Jueces 4
4
Deborawan Barac guerrapi vencesqankumanta
1Aod wañukuptinmi, Israelpa mirayninkuna kasqallan Tayta Diospa qayllanpi mana allinkunata ruwarqaku, 2chaymi paykunata cananeokunapa reynin Jabinpa makinman Tayta Dios qoykurqa. Jabinqa Hazor llaqtapim munaychakurqa, Sisarañataqmi tropankunapa kamachiqnin karqa, payqa Haroset-goim llaqtapim yacharqa. 3Chaymi Israelpa mirayninkuna qaparispa Tayta Diosta mañakurqaku. Jabinpam isqon pachak fierromanta guerrapaq carretankuna karqa. Iskay chunka watam Israelpa mirayninkunata llumpayta ñakarichirqa.
4Chay tiempopim Israel miraykunata Lapidotpa warmin Débora kamachirqa, payqa profetisam karqa. 5Sapa punchawmi Deboraqa palmera sachapa sikinpi tiyaq, Efraín law orqokunapi Ramá llaqtamanta Bet-el llaqtaman riq ñanpi; Israel miraykunañataqmi sasachakuyninkuta allichananpaq Deboraman riqku. Chayraykum chay palmerata Deborapa palmeranwan suticharqaku.
6Neftalí law Cedes llaqtayuq Abinoampa churin Baracta qayarachimuspanmi Débora nirqa:
Israelpa Diosninmi kamachisunki, Tabor orqoman rispayki Neftaliypa chaynataq Zabulonpa mirayninkunamanta chunka waranqa runakunata huñumunaykipaq. 7Ñoqam Cisón mayuman, rey Jabinpa tropankunapa kamachiqnin Sisarata, carretankunata hinaspa tropankunata pusamusaq, chaypim makikiman churasaq, nispa.
8Hinaptinmi Deborata Barac nirqa:
Qam riptikiqa risaqmi, mana chayqa manam risaqchu, nispa.
9Deborañataqmi nirqa:
Qanwanmi risaq, ichaqa manam qamchu hatunchasqa kanki, Sisarataqa warmipa makinmanmi Tayta Dios churaykunqa, nispa.
Chaymi Deboraqa hatarispan Cedes llaqtaman Baracpiwan rirqaku. 10Baracmi Cedes llaqtaman Zabulón ayllumanta hinaspa Neftalí ayllumanta chunka waranqa runakunata huñurachirqa. Deborapas paywanmi rirqa.
11Moisespa suegron Hobabpa mirayninmanta kaq Hebermi, llapa ceneokunamanta rakikuruspan, Zaanaim pampapi encina sachapa hichpanpi carpanta sayarachirqa, chayqa Cedes llaqtapa hichpanpim karqa. 12Abinoampa churin Baracpa Tabor moqoman seqarusqantam Sisaraman willaykurqaku. 13Sisarañataqmi guerrapaq fierromanta isqon pachaknintin carretankunata chaynataq llapallan tropankunata huñuruspan Haroset-goim llaqtamanta Cisón wayqoman rirqa. 14Hinaptinmi Baracta Débora nirqa:
Kunan punchawmi Sisarata makikiman Tayta Dios churaykun, kikin Tayta Diosmi ñawpaqnikita richkan, nispa.
Chaymi Baracñataq chunka waranqa runakunawan Tabor moqomanta uraykamurqa. 15Barac peleayta qallaykuptinmi, Sisarata chaynataq carretankunatawan llapallan tropankunatapas Tayta Dios cheqerachirqa; Sisarapas carretanmanta uraykuspam mancharisqallaña lluptirurqa. 16Baracñataqmi Sisarapa carretankunatawan tropankunata Haroset-goim llaqtakama qatirqa, hinaspam llapallan tropankunata espadawan wañurachirqa, manam chullallatapas puchurqachu.
17Chaymi Sisaraqa chakillawan lluptiruspa Heberpa warmin Jaelpa carpanman chayarurqa. Chaymanqa ayqerqa Hazor llaqtapa reynin Jabinwan ceneo Heber hawkalla kasqankuraykum. 18Sisarata chaskinanpaq Jael lloqsiruspanmi nirqa:
Taytay, ama manchakuychu, yaykukamuy, nispa.
Chaymi carpanman yaykuruptin Jaelñataq huk qatawan qataykurqa. 19Hinaptinmi Sísara nirqa:
Yakunayawachkanmi, ama hina kaspa yakullaykita qoykuway, nispa.
Hinaptinmi Jaelñataq odrepi lecheta tomananpaq qoykurqa, hinaspam kasqallan qataykurqa. 20Chaymi Sísara nirqa:
Hawallapi kamuy, pipas hamuspa tapusuptikiqa “manam pipas kaypiqa kanchu”, nispam ninki.
21Sisarañataqmi sinchi pisipasqa kasqanrayku miskita puñururqa, chaymi Heberpa warmin Jaelñataq mazotawan carpanpa estacanta hapiykuspan upallalla Sisaraman asuykuruspan estacawan rinri kullunpi takarurqa allpapi plantakunankama, chaynapim wañururqa. 22Chaymi Sisarata qatispan chayaruptin, Baracta chaskiqnin lloqsiykuspan Jael nirqa:
Yaykumuy, maskasqayki runata qawachisqayki, nispa.
Chay warmipa kasqanman Barac yaykuruptinmi, Sisaraqa rinri kullunpi estacawan pampakama takasqa wañusqaña kachkasqa.
23Chay punchawpim cananeokunapa reynin Jabinta, Israelpa mirayninkunapa qayllanpi penqayman Tayta Dios churarqa, 24chaymi Israelpa mirayninkuna astawan kallpanchakururqaku cananeokunapa reynin Jabinta chinkachinankukama.
Currently Selected:
Jueces 4: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012