Jonás 4
4
Jonaspa piñakurusqanmanta
1Jonastam ichaqa Diospa imam ruwasqan mana gustarqachu, chaymi pay anchata piñakururqa. 2#Ex 34.6.Chayraykum Tayta Diosta mañakuspan nirqa:
Dios Taytalláy, kayna kanantaqa llaqtaypi kachkaspallayraqmi nirqaniña. Chayraykum manaraq kaykuna pasakuchkaptin Tarsis lawman ayqekuchkarqani. Ñoqaqa yachanim llakipayakuq hinaspa kuyapayakuq Dios kasqaykita. Qamqa mana chaylla piñakuruq kaspaykim hatun kuyapayakuynikipi ima castigo ruwanaykitapas manaña ruwankichu. 3Chaynaqa, Dios Taytalláy, ama hina kaspa wañurachiwayña, ñoqapaqqa wañukuymi aswan allinqa kanman kawsanaymantaqa, nispa.
4Hinaptinmi Tayta Dios nirqa:
¿Allintachu ruwachkanki chaynata piñakuspayki? nispa.
5Chaymi Nínive llaqtamanta Jonás lloqsiruspan intipa qespimunan lawpi samarurqa. Chaypim huk ramadata ruwakuruspan tiyaykurqa, llaqtata imam pasasqanta qawananpaq. 6Tayta Diosñataqmi higuerilla plantata wiñarachirqa, chaynapi Jonasta umallantapas llantuykunanpaq hinaspa mana allin kasqanmanta allinyaykachinanpaq. Chaymi Jonás chay plantawan llumpayta kusikurqa. 7Ichaqa paqarinnintin punchawpaqmi, Dios chay plantata utuskuruwan kachurachiptin chakirurqa. 8Inti lloqsiramuptinmi, intipa qespimunan lawmanta rupaq wayrata Dios hatarirachimuptin, Jonaspa umanta inti rupaptin wañunayarqa; chaymi wañuyta munaspan nirqa:
Kawsanaymantaqa amalaya wañuruymanña, nispa.
9Tayta Diosñataqmi nirqa:
¿Higuerilla planta chakirusqanmantachu llumpayta piñakurunki? nispa.
Jonasñataqmi nirqa:
¡Arí, razonmantam rabiawanpas wañuruyman! nispa.
10Hinaptinmi Tayta Dios nirqa:
Qamqa mana plantasqayki, mana wiñachisqayki higuerilla plantamantam llakikurunki. Chay plantaqa huk tutallapi wiñaramuspam huk tutallapitaq chinkarunpas. 11Chaynaqa, ¿manachu Nínive hatu-hatun llaqtamanta, yaqa pachak iskay chunka waranqa masnin runakunamanta, allintapas mana allintapas mana sapaqchay yachaqkunamanta chaynataq nana-nanaq animalkunamanta ñoqapas llakipayarikuyman? nispa.
Currently Selected:
Jonás 4: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012