Josué 4
4
Rumikunata Jordán mayumanta hurqosqankumanta
1Jordán mayuta llapa runa chimpayta tukuruptinkum, Josueyta Tayta Dios nirqa: 2Chunka iskayniyuq runakunata akllay, sapa ayllumanta hukta, 3hinaspa kamachiy kay Jordán mayupa chawpinmanta, sacerdotekunapa sayasqan sitiomanta, chunka iskayniyuq rumikunata hurqomuspanku kunan tuta samanaykichik sitioman apaspa chaypi churamunankupaq, nispa. 4Chaymi Israelpa mirayninkunamanta, sapa ayllumanta akllasqan runakunata qayaspan, 5Josué nirqa:
Jordán mayupa chawpinman, Diosnikichikpa Arcanpa ñawpaqninkama yaykuspa chaymanta rumita hurqomuychik hinaspa Israelpa mirayninkunamanta sapa aylluman hina, sapakama hukta hombromuychik. 6Chay rumikunam qamkunapaq huk señal kanqa. Sichum hamuq punchawkunapi miraynikichikkuna tapusunkichik: “¿Ima ninantaq kay rumikunaqa?” nispanku, 7hinaptinqa kaynatam ninkichik: “Jordán mayum iskayman rakikururqa, Tayta Diospa pacto ruwasqan Arcapa ñawpaqninpi. Chayraykum kay rumikunaqa churasqa kachkan Israelpa mirayninkuna wiñaypaq yuyarinankupaq”, nispa.
8Chaymi Israelpa mirayninkunaqa Josueypa kamachisqanta ruwarqaku. Israelpa mirayninkunamantam sapa aylluman hina, Tayta Diospa kamachisqanta ruwarqaku; Jordán mayupa chawpinmanta chunka iskayniyuq rumikunata apaspanku samasqanku sitiopi churarqaku. 9Josueypas Jordán mayupim, Diospa Arcanta apaq sacerdotekunapa sayasqan sitiopi, chunka iskayniyuq rumikunata sayachirqa. Chay rumikunaqa hinallam kunankamapas chaypi kachkan.
10Diospa Arcanta apaq sacerdotekunañataqmi Jordán mayupa chawpinpi sayarurqaku, llapa runakuna ruwananpaq Josueyman Tayta Diospa kamachisqanta ruway tukunankukama. Josueyman Moisespa kamachisqanman hinam imapas ruwasqa karqa. Chaymi llapa runa utqayllamanña chimparurqaku. 11Llapa runakuna chimpayta tukuruptinkuñam, Tayta Diospa Arcan apaq sacerdotekunapas chimparurqaku, hinaspam llaqtapa ñawpaqninman churakuykurqaku. 12Moisespa kamachisqanman hinam, Rubén ayllupas, Gad ayllupas, Manasespa wakin ayllunkunapas, allin armasqakama, Israelpa mirayninkunapa ñawpaqninta chimparqaku. 13Guerrapi peleanankupaq armasqakamam yaqa tawa chunka waranqa soldadokuna Tayta Diospa ñawpaqninta chimparqaku, hinaspam Jericó lawpi pampaman chayarurqaku. 14Chay punchawmi Israelpa mirayninkunapa qayllanpi, Josueyta Tayta Dios hatuncharqa. Chaymi Moisesta hina Josueytapas kawsanan punchawkama respetarqaku.
15Chaymantam Josueyta Tayta Dios nirqa:
16Pacto ruwasqay Arca apaq sacerdotekunata Jordán mayumanta lloqsimunankupaq kamachiy, nispa.
17Chaymi sacerdotekunata Jordán mayumanta lloqsimunankupaq Josué kamachirqa. 18Tayta Diospa Arcan apaq sacerdotekuna Jordán mayumanta chaki allpaman lloqsiramuptinkum, Jordán mayuqa manaraq chakichkaspan kallpasqanta hina, kaqllamanta kuchun-kuchun kallpayta qallaykurqa. 19Israelpa mirayninkunam punta kaq killapa chunka kaq punchawninpi, Jordán lawmanta lloqsispanku, Gilgalpi campamentonkuta sayachirqaku, Jericó llaqtapa intipa qespimunan lawninpi. 20Hinaptinmi Josueqa, Jordán mayumanta apamusqanku chunka iskayniyuq rumikunata Gilgalpi sayachirqa. 21Hinaspam Israelpa mirayninkunata nirqa:
Sichum qepa punchawkunaman miraynikichikkuna tapusunkichik: “¿Ima ninantaq kay rumikunaqa?” nispa, 22hinaptinqa paykunamanmi kaynata willankichik: “Israelpa mirayninkunam Jordán mayupa chawpinta chaki allpantakama chimpamurqaniku. 23Tayta Diosmi, qamkunapa Diosnikichikmi, chimpayta tukumunaykukama Jordán mayuta qayllaykupi chakirachirqa, imaynam Puka lamar qochatapas lliw chimpay tukumunaykukama chakichisqanta hina. 24Chaynapi kay pachapi llapallan llaqtakuna Tayta Diospa llumpay atiyninta reqsinankupaq, qamkunapas kawsanaykichik punchawkama Tayta Diosta kasukunaykichikpaq”, nispaykichik.
Currently Selected:
Josué 4: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
