
Ñam tutaykamuchkanña, kayqa chunniqmi. Chaynaqa, runakunatayá niy llaqtakunaman rispanku mikuyta rantimunankupaq, nispanku.
16Jesusñataqmi nirqa:
Manam rinmankuchu, qamkunayá mikuchiychikqa, nispa.
17Chaymi discipulonkuna nirqaku:
Kaypiqa pichqa tantawan iskay challwallam kachkan, nispanku.
18Jesusñataqmi nirqa:
Kayman apamuwaychik, nispan.
19Runakunata pastopi tiyanankupaq kamachispanmi, pichqa tantakunatawan iskay challwakunata hapiykuspan hanaq pachata qawarispan Diosman graciasta qorqa, hinaspam tantata pakiykuspan discipulonkunaman qoykuptin runakunaman aypurqaku. 20Llapallankum saksanankukama mikurqaku, puchuqkunatañataqmi chunka iskayniyuq canasta huntataraq huñururqaku. 21Mikuqkunam karqaku pichqa waranqa qarikuna, warmikunawan wawakunam ichaqa mana yupasqachu karqaku.
Yaku hawanta Jesuspa purisqanmanta
(Mr 6.45-52. Jn 6.16-21)
22Chaykunapa qepantam discipulonkunata Jesús kamachirqa barcaman qespispanku qochata chimpachkanankupaq, payñataqmi runakunata aviarqa. 23Runakunata aviaruspanñataqmi, Jesusqa sapallanña orqoman rirqa chaypi Diosta mañakamunanpaq. Tutaykaramuptinmi Jesusqa sapallan chaypi tarikurqa, 24barcañataqmi lamar qocha chawpitaña richkarqa, contranpi sinchi wayra pukumusqanrayku olakunawan yaqaña pampachikustin. 25Hinaptinmi yaqa utulu waqaytaña, yaku hawantakama paykunaman Jesús asuykurqa. 26Discipulonkunañataqmi yaku hawantakama puriqta rikuruspanku manchakuymanta qaparirqaku:
¡Manchachikum wakqa! nispanku.
27Hinaptinmi Jesusñataq nirqa:
¡Hawkalla kaychik! ¡Ama manchakuychikchu! Ñoqam kani, nispan.
28Pedroñataqmi nirqa:
¡Señor, qam kaspaykiqa yakupa hawanta qanman hamunaypaq kamachiway! nispan.
29Chaymi Jesús nirqa:
Hamuyá, nispan.
Hinaptinmi Pedroqa barcamanta uraykuspan yaku hawantakama Jesuspa kasqan lawman puriyta qallaykurqa. 30Ichaqa sinchi wayra pukumusqanraykum mancharikuspan yakuman chinkaykuyta qallaykurqa, hinaspam qaparirqa:
¡Señorlláy, salvaykullaway! nispan.
31Chaymi Jesusñataq Pedrota makinmanta hapiykuspan nirqa:
¡Pisi iñiyniyuq runa! ¿Imanasqataq iskayrayanki? nispa.
32Paykuna barcaman seqaruptinkum wayra taniramurqa. 33Chaymi barcapi kaqkuna, Jesuspa ñawpaqninpi qonqoraspanku nirqaku:
¡Cheqaptapunim qamqa Diospa Churin kasqanki! nispanku.
Genesaretpi onqoqkunata Jesús sanoyachisqanmanta
(Mr 6.53-56)
34Lamar qochata chimparuspankum Genesaret llaqtaman chayarurqaku. 35Hinaptinmi chay llaqtapi runakuna Jesusta reqsiruspanku, muyuriqnin llaqtakunaman willakuyta cheqechirqaku, chaymi onqoqkunata apamurqaku, 36hinaspam ruegakurqaku pachanpa patallantapas llapchaykunankupaq, chaymi haykam llapchaqkunaqa sanoyarurqaku.
Currently Selected:
Mateo 14: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012