Juan 11
11
Lazaropa wañukusqanmanta
1 #
Lc 10.38-39. Betania llaqtayuq Lázaro sutiyuq runam onqochkarqa, payqa yacharqa panin Mariawan hinaspa panin Martawanmi. 2#Jn 12.3.Huk kutipim onqoq Lazaropa panin María, Señor Jesuspa chakinman perfumeta talliykurqa, hinaspam chukchanwan chakichirqa. 3Lazaropa paninkunam Señor Jesusman willachiq kacharqaku:
Señorlláy, amistadniki Lazarom onqochkan, nispanku.
4Jesusñataqmi chayta uyariruspan nirqa:
Chay onqoyqa manam wañuy onqoychu, aswanqa Dios hatunchasqa kananpaqmi chaynataq Diospa Churinpas hatunchasqa kananpaqmi, nispa.
5Jesusqa llumpaytam kuyarqa Lazarota, Martata chaynataq ñañantapas. 6Chaymi “Lazaropa onqosqanmanta” uyariykuspan iskay punchawtawanraq qeparurqa. 7Chaymantañam discipulonkunata nirqa:
Hakuchik Judea lawman kutisun, nispa.
8Discipulonkunañataqmi nirqaku:
Yachachikuq, qayninpallataq llapa judiokunaqa rumiwan wañurachiyta munasurqanki ¿chaychu kutiytaraq munachkanki? nispanku.
9Jesusñataqmi nirqa:
¿Punchawqa manachu chunka iskaynin horayuq? Pipas punchawpi purispaqa manam mitkanchu kay pachapi achkiywan qawakusqanrayku. 10Tuta puriqmi ichaqa mitkan tutayaypi kasqanrayku.
11Chaymantam Jesús nirqa:
Amistadninchik Lazaroqa puñuchkanmi, risaqyá rikchachimunaypaq, nispa.
12Discipulonkunañataqmi nirqaku:
Señorllayku, sichum puñuspallaqa sanoyanqachá, nispanku.
13Jesusqa chaynataqa nirqa Lazaropa wañukusqantañam, discipulonkunañataqmi puñuspa samasqallanmanta rimasqanta piensarqaku. 14Chaymi Jesusqa cheqaptapuni nirqa:
Lazaroqa wañukunñam. 15Qamkunaraykum kusikuni mana chaypi kasqaymanta, chaynapi aswan mastaraq creenaykichikpaq. Hakuchikyá payman, nispa.
16Chaymi mellizowan sutichasqanku Tomasqa wakiqnin discipulomasinkunata nirqa:
Hakuchik ñoqanchikpas Jesuswan kuska wañumunanchikpaq, nispan.
Kawsay qokuqqa Jesuslla kasqanmanta
17Jesusmi chayaruspan tawa punchaw pampasqataña Lazarota tariykurqa. 18Betania llaqtaqa karqa Jerusalenmanta kimsa kilómetro hinallam. 19Chaymi achkaq judiokuna rirqaku Martapatawan Mariapata turinku wañukuptin llakisqa kasqankumanta consuelamunankupaq. 20Martam Jesuspa hamusqanta yacharuspan tariparqa, Mariañataqmi wasipi qeparurqa. 21Martam Jesusta nirqa:
Señorlláy, qam kaypi kaptikiqa turillayqa manachá wañunmanchu karqa. 22Aswanqa yachanim, Diospa imam mañakusqayki qosunaykitaqa, nispa.
23Jesusñataqmi nirqa:
Turikiqa kawsarimunqam, nispa.
24Chaymi Marta nirqa:
Arí, tukupay punchawpi wañuqkunawan kawsarimunantaqa yachanim, nispa.
25Jesusñataqmi nirqa:
Ñoqam kani kawsarichiqpas chaynataq kawsay qokuqpas. Pipas ñoqapi iñiqqa wañuspapas kawsarimunqam. 26Pipas kawsachkaspallanraq ñoqaman iñiqqa manam wiñaypaqchu wañunqa. ¿Marta creenkichu kayta? nispa.
27Chaymi Martañataq nirqa:
Arí Señorlláy, ñoqaqa creenim, qamqa kanki kay pachaman hamuq Diospa Churin Cristom, nispa.
Lazaropa sepulturanpi Jesuspa waqasqanmanta
28Chaynata nispanmi Martaqa rirqa ñañan Mariata qayaq, paytam upallallamanta nirqa:
Yachachikuqqa kaypiñam kachkan, qayasuchkankim, nispan.
29Chaynata Marta niykuptinmi Mariañataq utqayman hatarispan Jesuspa kasqanman rirqa. 30Jesusqa manaraqmi llaqtamanqa chayarqaraqchu, payqa Martawan tupaykusqan sitiollapiraqmi kachkarqa. 31Consuelaqnin judiokunañataqmi María chaylla hatariruspan lloqsiramuptin qatimurqaku: “Sepulturatachiki waqaq richkan”, nispanku.
