Isaías 40
40
Jerusalenta Tayta Dios consuelananmanta
1Yupaychasqaykichik Tayta Diosmi kaynata nin:
Llaqtayta consuelaychik,
runaykunata kallpanchaychik.
2Jerusalenpi runaykunata kuyakuywan rimapayaychik,
huchankuta Tayta Dios pampachasqantaña,
huchankurayku criado kaspa ñakariyninku tukurusqantaña,
qaparispa paykunaman willaychik.
3 #
Mt 3.3; Mr 1.3; Jn 1.23. Huk qayakuymi purunpi uyarikun kayna niq:
“Tayta Diospa ñanninta allichaychik,
Diosninchikpaq purunpi ñanta allichaychik.
4Wayqokunata pampayachiychik,
orqokunatawan moqokunata pampayachiychik,
qenqo ñankunata derechaychik,
qachya ñankunata pampayachiychik.
5 #
Lc 3.4-6. Hinaptinmi atiyninta Tayta Dios qawachikunqa,
llapallan runakunam chayta rikunqaku”.
Tayta Diosmi chaynata nin.
6Qayakuymi uyarikurqa kayna niq:
¡Qayaykachakuy! nispa.
Hinaptinmi tapurqani:
¿Imanispaytaq qayaykachakusaq? nispa.
Chaymi niwarqa:
Llapa runakunaqa qora hinallam,
kuyayllapaq kayninkupas wayta hinallam.
7Tayta Dios wayrachimuptinqa,
qorapas qawirunmi,
waytapas chakirunmi.
Cheqaptapunipas runakunaqa qora hinallam.
8 #
Stg 1.10-11; 1 Pe 1.24-25. Qoraqa chakiruqllam,
waytapas wichiruqllam,
Diosninchikpa palabranmi ichaqa
wiña-wiñaypaq takyan.
9Sionpi yachaqkuna,
orqoman qespispa qapariychik;
Jerusalenpi yachaqkuna,
kay sumaq willakuyta hatunmanta qaparispa willakuychik;
ama manchakuspa Judá nacionpi llaqtakunaman kaynata willakuychik:
¡Diosninchikqa kaypim kachkan! nispa.
10 #
Is 62.11; Ap 22.12. Tayta Diosqa atiywanmi hamuchkan,
atiyninwanmi tukuy imapi munaychakuchkan,
libramusqan llaqtantam pusamuchkan.
11Ovejankunata michinanpaqmi hamunqa,
uñachankunatam marqayninpi apanqa,
chayllaraq wachakuq ovejakunatam allillamanta pusanqa.
Tayta Diospa ancha munayniyuq kasqanmanta
12¿Pitaq lamarpi yakukunata putqoyninwan tupurqa?
¿Pitaq hanaq pachata cuartanwan tupurqa?
¿Pitaq kay pachapi ñutu allpata tupurqa?
¿Pitaq orqokunata romananwan pesarqa?
¿Pitaq moqokunata balanzanwan pesarqa?
13 #
Ro 11.34; 1 Co 2.16. ¿Pitaq Tayta Diospa yuyaymanayninta yachanman?
¿Pitaq payta umacharqa?
14¿Diosqa pimantataq yachayta mañakurqa?
¿Pitaq mana pimanpas sayapakuspa allin arreglo ruwayta yachachirqa?
¿Pitaq payman yachayta qorqa?
¿Pitaq yachayniyuq kananpaq yachayta reqsichirqa?
15Nacionkunapas paypaqqa huk sutuy yaku hinallam,
balanzapi ñutu allpa hinallam,
Lamar qochapi islakunapas ñutu allpa hinallam.
16Líbano montekunapi animalkunapas
manam kamanmanchu payman ofrecenapaqqa,
Líbano montekunapi sachakunapas
manam kamanmanchu ofrenda kañapunapaqqa.
17Llapallan nacionkunapas
mana kaq hinallam paypa qayllanpiqa,
lliw nacionkunapas mana ima valeqmi paypa qayllanpiqa.
18¿Piwantaq Tayta Diosta rikchanachiwaqchik?
¿Imaman rikchakuqtataq payta ruwawaqchik?
19Idolota ruwaqmi metalta chulluchispa idolota ruwarun,
alhajakuna ruwaqñataqmi qoriwan llusirun;
qollqeta chulluchispam cadenata ruwarun.
20Wakcha runañataqmi mana ismuq kulluta akllarun,
hinaspam allin llaqllaqwan mana kuyuriq idolota ruwarachikun.
21¿Manachu yacharqankichik?
¿Manachu uyarirqankichik?
¿Manachu qallariyninmantapuni pipas willasurqankichik?
¿Manachu kay pacha unanchasqa kasqanmantaraq yachachisurqankichik?
22Tayta Diosqa kay pachapa muyuriq patanpim tiyachkan,
runakunapas aqaruwaykuna hinallam paypa qayllanpiqa;
cielokunatapas tolderata hinallam payqa mastarin,
yachanapaq sayachisqa carpata hina.
23Payqa mana kaqmanmi churan hatun tukuq runakunataqa,
kay pachapi kamachikuqkunatapas mana imapaq valeqtam ruwan.
24Paykunaqa chayraq wiñamuq sachakuna hinam,
tarpuruptinku chayllaraq sapichakuchkaq hinam.
Wayra pukurimuptinmi lliw chakirunku,
sinchi wayrapa apasqan qopa hinallam paykunaqa chinkarunku.
25Chuya Diosmi kaynata tapukun:
¿Piwantaq rikchanachiwankichikman?
¿Pitaq ñoqaman rikchakuq kanman? nispa.
26Hanaq pachata qawariychik,
¿Pitaq wakkunata unancharqa?
Chaskakunata tropata hina yupaspa hurqomuqmi,
sapakamata sutinmanta qayaqmi,
chulla chaskapas mana chinkachiqmi.
Paypaqqa atiyninpas kallpanpas ancha hatunmi.
27Jacobpa miraynin Israel llaqta,
¿Imanasqataq quejakuspa kaynata rimapakunki:
Tayta Diosqa manam imayna kawsasqaytapas qawarinchu,
nitaqmi ñoqamantaqa nanachikunchu, nispayki?
28¿Manachu yacharqanki?
¿Manachu uyarirqanki?
Tayta Diosqa wiña-wiñaypaq kawsaq Diosmi,
payqa kay pachata unanchaqmi,
manam hukmanyanchu nitaqmi pisipanchu,
yachayninpas mana haypay atinam.
29Paymi pisipasqakunata kallpanchan,
pisi kallpayuqkunamanmi kallpata yapan.
30Jovenkunam pisipaspa wañunayanku,
kallpasapakunam hukmanyaspa wichinku.
31Tayta Diosman hapipakuqkunam ichaqa
musoq kallpayuq kanqaku,
anka hinaraqmi pawarinqaku,
kallpaspankupas manam saykunqakuchu,
purispankupas manam pisipanqakuchu.
Currently Selected:
Isaías 40: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012