Isaías 49
49
Tayta Diospa serviqninmanta
1Lamar qochapa patanpi nacionkuna,
karu llaqtapi kaq runakuna uyariychik:
Tayta Diosqa manaraqpas nacechkaptiymi qayawarqa,
mamaypa wiksanpi kachkaptiymi sutiyta rimarirqa.
2Simiytam ñawchiyaykachisqa espadata hina ruwarun,
makinpa llantuyninwanmi harkaykuwan.
Ñawchiy-ñawchiy flechata hinam ruwaruwan,
flechankuna waqaychananpim waqaychaykuwan.
3Hinaspanmi niwarqa: “Yaw, Israel llaqta, serviqniymi kanki,
qamnintakamam hatunchasqa kasaq”, nispa.
4Ñoqañataqmi nirqani:
“Yanqapaqmi llamkarqani,
mana imatapas haypanaypaqmi kallpayta usuchirqani”, nispay.
Ichaqa ima ruwasqaypas Tayta Diospa makinpim kachkan,
pagoypas paypa makinpim kachkan.
5Unanchawaqniy Tayta Diosmi
manaraq nacechkaptiy payta servinaypaq qayawarqa,
Jacobta payman kutirichinaypaqmi churawarqa,
Israel llaqtata payman huñunaypaqmi akllawarqa.
Tayta Diosmi hatunchaqniyqa,
Tayta Diosmi kallpanchaqniyqa.
6 #
Is 42.6; Lc 2.32; Hch 26.23. #
Hch 13.47. Tayta Diosmi kaynata nin:
“Manam serviqllaychu kanaykiqa,
manam Jacobpa mirayninkunata hatarichimuqllachu kanaykiqa,
manam Israelmanta puchuqkunata kutirichimuqllachu kanaykiqa;
Aswanqa lliw nacionkunata kancharinaykipaqmi churasqayki,
chaynapi kay allpa pachaman salvacionniyta chayachinaykipaq”, nispa.
7Israelta libraq Tayta Diosmi nin,
Israelpa chuya Diosninmi nin,
wakin runakunapa usuchisqan runata,
nacionkunapa cheqnisqan runata,
kamachikuqkunapa serviqninmanmi nin:
Reykunawan kamachikuqkunam qawasuspayki
sayarispanku qayllaykipi kumuykunqaku.
Chaynataqa ruwanqaku Israelpa ñoqa Tayta Diosnin akllaqniki kasqayraykum.
Jerusalenta musoqmanta hatarichinankumanta
8 # 2 Co 6.2. Tayta Diosmi kaynata nin:
Allin punchawkuna kachkaptillanraqmi uyariykuyki,
salvanay punchawpim yanapaykuyki.
Waqaychaspaymi llaqtakunawan qamnintakama pactota ruwanaypaq churasqayki,
chaynapi tuñisqa llaqtakunata hatarichinaykipaq,
purmachisqa allpakunata hapispa rakinaykipaq,
9presokunatapas: “Lloqsiychik kacharisqam kankichik”, ninaykipaq;
Tutayaypi tarikuqkunatapas: “Qawachikuychikña”, ninaykipaq.
Ñankunapim mikunankupaq pastota tarinqaku,
chunniq orqokunapim pastota tarinqaku,
sumaq michisqam kanqaku.
10 #
Ap 7.16-17. Manam yarqachikunqakuchu,
nitaqmi yakunayachikunqakuchu,
intipa rupayninpas manam ñakarichinqachu;
kuyapayaspaymi paykunata pusasaq,
pukyumanta lloqsiq yakupa kasqanmanmi pusasaq.
11Orqonkunatam ñanta ruwasaq,
hatun ñankunatam allichasaq.
12Qawariychik, karukunamantaraqmi hamuchkanku:
Wakinmi norte lawmanta,
wakinmi intipa seqaykunan lawmanta,
wakinkunañataqmi Sinim lawmanta.