32Mariañataqmi Jesuspa kasqanman chayaruspan qonqorakuykurqa, hinaspam nirqa:
Señorlláy, kaypi kaptikiqa turillayqa manachá wañunmanchu karqa, nispa.
33Jesusñataqmi Mariapa waqasqantawan chaynataq hamuqmasin judiokunapa waqasqanta qawaykuspan sonqonpi sinchita llakirikurqa. 34Chaymi tapurqa:
¿Maypitaq pamparurqankichik? nispa.
Paykunañataqmi nirqaku:
Señor, hakuchikyá qawaykamunki, nispanku.
35Jesusmi waqarqa.
36Judiokunañataqmi ninakurqaku:
Qawaychik maynatam kuyasqa, nispanku.
37Wakiqninñataqmi nirqaku:
Payqa ñawsatapas qawarichiqmi, kaypi kaspaqa imallatapas ruwanmancha karqa Lázaro mana wañunanpaq, nispanku.
Lazaropa kawsarimusqanmanta
38Jesusmi huktawan sinchita llakirikurqa, hinaspam sepulturaman asuykurqa, chayqa karqa machaymi, punkunpas karqa hatun rumiwan wichqasqam. 39Jesusmi nirqa:
Chay rumita hurqoychik, nispa.
Hinaptinmi wañukuqpa panin Martañataq nirqa:
Señorlláy, ñachá asnarichkanñapas, tawa punchawñam wañukusqanqa, nispa.
40Jesusñataqmi nirqa:
¿Manachu nirqayki: “Creespaykiqa rikunkim Diospa atiyninta”, nispay?
41Tapasqanku rumita hurqoruptinkum Jesusqa hanaq pachata qawarispan nirqa:
Taytáy, graciastam qoyki uyariykuwasqaykimanta. 42Ñoqaqa yachanim chaylla uyariwaqniy kasqaykita, kaytaqa nichkayki muyuriqniypi runakuna kasqanraykum, chaynapi kachamuwasqaykita creenankupaq.
43Chaynata nispanmi hatunmanta qaparispan nirqa:
¡Lázaro, lloqsimuy! nispa.
44Hinaptinmi chay wañuqqa lloqsiramurqa, makin chakin watasqa hinaspa uyanpas telawan wankusqa. Jesusñataqmi nirqa:
Purinanpaq paskaychik, nispa.
Jesuspa contranpi rimanakusqankumanta
(Mt 26.1-5. Mr 14.1-2. Lc 22.1-2)
45Mariawan riq achkaq judiokunañataqmi Lazarota kawsarirachisqanta qawaykuspanku Jesusman iñikuykurqaku. 46Wakiqninñataqmi fariseokunaman Jesuspa imam ruwasqanta willamurqaku. 47Hinaptinmi sacerdotekunapa kamachiqninkunawan fariseokuna cortepi huñunakurqaku, hinaspam nirqaku:
¿Imatataq ruwasun? Kay runaqa achkatañam milagrokunata ruwarun. 48Ruwaqta hinalla saqeptinchikqa lliw runachá payman iñikurunqaku, hinaptinchá romanokuna hamuruspanku templonchiktawan nacionninchikta purmarachinqaku.
49Paykuna ukupi Caifasmi karqa sumo sacerdote chay watapi, chaymi pay nirqa:
Qamkunaqa manam imatapas yachankichikchu, 50nitaqmi cuentatapas qokunkichikchu. Aswan allinqa kanman huk runalla nacionninchikpa rantinpi wañuyninmi, lliw nación puchukarunanmantaqa, nispa.
51Chaykunataqa Caifasqa rimarqa manam kikillanmantachu, chay watapi sumo sacerdote kasqanraykum Dios revelarqa, chaymi profetizarqa nacionpa rantinpi Jesuspa wañunanmanta. 52Jesusqa wañunan karqa manam paykunapa rantillanpichu aswanqa Diospa cheqesqa churinkunata hukllaman huñunanpaqwanmi. 53Chay punchawmantam judiokunapa kamachiqninkuna tanteanakurqaku Jesusta wañurachinankupaq.
54Chaynapim Jesusqa judiokunamanta pakakuspallaña purirqa. Judeamanta lloqsispanmi chunniqpa hichpan Efraín sutiyuq llaqtaman rirqa, chaypim discipulonkunawan qeparqa.
55Judiokunapa Pascua fiestanmi hichpamuchkarqaña, chaymi llapa runakuna tukuy hinastin llaqtakunamanta manaraq Pascua fiesta chayamuchkaptin Jerusalenman rirqaku chuyanchakuq. 56Jesusta maskaspankum temploman chayaruspanku tapunakurqaku:
¿Imaninkichiktaq? ¿Hamunqachu fiestaman icha manachu? nispanku.
57Sacerdotekunapa kamachiqninkunawan fariseokunam kamachirqaku:
Pipas Jesuspa maypim kasqanta yachaspankuqa willakamuchunkuyá presochamunaykupaq, nispanku.
Currently Selected:
Juan 11: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012