Levítico 14
14
Leprawan onqoq imaynam chuyanchakunanmanta
1Moisestam Tayta Dios kaynata nirqa:
2Kaykunam leprawan onqoq runa imaynatam chuyanchakunanpaq yachachikuykuna: Leprawan onqoqmi sacerdoteman pusasqa kanqa, 3hinaptinmi sacerdoteñataq campamentomanta hawaman lloqsispan chaypi qawanqa. Sichum chay runapa lepran sanoyaruptinqa, 4sacerdotem kamachinqa mikunapaq kaq kawsachkaq iskay urpituchakunata, cedromanta kaspita, puka qaytuta hinaspa hisopopa kallmantapas apamunanpaq. Chaykunam chuyanchakunanpaq ofrenda kanqa.
5Chaymantam sacerdote kamachinqa chayllaraq wisimusqa yakuyuq allpa mankapa hawanpi huknin urpituchata wañuchinankupaq. 6Kawsachkaq urpituchatapas, cedro kaspitawan, puka qaytutawan chaynataq hisopopa kallmantawan kuskata hapiykuspanmi challpunqa chayllaraq wisimusqa yaku hawanpi wañuchisqa urpituchapa yawarninman.
7Hinaspam chay yawarwan lepramanta chuyanchakuq runata qanchis kutikama challanqa, chaynapim payqa chuyaña kanqa. Chay kawsaq urpituchatañataqmi pawakunanpaq kachaykunqa.
8Pipas chuyanchakuqqa pachankunatam taqsakunqa, chukchantapas kachiy-kachiyta rutukuspanmi bañakunqa; chaynata chuyanchakuspanmi campamentoman yaykunqa. Ichaqa qanchis punchawmi kikinpa carpanman ama yaykunqachu. 9Qanchis kaq punchawpim chukchanta, barbanta, cejasninkunata hinaspa lliw chukchankunatapas kachiy-kachiyta rutukunqa. Pachankunata taqsakuspam kikinpas bañakunqa, hinaspam chuyaña kanqa. 10Pusaq kaq punchawpiñataqmi iskay sano malta carnerokunatawan huk watayuq sano ovejata apamunqa, apamunqataqmi aceitewan chapusqa soqta kilo parten fino harinatapas, chayqa kawsaykunamanta ofrendam chaynataq cuarto litro masnin aceitetapas. 11Chaymi lepranmanta chuyanchakuq runata ofrendankunatawan kuskata sacerdote pusamunqa ñoqapa qayllayman, Diosman asuykuna carpapa punkunman. 12Hinaspam huknin malta carnerota hapiykuspan kuyuchispa cuarto litro masnin aceiteyuqta ofrecewanqa, chayqa ñoqa Tayta Diosman ofrecewananku culparayku ofrendam. 13Chay malta carnerotaqa sacerdotem wañuchinqa, hucharayku ofrendatawan lliw kañapuwananku ofrendata wañuchinanku sitiopi. Culparayku ofrecewasqanku ofrendaqa sacerdotepaqmi kanqa imaynam hucharayku ofrenda hina, chayqa ñoqallapaqña sapaqchasqam.
14Chaymantam culparayku ofrecewasqan carneropa yawarninta chaskiykuspa sacerdote llusinqa chuyanchakuq runapa alleq rinrinpa ura patachanta, llusinqataqmi alleq makinpa alleq chakinpa maman dedontapas. 15Chaymantam aceiteta sacerdote hapiykuspan ichoq makinpa pampanman talliykunqa, 16hinaspam alleq dedonta, ichoq makinpi aceiteman challpuykuspan hina chay alleq dedollanwan, ñoqa Tayta Diospa ñawpaqniypi qanchis kutikama challanqa. 17Makinpi puchuq aceitewanñataqmi lepramanta chuyanchakuq runata alleq rinrinpa ura patachanta llusinqa, llusinqataqmi alleq makinpa alleq chakinpa maman dedontapas. Chaynatam llusinqa culparayku yawarwan llusisqanpa hawanman. 18Puchuq aceitewanñataqmi sacerdote tallinqa lepramanta chuyanchakuq runapa umanman. Chaynata sacerdote ruwaruptinmi chay runapa huchanta ñoqa pampachasaq. 19Chaymantam sacerdoteqa hucharayku ofrendata ofrecewanqa. Chaynataqa ruwanqa chay runa millakuypaq kasqanmanta chuyaña kananpaqmi. Chaymantañam lliw kañana animalta ofrecewanqa. 20Chay altarpa hawanpim lliw kañana animalta ofrecewanqa kawsaykunamanta ofrendatawan kuskata. Chaynata sacerdote ruwaptinmi chay runapa huchankunata ñoqa pampachasaq, hinaptinmi chay runa chuyaña kanqa.
