Isaías 5
5
Judá nacionta uvas huertawan rikchanachisqanmanta
1 #
Mt 21.33; Mr 12.1; Lc 20.9. Kunanmi kuyaqniypa uvas huertanmanta takita takisaq.
Kuyaqniypam uvas huertan karqa,
tukuy imapa qespinan waqtapim huertan karqa.
2Rumicharuspanmi barbecharqa,
miski ruruq uvaspa estacantam plantarqa.
Cuidananpaqmi chakrapa chawpinpi chukllata ruwarqa,
uvasta sarunapaqmi pozota ruwarqa.
Miski uvasta rurunantam payqa suyarqa,
ichaqa puchqo uvasllatam cosecharurqa.
3Chaynaqa, Jerusalenpi yachaqkuna,
Judá nacionpi runakuna
niwaychik:
¿Pitaq kayna kananpaq pantarun,
uvas plantaychu icha ñoqachu?
4¿Imakunataraqtaq ruwayman karqa uvas huertaypaq?
¿Icha imaraqmi faltawan ruwanaypaq?
Miskita rurunantam ñoqaqa suyarqani,
¿imaynanpimá puchqollatañaqa rururun?
5Chaynaqa, kunanmi qamkunaman,
imatam kay huertaywan ruwanayta nisqaykichik:
Llapa rumi perqanta paskaruptiymi purmarachinqaku,
perqankunata lliw tuñirachiptiymi saruparunqaku.
6Purmarachispaymi saqerusaq,
manaña mallkisqa, manaña qorasqam kanqa,
kichkakunapa qorakunapa huntaykusqanñam kanqa,
puyukunatapas mana paramunanpaqmi kamachisaq.
7Tukuy Atiyniyuq Tayta Diospa kuyayllapaq uvas huertanqa
Israel runakunawan Judá nacionpi yachaqkunam.
Payqa kamachikuynin kasukunankutam munarqa,
aswanqa wañuchinakuyllatam tarirun.
Paykunataqa allinkuna ruwanankutam munarqa,
ichaqa ñakariqkunapa qapariyllantam uyarirun.
Mana allin ruwaqkuna castigasqa kananmanta
8¡Imallapiraq rikukunkichik,
wasikunata chakrakunata rantiypaq-rantiqkuna!
¿Qamkunallachu kay allpapi kawsankichik?
9Tukuy Atiyniyuq Tayta Diosmi cheqaptapuni niwarqa:
“Achkallaña wasikunam tuñichisqa kanqa,
hatunnin suma-sumaq wasikunam mana runayuq chunninqa.
10Chunka yugadayuq chakramantam
huk urpu vinollataña hurqonqaku,
chunka saco muhumantam
chulla sacollataña cosechanqaku”.
11¡Ay, imaynaraq kankichik,
tutapayta hatarispa upyakuqkuna!
¡Ay, imaynaraq kankichik,
sinchi tutakama machakuqkuna!
12Convido ruwasqaykichikpipas
arpakunata, bombokunata, qenakunatam tocankichik,
vinopas puchu-puchum;
Tayta Diospa ruwasqantam ichaqa
mana qawarinkichikpaschu,
Diospa tukuy ima ruwasqantaqa
manam kaqpaqpas hapinkichikchu.
13Chaynaqa, mana yachayniyuq kasqanraykum
llaqtayqa huklaw nacionman presochasqa rinqa.
Paykunamanta reqsisqa runakunam
yarqaymanta wañunqaku,
llapallankum yakumanta chakinqaku.
14Chayraykum wañuqkunapa kasqan sitiopas
yarqaymanta hinaraq simintapas kicharinqa,
llaqtatawan kamachikuqkunatapas millpurunanpaq,
fiestakunapi aychanku kusichiyllapi kaqkunatapas millpurunanpaq.
15Chaynatam runakunata uchuychanqa,
hatun tukuqkunatam kumuykachachinqa.
16Tukuy Atiyniyuq Tayta Diosmi ichaqa
allin arreglo ruwasqanmanta hatunchasqa kanqa.
Chuya Diosmi allinkuna ruwasqanwan
chuya kasqanta reqsichikunqa.
17Apukunapa purmasqa chakrankunapipas
purunpi hinañam cabrakunawan ovejakunallaña mikunqaku.
18¡Ay, imaynaraq kanqaku! sakrillawan
mana allin ruwayta apamuqkuna,
carretata hinaraq huchankuta aysaqkuna.
19Paykunaqa ninkuraqmi:
Diosqa apurawmanñayá
ruwanankunata tukuchun qawananchikpaq,
Israelpa Chuya Diosninqa tanteasqankunatayá
chaylla cumplichun reqsinanchikpaq, nispa.
20¡Ay, imaynaraq kanqaku!
Mana allinta allinmi niqkuna,
allintañataq mana allinmi niqkuna,
achkiyta tutaman tikraqkuna,
tutayaytañataq achkiyman tikraqkuna,
qatqetapas miskim niqkuna,
miskitañataq qatqem niqkuna.
21¡Ay, imaynaraq kanqaku yachaysapa tukuqkuna
chaynataq kikillankumanta yuyaysapa tukuqkuna!
22¡Ay, imaynaraq kanqaku
vino upyanankupaq qari tukuqkuna,
machachikuq vino chaqruypi mana vencechikuqkuna!
23Qamkunaqa qollqeta chaskikuykuspam
mana allin ruwaq runata
mana huchayuqta hina kachaykunkichik,
inocente runamantañataqmi mana
imapas qokusunkichikchu.
24Imaynam qopata chaylla nina ruparun,
imaynam chaki pastota lenwachkaq nina ruparun,
chaynam qamkunapas sapinmanta tukusqa kankichik,
wayrapa apasqan chaki wayta hina tukusqam kankichik.
Chaynaqa, kankichik,
Tukuy Atiyniyuq Tayta Diospa yachachikuyninta mana kasukusqaykichikraykum,
Israelpa Chuya Diosninpa kamachikuyninkunata wischupakusqaykichikraykum.
25Chayraykum Diosqa llaqtanpaq llumpayta piñakurqa,
makinwanmi wañuyman qaraykurqa,
chay ruwasqanwanqa orqokunapas katkatatarqam,
ayakunapas callekunapim chuta-chuta mana pipa hoqarisqan karqa.
Chaywanpas Señorpa piñakuyninqa manam taninchu,
chayllam kachkan castigananpaq.
26Tayta Diosmi karupi kaq nacionkunapaq
banderata sayachin,
silbaspam paykunata qayan,
paykunañataqmi chaylla hamunku,
utqayllamanñam chayaramunku.
27Paykunamantaqa manam mayqanninpas pisipanchu nitaq mitkakunchu.
Manam mayqanpas puñuywanqa aysachikunchu nitaq puñunchu,
weqaw watankupas manam paskakamunchu,
usutankupa watullanpas manam tipimunchu.
28Ñawchiy-ñawchiymi flechankupas,
suma-sumaq estirasqam arconkupas.
Rumi hinaraqmi caballonkupa situnpas,
remolino wayra hinaraqmi carretankupa ruedankunapas.
29Leonpa hinam qapariyninkupas,
malta leonkunapa hinam qapariyninkupas.
Qaparillawanñam mikunankutapas hapinku,
mana pipapas qechusqantam apakunku.
30Chay punchaw chayaramuptinmi,
chay nacionqa lamar qocha hinaraq Israelpa contranpi qaparinqa.
Pipas Israel nacionta qawarispanqa
tutayaypapas sasachakuypapas intuykusqantam qawarinqa.
Currently Selected:
Isaías 5: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012