Isaías 3
3
Judawan Jerusalén castigasqa kanankumanta
1¡Allinta qawarikuychik!
Tukuy Atiyniyuq Tayta Diosmi
Jerusalén llaqtamanta chaynataq Judá nacionmanta,
mikuy apamuqninkunata qechunqa;
qechunqataqmi tantatawan yakutapas.
2Tayta Diosmi chinkachinqa
qari-qari runakunatawan guerrapi peleaqkunata,
juezkunatawan profetakunata,
qatipaqkunatawan ancianokunata;
3capitankunatawan ancha reqsisqa runakunata,
consejaqkunatawan sumaq obra ruwakunata,
suerte tikraqkunatawan layqakunatapas.
4Paykunapa rantinpim Tayta Diosqa
jovenkunataña churanqa kamachikunankupaq,
warmakunatañataq munaychakunankupaq.
5Runakunam kikinkupura ñakarichinakunqaku,
reqsinakuqpurapas cheqninakunqakum,
warmakunam yuyaqkunapa contranpi hatarinqaku;
usuq runakunam ancha reqsisqa runakunapa contranpi hatarinqaku.
6Chayna kaptinmi wawqellanta hapiruspan hukkaq runa ninqa:
“Qampaqa pachayki kachkanraqmi
chaynaqa kamachiwayku,
qamyá kay purmachisqa llaqtapi kamachikuy”, nispa.
7Payñataqmi hapiqninta ninqa:
“Qamkuna nanachikuytaqa manam atiymanchu,
wasiypiqa mikunaypas, pachaypas manam kanchu,
runakunata kamachinaypaqqa ama churawaychikchu”, nispa.
8Jerusalén llaqtam tuñirun,
Judá nacionmi purmarun;
chaynaqa tarikun llapa runankuna
rimayninkuwanpas ruwayninkuwanpas huchallikuspanku,
Tayta Diosta piñachisqankuraykum.
9Qara uya kayninkum paykunataqa acusachkan,
Sodoma llaqtapa hinam huchanku sutillata qawakuchkan.
¡Imaynaraq kanqaku!
kikillankum sasachakuykunata maskakurunku.
10Allin ruwaqkunatayá niychik: Allinmi kasunki,
allinkuna ruwasqaykimantam mikunki, nispa.
11¡Imaynaraq kanqaku mana allin ruwaqkuna!
Mana allin ruwasqankunaman hinam Dios pagapunqa.
12Llaqtaytaqa warmakunallam ñakarichichkan,
warmikunañam munaychakuchkan.
¡Ay, llaqtalláy!
Kamachisuqnikikunam pantaypi kawsachisuchkanki,
kawsakuynikitapas pantaymanmi qewirunku.
13Tayta Diosqa chayllam kachkan llaqtanta juzgananpaq.
14Tayta Diosmi llaqtanpi ancianokunawan
chaynataq kamachikuqkunawan juicioman yaykuspan ninqa:
Qamkunaqa llaqtaytam chaqorunkichik,
wakchakunamanta suwakusqaykichiktam
wasikichikpiraq pakarunkichik.
15Tukuy Atiyniyuq Tayta Diosmi kaynata nin:
¿Imata munaspataq llaqtayta ñakarichinkichik,
hinaspa wakchakunatañataq usuchinkichik? nispa.
Jerusalenpi warmikunata castigananmanta
16Tayta Diosmi kaynata nin:
Sión llaqtapi hatun tukuq warmikuna,
umankuta altoman hoqarisparaq puriqkuna,
ñawinkuwan engañananpaq qawaqkuna,
ñutuchallamanta puriq qewillirakuna,
chakinkupi adornokunata sallsallyachistin puriqkuna,
17Ñoqa Tayta Dios castigaspaymi
paykunapa uma puyukninta isuyachisaq,
chay warmikunapa penqayninkutam runakunaman qawachisaq.
18Chay punchawmi Tayta Dios chinkachinqa:
Chakipi sallsallyaq adornokunata,
llullu killaman rikchakuq collarkunata,
19aretekunata, brazaletekunata, velokunata,
20uma wankukunata, chakipi alhajakunata,
weqaw watana adornokunata,
perfumekunata, amparokunata,
21anillokunata, senqapi aretekunata,
22suma-sumaq fiesta pachakunata,
carterakunata, capakunata, uma sukutakunata,
23espejokunata, linomanta fino pachakunata,
uma wanki adornokunata,
chaynataq mantillakunatapas.
Tukuy chaykunatam chinkachinqa.
24Chaynapim perfumepa rantinpi
millakuypaq asnayña kanqa,
weqaw watana adornokunapa rantinpim waskaña kanqa,
sumaqllaña ñaqchasqa kanankumantam
umankupas paqlayasqaña kanqa,
suma-sumaq pachankupa rantinpim
qachqa pachaña kanqa,
kuyayllapaq uyankupas
caldeasqa fierrowan marcasqañam kanqa.
25Runaykikunam guerrapi wañunqaku,
qari-qari soldadoykikunam peleasqankupi wañunqaku.
26Llaqtapi runakunam waqaspa lutokunqaku,
saqesqa warmi hinam allpapi tiyanqaku.
Currently Selected:
Isaías 3: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012