21Chay onqoq runa wakcha kasqanrayku qollqen mana haypaptinqa huk malta carnerotam pusamuwanqa culparayku ofrecewananpaq, chayqa huchakuna pampachasqa kananpaq ofrendam, chaytawan kuskatam ofrecewanqa aceitewan chapusqa iskay kilo masnin fino harinatapas, chayqa kawsaykunamanta ofrendam. Ofrecewanqataqmi cuarto litro masnin aceitetapas, 22iskay qoqñuta otaq iskay mallqo palomakunatapas, hukninmi hucharayku ofrendapaq kanqa, hukninñataqmi lliw kañanapaq.
23Pusaq kaq punchawpim tukuy chaykunata apamunqa asuykamuwananku carpapa punkunman. Chaypim ñoqa Tayta Diospa qayllaypi sacerdoteman qonqa. 24Sacerdotem culparayku carnero ofrendata cuarto litro masnin aceiteyuqta ofrecewanqa. Chayqa ñoqa Tayta Diosman kuyuchispa ofrecewasqanku ofrendam.
25Chaymantam culparayku malta carnero ofrendata sacerdote wañuchinqa, hinaspam yawarninta chaskiykuspa chuyanchakuq runapa alleq rinrinpa uran patachanta llusiykunqa, llusinqataqmi alleq makinpa alleq chakinpa maman dedontapas. 26Chaymantam aceiteta sacerdote ichoq makinpa pampanman talliykunqa.
27Hinaspam alleq dedonta ichoq makinpi aceiteman challpuykuspan ñoqa Tayta Diospa ñawpaqniypi qanchis kutikama challanqa. 28Sacerdotem makinpi kaq aceitewan, millakuypaq kayninmanta chuyanchakuq runapa alleq rinrinpa ura patachanta llusinqa, llusinqataqmi alleq makinpa alleq chakinpa maman dedontapas. Chaynataqa llusinqa culparayku yawarwan llusisqanpa hawanmanmi. 29Puchuq aceitetañataqmi millakuypaq kayninmanta chuyanchakuq runapa umanman tallinqa, chaynapim chay runapa huchankunata ñoqa Tayta Dios pampachasaq.
30Chaymantam ofrecewaqniypa atisqanman hina, sacerdote ofrecewanqa huknin qoqñuta otaq huknin mallqo palomata. 31Chaykunapa hukninmi hucharayku ofrendapaq kanqa, hukninñataqmi lliw kañanapaq. Chaywan kuskatataqmi millakuypaq kayninmanta chuyanchakuq runapa huchankunata pampachasaq.
32Kaykunam lepra onqoywan kasqanmanta chuyanchakuq wakcha runakunapaq yachachikuy, nispa.
Wasikunapa lepranmanta
33Moisestawan Aarontam Tayta Dios kaynata nirqa:
34Sichum qamkunaman qonay Canaán allpapiña kachkaptikichik, hukkaqnikichikpa wasiman leprata kachaykamuptiyqa, 35chay wasiyuqmi sacerdoteman rispan ninqa: “Wasiypa perqankunapim qoqaray rikurirun”, nispa.
