Isaías 48
48
Israel runakuna mana kasukuq kasqankumanta
1Jacobpa mirayninkuna,
Judapa mirayninkuna kachkaspa Israelwan sutichakuqkuna,
Tayta Diospa sutinpi juraqkuna,
Israelpa Diosninta mañakuqkuna,
mana cheqapta rimaspa mana allin ruwaqkuna;
2“Tayta Diospa sapaqchasqa llaqtanmi kaniku” niqkuna,
Israelpa Tukuy Atiyniyuq Diosninpi hapipakuq tukuqkuna,
kayta uyariychik:
3Tukuy ima pasakusqantaqa ñawpaqtaraqmi willarqaykichik,
rimarispaymi lliwman yachayta qorqani,
imapas rimasqayman hinam ruwasqa karqa.
4Llumpay rumi sonqo kasqaykita yachaspaymi,
matankaykipas fierro hina kasqanta yachaspaymi,
umaykipas bronce hina kasqanta qawaspaymi,
5ñoqaqa ñawpaqmantaraq nirqaykiña,
manaraq imapas kachkaptinmi willarqaykiña;
chaynaqa manam niwaqchu:
“Idoloykunam chaykunataqa ruwarun,
llaqllasqa idoloykunam chaykunataqa ruwarun,
chulluchispa ruwakusqay idoloymi chaykunataqa ruwarun”, nispaqa.
6Tukuy chaykunata uyarichkaspa chaynataq rikuchkaspachu,
¿chaykunaqa cheqap kasqanta mana willakunki?
Kunanmi musoq kaqkunata uyariykachiki,
mana yachasqayki pakasqa kaqkunatam uyariykachiki.
7Kunan punchawkunallapi unanchasqakunatam uyariykachiki,
kunankama manaraq uyarisqayki kaqkunatam uyariykachiki.
Chaynaqa, manam niwaqchu: “Yacharqaniñam” nispaqa.
8Mana uyarikuq kasqaykiraykum
chaykunataqa mana uyarirqankichu,
nitaq yacharqankichu,
Reqsikim pasaypaq iskay uya kasqaykita,
nacesqaykimantapuni mana kasukuq kasqaykita.
9Kikiyraykum piñakuyniyta sonqollaypi pakaykurqani,
hatunchasqa kanayraykum manaraq tukururqaykichu.
10Ñoqam qamtaqa chuyancharqayki,
ichaqa manam qollqeta chulluchichkaq hinachu,
aswanqa ñakariy hornopim chuyancharqayki.
11Kikiyraykum chaykunataqa ruwasaq,
sutiytaqa manam pipas qachachanmanchu,
ñoqa hina hatunchasqaqa manam pipas kanmanchu.
Israelta Tayta Dios librananmanta
12 #
Is 44.6; Ap 1.17; 22.13. Jacobpa mirayninkuna uyariwaychik,
akllakusqay Israel llaqta, uyariway:
Ñoqa sapallaymi Diosqa kani,
ñoqallam kani punta kaqpas, qepa kaqpas.
13Makiywanmi kay pachata takyachirqani,
atiyniywanmi cielokunata mastarirqani,
qayaykuptillaymi chaykunaqa paqarimurqaku.
14Chaynaqa, israelpa mirayninkuna,
huñunakuspa uyariwaychik:
¿Mayqannin idolotaq kaykunata willakurqa?
Ñoqa Tayta Diospa kuyasqay rey Cirom
Babiloniawan chaynallataq Caldea nacionwan munasqayta ruwanqa.
15Rey Cirotaqa ñoqam rimapayarqani,
qayaykuspaymi pusamurqani;
chaynaqa maylawman rispapas
allin chaninchasqam kanqa.
16Ñoqaman asuykamuspa uyariwaychik:
Qallariyninmantapas manam pakasqapichu rimarqani,
tukuy chaykuna pasakuptinpas chaypim karqani.
Tayta Diosmi kunan kachamuwarqa,
Espiritunwanmi huntaykuwarqa.
17Reclamaqniki Tayta Diosmi,
Israelpa Chuya Diosninmi kaynata nin:
Ñoqaqa Diosnikim kani,
allinnikipaq yachachiqnikim kani,
maynin purinayki qawachiqnikim kani.
18Sichum kamachikuyniykunata uyariptikiqa,
hawkayaynikipas mayu hinaraqmi kanman karqa,
allin ruwaynikipas lamar qochapa olankuna hinaraqmi kanman karqa.
19Miraynikikunapas manaña yupay atinam kanman karqa,
lamar qochapi aqo hinañam kanman karqa,
sutinpas manam chinkachisqachu kanman karqa,
qayllaymantapas manam chinkachisqachu kanman karqa.
20 #
Ap 18.4. Babilonia llaqtamanta lloqsiychik,
Caldea nacionpa chawpinmanta ayqeychik,
kusikuywan qaparispa willakamuychik,
kay pachapa tukupayninkama kaynata uyarichimuychik:
“Tayta Diosmi serviqnin Jacobta libraykun”, nispa.
21Paykunataqa chunniqninta pusaspapas
manam yakumantaqa ñakarichirqachu;
qaqamantam yakuta toqyachirqa,
raqchita kicharispam achka yakuta lloqsichimurqa.
22 #
Is 57.21. Mana allin ruwaqkunapaqmi ichaqa
mana hawkayay kanchu,
Tayta Diosmi chaynata nin.
Currently Selected:
Isaías 48: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012