Josué 18
18
Wakin ayllukunapa allpanmanta
1Israelpa mirayninkunam allpata munaychakuruspanku, Silo llaqtapi huñunakuspa Diosman asuykuna carpata sayachirqaku. 2Ichaqa Israelpa mirayninkunamantam qanchis ayllukunaraq tupaqninku allpata manaraq chaskirqakuchu.
3Chayraykum Israelpa mirayninkunata Josué nirqa:
¿Haykapikamataq qellakunkichik ñawpaq taytaykichikman Tayta Diospa qosqan allpata hapimunaykichikpaq? 4Chaynaqa, sapa ayllumanta kimsa runakunata akllaychik, paykunata kamachiptiy llapallan allpata qawamuspanku imaynam kasqanta willawanankupaq, chaynapi rakinakunaykichikpaq. 5Chay allpataqa qanchismanmi rakinankichik. Judá ayllupaqmi sur law kanqa. Joseypa mirayninkunapaqñataqmi norte lawman kanqa. 6Chay allpata qanchisman rakinaruspaykichikmi imaynam kasqanta ñoqaman willawankichik, chaynapi yupaychasqanchik Tayta Diospa qayllanpi sorteanaypaq. 7Leví ayllum ichaqa tupaqnin allpata mana chaskinqachu. Tayta Diospa sacerdoten kayninkum paykunapa tupaqninkuqa kanqa. Gad ayllupas, Rubén ayllupas chaynataq Manasespa wakin ayllupas ñam tupaqninku allpata chaskirunkuña, Jordán mayupa intipa qespimunan waklaw chimpanpi. Chay allpatam paykunaman Tayta Diospa serviqnin Moisés qorqa, nispa.
8Hinaptinmi chay runakuna rinankupaq allichakuptinku Josué nirqa:
Rispayá chay allpata qawamuspa rakinaramuychik. Rakiyta tukuramuspañataqmi imayna ruwamusqaykichikta kutimuspa willawankichik, kay Silo llaqtapi Tayta Diospa qayllanpi sorteanaypaq, nispa.
9Hinaptinmi chay runakuna rispanku chay allpata purimuspanku llaqtan-llaqtan qanchisman rakinaramurqaku. Chaytam qellqaruspanku Josueyman apamurqaku Silo llaqtapi campamentonpi kachkaptin. 10Josueyñataqmi Silo llaqtapi Tayta Diospa qayllanpi sorteaspan Israelpa mirayninkunaman, sapa aylluman qoykarirqa.
Benjamín ayllupa allpanmanta
11Sorteasqankuman hinam haykam kasqankuman hina Benjamín aylluman allpa tuparurqa Judá ayllupa allpanwan tupanakuqmanta Joseypa mirayninkunapa allpanwan tupanakuqkama. 12Norte lawmanmi karqa Jordán mayumanta qallarispa wichayman Jericó llaqtapa norte lawninkama. Chaymantam orqonkunatakama intipa seqaykunan lawman rispa Bet-avén chunniqkama chayarqa. 13Chaymantam Luz llaqtapa otaq Bet-el llaqtapa sur lawninta rispa Atarot-adarninta uray lawpi Bet-horón llaqtapa sur lawninpi orqokama uraykurqa. 14Hinaspam Mediterráneo lamar qocha lawman muyumurqa Bet-horón llaqtapa chimpan orqopa sur lawninta Quiriat-baal llaqtakama otaq Quiriat-jearim llaqtakama. Chay llaqtaqa Judá ayllupam karqa. Chay llaqtakunawanmi intipa seqaykunan lawman tupanakurqa.
15Sur lawmanñataqmi Quiriat-jearim llaqtamanta qallarispa intipa seqaykunan lawman Neftoa llaqtapa pukyunkunakama chayarqa. 16Chaymantam Ben-hinomkama chaynataq Refaim wayqopa norte lawnin waqtakama uraykurqa, hinaspam jebuseokunapa sur lawninpi Hinom wayqoman uraykuspan Rogel pukyukama chayarqa. 17Hinaspam norte lawman En-semes llaqtaman muyurqa, chaymantañataqmi Adumín wichaypa chimpan Gelilot lawkama chayaspan Rubenpa churin Bohanpa rumi churasqankama uraykurqa. 18Chaymantam Jordán qechwapa chimpan wichaypa norte lawninta Jordán mayukama uraykurqa. 19Hinaspam Bet-hogla llaqtapa norte lawninta rispan Puchqo lamar qochapa norte lawninpi chaynataq Jordán mayupa Puchqo lamar qochapi tukupayninpa sur lawninpi tukurqa. Chaynam sur lawman Benjamín ayllupa allpan karqa.
20Intipa qespimunan lawmanmi Jordán mayupi tukurqa. Chaykunam Benjamín ayllupa allpankuna karqa, haykam kasqankuman hina.
21Benjamín aylluman tupaq llaqtakunam karqa: Jericó, Bet-hogla, Casis wayqo, 22Bet-arabá, Zemaraim, Bet-el, 23Avim, Pará, Ofra, 24Quefar-haamoni, Ofni hinaspa Geba. Llapallanmi karqa chunka iskayniyuq llaqtakuna taksa llaqtankunapiwan. 25Gabaón, Ramá, Beerot, 26Mizpa, Cafira, Mozah, 27Requem, Irpeel, Tarala, 28Zela, Elef, Jebús otaq Jerusalén, Gabaa hinaspa Quiriat. Llapallanmi karqa chunka tawayuq llaqtakuna taksa llaqtankunapiwan. Chaykunam Benjamín ayllupa allpankuna karqa, haykam kasqankuman hina.
Currently Selected:
Josué 18: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
