Isaías 32
32
Allin kamachikuq reymanta
1Mana pimanpas sayapakuspa munaychakuq reymi kanqa,
kamachikuypi yanapaqninkunapas lliwpaqmi allinkunallata ruwanqa.
2Paykunam sapakama wayramanta harkachikuna hina kanqaku,
loco wayra-paramanta harkachikuna hinam kanqaku,
chaki allpapi mayukuna hinam kanqaku,
sinchi rupaypi qaqapa llantuynin hinam kanqaku.
3Ñawinkutapas allinta kicharispam qawanqaku,
rinrinkutapas allinta kicharispam uyarinqaku.
4Llutanpi ruwaqkunapas yachaywanñam imatapas ruwanqaku.
Wata-wata rimaqkunapas sumaqtañam rimanqaku.
5Millay runataqa manañam
“allin runam payqa” ninqakuñachu,
Yanqa rimaq runataq manañam
“allin reqsisqa runam payqa” ninqakuñachu.
6Qacha sonqo runaqa chayna kayninman hinam riman,
huchakuna ruwananpaqmi sonqonpi yuyaymanan,
Tayta Diospa contranpim mana allinkunallata riman;
yarqasqakunaman mana mikuy qoykuqmi,
yakunayasqakunaman mana yaku qoykuqmi.
7Millay runaqa mana allinkunallatam ruwan,
payqa mana allinkunallatam tantean,
chaykunawanmi wakchakunata astawan tuñichin;
mana piniyuq runapa allin arreglo mañakusqantam
llullakunawan hukmanyachin.
8Allin runam ichaqa allinkunallata ruwan,
chayraykum payqa hapipakunapaq hina.
Mana allin warmikunata qaqchasqanmanta
9Mana ima llakiyuq warmikuna hatariychik,
kay nisqayta uyariychik,
kikillaykichikpi hapipakuq warmikuna,
qamkunaman nisqayta uyariychik.
10Hawkalla kakuq warmikuna,
kaymanta wata masninmanmi manchakuymanta katkatatankichik.
Uvas pallaymi qollurunqa,
cosechapas manañam kanqañachu.
11Mana llakiyuq warmikuna katkatataychik,
hawkallaña kakuq warmikuna
manchakuymanta hukmanyaychik.
Pachaykichikta lluschukuspa qachqa pachawan churakuychik.
12Sumaqllaña kawsay ruruq chakrakunamanta,
sumaqllaña uvas ruruq chakrakunamanta,
qasqoykichikta takakuspa qaparkachaychik.
13Runaykunapa allpanpipas,
kusikuypa kanan wasikunapipas,
pukllakuypa kanan llaqta ukupipas,
kichkakunawan qorakunallañam wiñanqa.
14Palaciopas chunninqam,
achkallaña runayuq llaqtapas chunninqam,
mana yaykuy atina murallankunawan torrenkunapas wiñaypaq saqesqam kanqa;
chaypiqa monte asnokunallañam kusisqa yachanqaku,
uywakunallañam chaypiqa mikunqaku.
15Chaynaqa, kanqa
hanaq pachamanta Diospa Espiritun ñoqanchikman hamunankamam.
Hinaptinmi mana imapa qespinan chaki allpapas,
lliw kawsaypa qespinanmanña tikrakunqa;
tukuy imapa qespinan allpañataqmi
aswan allintaraq rurunqa.
16Chay nacionpiqa mana pimanpas sayapakuywan,
allin kaqkuna ruwayllañam munaychakunqa.
17Allinkuna ruwaymi hawkayaytawan,
hawka samakuyta hinaspa hawka kawsakuyta,
wiña-wiñaypaq rurunqa.
18Chaymi llaqtayqa waqaychasqa wasikunapi hawkalla yachakunqaku,
mana pipapas ima nisqanmi hawkalla yachanqaku.
19Montepi sachakunata runtu para tukuruptinpas,
llaqtata pampata hinaña ruwaruptinpas,
20ancha kusisqam qamkunaqa kankichik,
achkallaña yakuyuq chakrakunapim tarpunkichik,
toroykichikwan asnoykichikpas
kacharisqam allin pastopi mikunqaku.
Currently Selected:
Isaías 32: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012