Isaías 26
26
Judá nacionpa vencesqanmanta taki
1Chay tiempopim, Judá nacionpi kay takita takinqaku:
Allin takyasqa llaqtam kapuwachkanchik,
salvawanakupaqmi perqakunatawan torrekunata Tayta Dios hatarirachin.
2Punkuta kichaychik,
allin ruwaq runakuna yaykunanpaq,
Tayta Diospi hapipakuq nación pasananpaq.
3Dios Taytalláy,
qamllapi tukuy sonqonwan hapipakuspa mana iskayrayaq runatam
qamqa hawkallata waqaychanki.
4Diosllapiyá wiña-wiñaypaq hapipakuychik,
wiña-wiñaypaq waqaychaqninchik kasqanrayku.
5Paymi alto-altopi yachaq runakunata wichichin,
hatun tukuq llaqtakunatam penqayman churan,
chayna llaqtakunataqa allpatapas akunankukamaraqmi tuñirachin.
6Ñakarichisqa runakunawan
wakchakunam paykunataqa sarunqaku.
7Allin ruwaq runapa ñanninqa mana pantayniyuqmi,
qamqa ñannintapas aswanraqmi allichaykunki.
8Dios Taytallayku, kamachikuynikiman hina kawsaspam
qamllapi sunita sayaniku,
qanmanta yuyarispam sonqoykupi yuyaymanayta munaniku.
9Tutakunapas qamllapim yuyaymanani,
kawsanaykamaqa tuta punchawmi maskasqayki.
Allinta ruwaspa munaychakuptikim
kay pachapi yachaqkunaqa allin ruwayta yachanqaku.
10Mana allin ruwaq runakunaqa llakipayaptikipas
manam allin ruwaytaqa yachankuchu;
kasukuq runakuna qaylla kawsaspapas
hina mana allin ruwaqkunallam,
Tukuy Atiyniyuq kasqaykitapas
manam kaqpaqpas hapinkuchu.
11 #
Heb 10.27. Dios Taytallayku,
qamqa ñakarichinaykipaqmi chaylla kachkanki,
paykunam ichaqa mana musyakunkuchu,
llaqtaykita llumpay kuyasqaykita qawaspam penqaypi tarikunqaku.
Contraykipi kaqkuna ninawan kañasqa kachunku.
12Dios Taytallayku hawkallatam kawsachikuwankiku,
qamllam tukuy ruwayniykutapas ruwarunki.
13Dios Taytallayku,
sapaq runakunam munaychakuruwanku,
ichaqa qamllatam Señorniykupaq reqsikuykiku.
14Paykunaqa wañurunkuñam,
manañam kawsarimunqakuchu,
ñakarichispaykim paykunataqa wichirachinki,
manaña yuyarinankukamam chinkarachinki.
15Qanmi nacionpi runakunata mirarachinki,
alabasqa kanaykipaqmi mirarachinki,
allpakunapa linderonkunatam hatunyarachinki.
16Dios Taytallayku,
sasachakuypi kaspaykum maskaykiku,
ñakarichiwaptikikum mañakuykiku.
17Imaynam wiksayuq warmi
wachakunan punchaw chayaramuptin
nanaywan qaparkachasqanta hinam,
ñawpaqnikipi ñoqaykupas qaparkachaniku.
18Wiksayakuruspam nanaywan wachakurqaniku,
ichaqa wayrallatam wachakurqaniku,
llaqtamanpas manam salvacionta apamuyta atirqanikuchu,
kay pachapi yachanankupaqpas manataqmi nacenqakuchu.
19Qampi wañukuqkunam kawsarinqaku,
ayaykikunam hatarimunqaku.
Allpa ukunpi kaqkunam rikcharimuspa kusikuyllawanña qaparinqaku,
sullata hinaraq kanchaynikita chayachiptikim
wañuqkuna allpa ukumanta hatarimunqaku.
20Llaqtalláy, wasikichikman yaykuychik,
punkuykichikta wichqakamuspa chaypi pakakamuychik,
Diospa piñakuynin pasarunankama pakakamuychik.
21Tayta Diosqa maypim kasqanmantam lloqsimunqa,
paypa contranpi huchallikusqankuraykum
kay pachapi yachaqkunata castigananpaq hamunqa;
kay allpaqa manañam wañusqakunapa yawarninta pakanqañachu,
wañusqakunatapas manañam pakanqañachu.
Currently Selected:
Isaías 26: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012