Juan 15
15
Uvas plantamantawan kallmankunamanta
1Ñoqam kani cheqap uvas planta, Taytayñataqmi chakrapi llamkaq. 2Ñoqapi kaq kallmakuna mana ruruqtaqa paymi kuchurunqa, ruruq kallmatañataqmi aswanraq rurunanpaq rawmapaykunqa. 3Qamkunaqa rimapayasqay palabraykunawanmi limpioña kachkankichik. 4Ñoqapiyá takyaychik ñoqañataq qamkunapi. Kallmaqa kikillanmantaqa manam rurunmanchu mana yuranpi kaspaqa, qamkunapas manataqmi ruruwaqchikchu mana ñoqapi takyaspaqa.
5Ñoqam kani uvas planta, qamkunañataqmi kallmaykuna kankichik. Ñoqapi takyaqqa achkatam rurunqa. Ñoqamanta sapaqchakuruspam ichaqa mana imatapas ruwayta atiwaqchikchu. 6Pipas ñoqapi mana takyaqqa qorusqa kallma hinam wischusqa kanqa, chakiruspanmi ninapi rupananpaq wischusqa kanqa.
7Sichum ñoqapi takyaspaykichik chaynataq palabraykunapas qamkunapi takyaptinqa, tukuy ima munasqaykichikta mañakuychik, hinaptinqa qosunkichikmi. 8Taytaqa hatunchasqa kanqa achkata ruruptikichikmi, chaynapim qamkunaqa cheqap discipuloykuna kankichik. 9Imaynam Taytaypas ñoqata kuyawan chaynam ñoqapas qamkunata kuyaykichik, kuyakuyniypiyá takyaychik. 10Sichum kamachikuyniykunata kasukuspaqa kuyakuyniypiyá takyaychik, imaynam ñoqapas Taytaypa kamachikuyninkunata kasukuspay paypa kuyakuyninpi takyasqayta hina.
11Kaykunataqa nikichik kusikuyniy qamkunapi kananpaqmi, chaynapi kusikuynikichik qespisqa kananpaq. 12#Jn 13.34; 15.17; 1 Jn 3.23; 2 Jn 5.Kaymi kamachikuyniyqa: Huknikichikmanta huknikichikkamayá kuyanakuychik, imaynam ñoqapas qamkuna kuyasqayta hina. 13Pipas hatun kuyakuyniyuqqa amistadninkunapa rantinpi wañuqmi. 14Sichum kamachisqayta ruwaspaykichikqa amistadniykunam kankichik. 15Manañam serviqniykuna nisqaykichikñachu, sirvienteqa manam yachanchu patronninpa ruwasqankunataqa. Qamkunaqa amistadniyñam kankichik, chaymi Taytapa niwasqankunata yachachirqaykichik. 16Manam qamkunachu ñoqataqa akllawarqankichik, ñoqam qamkunataqa akllarqaykichik, hinaspam achkata rurunaykichikpaq churarqaykichik, chaynapi rurusqaykichik takyananpaq. Chaynaqa, Taytam ñoqapa sutiypi tukuy ima mañakusqaykichikta qosunkichik. 17Kaytam kamachikichik: Huknikichikmanta huknikichikkamayá kuyanakuychik.
Jesustawan iñiqninkunata runakuna cheqnisqanmanta
18Runakuna cheqnisuptikichikqa yuyariychikyá qamkunamantapas puntataqa ñoqata cheqniwasqankuta. 19Kay pachapaq kaptikichikqa runakunachá kuyasunkichikman kikinkuta hina, ichaqa manam kay pachapi kaqñachu kankichik, aswanmi kay pachamanta akllakurqaykichik, chayraykum runakunaqa cheqnisunkichik. 20#Mt 10.24; Lc 6.40; Jn 13.16.Palabraykunatayá yuyariychik: Sirvienteqa manam patronninmanta aswan munayniyuqchu. Ñoqata qatikachawachkaspankuqa qamkunatapas qatikachasunkichikmi; palabraykunata kasukuptikichikqa qamkunapa nisqaykichiktapas kasukunqakum. 21Tukuy chaykunataq ñoqaraykum ruwasunkichik, kachamuwaqniyta mana reqsisqankurayku.
22Sichum mana hamuymanchu karqa nitaq rimaymanchu karqa, hinaptinqa mana huchayuqchá kanmanku karqa, kunanmi ichaqa manaña imapas huchankumantaqa ninankupaq kanñachu. 23Ñoqata cheqniqniykunaqa Taytatapas cheqninmi. 24Sichum paykuna ukupi mana pipapas ruwasqanta mana ruwaptiyqa manam huchayuqchu kanmanku karqa, ichaqa chay ruwasqaykunata rikuchkaspankupas cheqniwankuraqmi, cheqninkutaqmi Taytaytapas. 25#Sal 35.19; 69.4.Kaykunaqa pasakuchkan leypa “yanqamantam cheqniwarqaku” nisqan cumplikunanpaqmi.
26Ichaqa kallpanchasuqnikichik cheqap Espiritutam Taytaypa rantinpim kachamusaq, paymi ñoqamanta willasunkichik. 27Qamkunapas ñoqamantam willakunkichik, qamkunaqa qallariyninmantapunim ñoqawan karqankichik.
Currently Selected:
Juan 15: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012