36Hinaptinqa sacerdotem manaraq wasiman yaykuchkaspan, chay wasimanta tukuy imakunatapas hurqonankupaq kamachinqa, chaynapi chay wasipi tukuy ima kaqkunapas mana millakuypaq rikurirunanpaq, chaymantañam qawananpaq sacerdote yaykunqa.
37Sichum sacerdote allinta qawaykuptin chay wasipa perqankunaman verde otaq puka qoqaraykuna yaykuchkaqña kaptinqa 38wasimantam lloqsiruspa qanchis punchawpaq wichqarunqa.
39Qanchis kaq punchawpiñataqmi kaqlla kutispan allinta qawapanqa; sichum chay qoqaraykuna wasipa perqankunapi miraruptinqa, 40sacerdotem chay wasipa perqanmanta qoqaraypa kasqan rumikunata hurqochinqa, hinaspam llaqtamanta hawapi millakuypaq sitioman wischuchimunqa.
41Chaymantam wasipa ukunpi llapallan perqakunata allinta siksichinqa, hinaspam chay allpata llaqtamanta hawapi millakuypaq sitioman wischuchinqa.
42Hinaspam wischuchisqan rumikunapa rantinpi huk rumikunataña churachinqa, perqakunatapas musoqmantam mituwan laqapachinqa.
43Sichum ruminkunatapas wischuchichkaptin chaynataq perqakunatapas siksichispa musoqmanta mituwan laqachichkaptin chay wasipa perqankunapi kaqllamanta qoqaray rikuriruptinqa, 44sacerdotem huktawan yaykuspan allinta qawanqa; sichum chay wasipi qoqaray miraruptinqa, chayqa lepra onqoymi, chay wasiqa millakuypaqñam kanqa.
45Chay wasitaqa tuñichispam ruminkunatapas, qerunkunatapas, allpantapas, llaqtamanta hawapi millakuypaq sitioman wischuchinqa. 46Chay wasi wichqasqa kachkaptin pipas yaykuqqa tutaykuqkamam millakuypaq kanqa.
47Pipas chay wasipi puñuqqa otaq mikuqqa pachantam taqsakunqa.
48Sichum sacerdote chay wasiman huktawan yaykuspa allinta qawaptin, musoqmanta laqapasqanku perqakunapi chay qoqaray mana miraruptinqa, qoqaray chinkarusqanraykum sacerdote ninqa chay wasiqa chuyaña kasqanta.
49Wasita chuyanchananpaqmi iskay urpituchakunata, cedro kaspita, puka qaytuta chaynataq hisopopa kallmantapas apamunqa. 50Hinaspam huknin urpituchata wañuchinqa chayraq wisimusqa yakuyuq allpa mankapa hawanpi.
51Chaymantam cedro kaspita, hisopopa kallmanta, puka qaytuta chaynataq kawsachkaq huknin urpituchatapas hapiykunqa. Chaykunatam wañuchisqan urpituchapa yawarninman hinaspa chayraq wisimusqa yakuman challpuykuspan qanchis kutikama chay wasita challanqa. 52Chaynatam qoqaraypa rikurisqan wasita, urpituchapa yawarninwan, chayllaraq wisimusqa yakuwan, kawsachkaq urpituchawan, cedro kaspiwan, hisopopa kallmanwan hinaspa puka qaytuwan chuyanchanqa.
53Kawsachkaq huknin urpituchatañataqmi pawakunanpaq llaqtamanta hawapi kachaykunqa. Chaynatam ruwanqa chay wasi manaña millakuypaq kananpaq.
54Kaykunam lepra onqoymanta, caracha onqoymanta, 55pachapi qoqaraymanta, wasipa perqanpi qoqaraymanta, 56aycha qarapi rikuriruq punkiykunamanta, pusllukunamanta chaynataq aycha qarapi rikuriq manchakunamantapas yachachikuykuna.
57Kaykunatam llaqtaman yachachinkichik lepra onqoyta, qoqaray onqoyta chaynataq millakuypaq kaqkunata hinaspa chuya kaqkunatapas reqsinankupaq, nispa.
Currently Selected:
Levítico 14: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
