Juan 16
16
1Tukuy kaykunatam nikichik iñiynikichikpi mana hukmanyanaykichikpaq. 2Sinagogakunamantam qarqosunkichik, hamuchkanmi wañuchisunaykichik punchawkuna, chayta ruwaspankum “Diostam servichkani”, ninqaku. 3Kaykunataqa ruwanqaku Taytatawan ñoqata mana reqsiwasqankuraykum. 4Kaykunataqa nikichik chay tiempokuna chayamuptin kay nisqaykunata yuyarinaykichikpaqmi.
Qamkunawan kasqayraykum kaykunataqa mana qallariyninmantaqa willarqaykichikchu.
Chuya Espiritupa ruwayninmanta
5Kunanmi ichaqa kachamuwaqniypa kasqanman richkani. Ichaqa manam mayqannikichikpas tapuwankichikchu: “¿Maytataq richkanki?” nispaqa. 6Aswanraqmi qamkunaqa kay nisqaywan sinchi llakisqa kachkankichik. 7Cheqaptam nikichik: Qamkunapaqqa allinpunim ñoqapa riyniyqa, mana riptiyqa manachá qamkunapa kallpanchasuqnikichikpas hamunmanchu, rispaymi ichaqa kachamusqaykichik. 8Pay hamuspanmi runakunata reqsichinqa huchayuq kasqankumanta, Diospa kuyakuyninmanta hinaspa juicio punchawmanta, 9huchayuq kasqankutaqa reqsichinqa ñoqapi mana iñisqankuraykum, 10Diospa kuyakuyninmantaqa reqsichinqa, Taytaman kutikuptiy manaña rikuwasqaykichikraykum, 11juiciomantañataqmi reqsichinqa, kay pachallapi kamachikuqqa juzgasqaña kasqanmanta.
12Achkaraqmi qamkunaman ninay kachkan, ichaqa manaraqmi entiendewaqchikchu. 13Cheqap Espíritu hamuspanñam pusasunkichik tukuy imapas cheqap kaqkunaman, payqa manam kikillanmantachu rimanqa, aswanqa llapa imapas uyarisqanmantam; hinaspam willasunkichik hamuq punchawkunapi imakunam pasakunanmanta. 14Payqa atiyniytam qawachinqa, ñoqamanta chaskisqantam qamkunaman willasunkichik. 15Taytapa kaqkunaqa ñoqapam, chayraykum nirqaykichik: “Espirituqa ñoqamanta chaskisqantam qamkunaman willasunkichik, nispay”.
Llakikuypas kusikuymanña tikrakunanmanta
16Asllamantaqa manam rikuwankichikñachu, chaymanta qepamanmi ichaqa kaqllamanta rikuwankichik, nispa.
17Chaynata niptinmi wakin discipulonkuna tapunakurqaku:
¿Imanichkantaq: “Asllamantaqa manam rikuwankichikñachu, chaymanta qepamanmi ichaqa kaqllamanta rikuwankichik, ñoqaqa Taytapa kasqanmanmi richkani”, nispaqa? 18¿Ima ninantataq nichkan “asllamantaqa manam rikuwankichikñachu” nispaqa? Manam chaytaqa entiendenchikchu, nispanku.
19Jesusñataqmi tapuy munasqankuta musyaruspan nirqa:
Nirqaykichikmi qamkunataqa “asllamantaqa manam rikuwankichikñachu, chaymanta qepamanmi ichaqa kaqllamanta rikuwankichik”, nispay. 20Cheqaptapunim nikichik, qamkunam waqaspa llakikunkichik, hinaptinmi runakunañataq kusikunqaku. Ichaqa qamkuna llakipi kaptikichikpas, chay llakikuynikichikmi kusikuyman tikrasqa kanqa. 21Warmiqa wachakunan tiempo chayaramuptinmi nanaywan tarikun; wawan naceramuptinñataqmi nanayninkunatapas qonqarun, kay pachapi wawan nacerusqanraykum payqa kusikun. 22Chaynam qamkunapas kunan llakisqa kachkankichik, ñoqa kutimuptiymi ichaqa kusisqa kankichik, chay kusikuytaqa manam pipas qechusunkichikchu.
23Chay punchawpiqa manañam imamantapas tapuwankichikchu. Cheqaptapunim nikichik, sutiypi mañakuptikichikqa Taytaqa qosunkichikmi. 24Kunankamam sutiypiqa manaraq imatapas mañakurqankichikchu. Mañakuychikyá hinaspaqa chaskinkichikmi, chaynapim kusikuynikichik qespisqa kanqa.
Kay pachapi mana allinkunata Jesuspa vencesqanmanta
25Kaykunatam rikchanachiykunawan nirqaykichik, hamuq punchawpiqa manañam rikchanachiykunawanñachu rimapayasqaykichik, aswanqa imam kaqtañam Taytaymanta rimapayasqaykichik. 26Chay punchawmi ñoqapa sutiypi Taytata mañakunkichik, manam ñoqañachu Taytataqa mañapusqaykichik. 27Taytayqa kuyasunkichikmi ñoqata kuyawasqaykichikrayku, qamkunaqa creerqankichikmi Diosmanta hamusqayta. 28Taytapa kasqanmantam kay pachaman hamurqani, kunanñataqmi kay pachata saqespay Taytayman kutisaq, nispa.
29Discipulonkunañataqmi nirqaku:
Kunanqa sutillatañam rimachkanki, manam rikchanachiykunawanñachu. 30Kunanqa yachanikuñam tukuy ima yachaq kasqaykita, manam necesarioñachu pipapas tapusunaykiqa, chayraykum Diosmanta hamusqaykita creeniku, nispanku.
31Jesusñataqmi nirqa:
¿Ñachu kunanqa creerunkichikña? 32Ñam hora chayaramunña, sapakamam cheqerunkichik hinaspam sapallaytaña saqeruwankichik. Ichaqa manam sapallaychu kachkani, Taytaymi ñoqawanqa kachkan. 33Kaykunataqa nikichik hawkayayta ñoqapi tarinaykichikpaqmi. Kay pachapiqa ñakarinkichikmi, ichaqa kallpanchakuychikyá, kay pachapi mana allinkunataqa venceruniñam, nispa.
Currently Selected:
Juan 16: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012