13¡Cielokuna, kusikuymanta qapariychik!
¡allpa pacha, anchata kusikuy!
¡orqokuna, kusikuymanta takiychik!
Tayta Diosmi llaqtanta consuelaykun,
ñakariypi kachkaptinkum kuyapayariykun.
14Sión llaqtam kaynata nin:
Tayta Diosmi saqeruwan,
Señor Diosmi qonqaruwan, nispa.
15Tayta Diosñataqmi kaynata nin:
¿Yaqachu ñuñusqan wawata maman qonqarunman?
¿Yaqachu wachakusqan wawata maman qepancharunman?
Ichapas mamanqa wawanta qonqarunman,
ñoqam ichaqa mana qonqasqaykichikchu.
16Sutikitapas maki pampaypi qellqasqatam apaykachani,
perqaykikunatapas sapa punchawmi ñawpaqniypi kachkan.
17Kaqllamanta hatarichisuqnikim chaylla hamuchkanku,
Tuñichispa purmachiqnikikunam ripunqaku.
18Muyuriqnikita qawariy,
lliw huñunakuruspam qanman hamuchkanku.
Ñoqa Tayta Diosmi kikiyrayku jurani,
llapallanwanmi alhajawan hina llusikunki,
noviapa churakunan alhajakunawan hinam churakunki.
19Llaqtaykiqa tuñichisqa, chunnichisqa hinaspa purmachisqa kachkaspapas,
achkallaña runayuqmi kanqa,
ñakarichisuqnikikunapas qanmanta karunchasqam kanqa.
20Chinkasqapaqña hapisqayki wawaykikunam rinrikipi nisunki:
“Ñoqaykupaqa kay allpaqa kichkillañam,
ñoqaykumanta rakikuy sapallayku yachanaykupaq”, nispa.
21Chaymi sonqoykipi kaynata ninki:
“¿Pitaq ñoqapaq kaykunata wachakurqa?
Ñoqaqa mana wawayuq qolluqmi karqani,
qarqosqa hinaspa preso apasqam karqani.
¿Pitaq kaykunata qespichirqa?
ñoqaqa sapallayñam qeparurqani,
¿maypitaq paykunaqa karqaku?”, nispa.
22Tayta Diosmi kaynata nin:
Makiywan señaschaspam nacionkunata qayasaq,
banderata hoqarispam llaqtakunata qayasaq,
hinaptinmi qari churikikunata marqaypi apamunqaku,
warmi churikikunatapas hombropim apamunqaku.
23Reykunam yachachisuqniki kanqa,
reinakunam mamayki ranti uywasuqniki kanqa,
ñawpaqnikipim kumukuykuspa qonqoranqaku,
chakikipi allpatam llaqwanqaku.
Chaynapim Tayta Dios kasqayta reqsiwanki,
ñoqapi hapipakuspa suyaqkunaqa manam penqaypichu kanqaku.
24¿Yaqachu allinnin qari-qari soldadomanta guerrapi hapikusqanta qechurunmanku?
¿yaqachu apaqnin allinnin qari-qari soldadomanta huk preso lluptirunman?
25Tayta Diosmi kaynata nin:
Ichapas presokunataqa allinnin qari-qari soldadomanta qechurunmanku,
cheqaptam guerrapi hapikusqantapas manchakuypaq soldadomanta qechurunmanku,
Ñoqam ichaqa nanachikusqayki,
churikikunatapas salvasaqmi.
26Ñakarichisuqnikikunatam kikinkupa aychanta mikuchisaq,
kikinkupa yawarninwanmi vinowan hina sinkachisaq,
chaymi llapa runakuna Salvaqniki Tayta Dios kasqayta reqsinqaku,
Jacobpa Atiyniyuq Diosnin kasqaytam reqsinqaku,
libraqnikiqa ñoqa Dios kasqaytam yachanqaku.
Currently Selected:
Isaías 49: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012