Isaías 22
22
Jerusalén llaqtamanta
1Revelación chaskina qechwapa contranpim Isaías kaynata nirqa:
¿Imanarusunkichiktaq, imaynanpitaq wasi hawanman lliw qespirunkichik?
2¡Yaw, chaqwakuypa huntasqan llaqta,
kusikuyllapiña kawsaq llaqta!
Runaykikunaqa manam espadapichu nitaqmi guerrapichu wañurqaku.
3Kamachiqnikikunapas flechamanta lluptichkaspankum preso wichiykurqaku,
qamkuna ukupi allinnin qarikunapas karuman ayqechkaspankum lliw hapirachikurqaku.
4Chaymi nirqani: Ñoqamanta anchuychik,
llaqtayraykum sinchita waqachkani,
ama consuelawaychikchu.
5Tukuy Atiyniyuq Tayta Diosmi munarqa,
revelación chaskina qechwaman
kayna ñakariy chaqwa punchaw hamunanta,
llaqtapa murallankunata tuñichiptinku
orqokunapi uyarikunankama qaparinankuta.
6Elam tropakunam flechankuta hapiykunku,
carretankumanmi qespirunku,
caballonkumanmi sillakuykunku.
Kir lawpi tropakunam escudonkuta hapiykunku.
7Kuyayllapaq qechwaykikunam
carretakunapa huntasqan rikurirun,
sillada tropakunam llaqtapa punkullanpiña kachkanku.
8Judá nacionpa harkachikunanmi tuñirun.
Chay punchawmi, monte wasipi pakasqa armakunata qawarqankichik. 9Rey “Davidpa Llaqtanpi” murallakuna raqrallaña kasqantapas rikurqankichikmi, uray law estanquepi yakutapas qocharachirqankichikmi. 10Jerusalén llaqtapi wasikunatapas yupaspam tuñichirqankichik, chaykunawan llaqta muyuriq perqakunata allichanaykichikpaq. 11Iskay murallakunapa chawpinpim estanqueta ruwarqankichik, chaytaqa ruwarqankichik ñawpaq estanquemanta hamuq yaku qochananpaqmi. Chaywanpas Diostaqa manam kaqpaqpas hapirqankichikchu, nitaqmi ñawpaqmantaraq tanteaq kasqantapas qawarqankichikchu.
12Chayraykum Tukuy Atiyniyuq Tayta Dios chay punchawpi qayasurqankichik,
umaykichikta rutukuruspa luto pachawan pachakuspa waqanaykichikpaq.
13 # 1 Co 15.32. Ichaqa kusikuyllawanñam fiestakunataraq ruwakunkichik,
torokunatawan carnerokunata nakakuspam
aycha mikukuypi hinaspa vino upyakuypi kakunkichik.
Chaywanpas ninkichikraqmi: “Mikukusun, upyakusun, paqarinmi wañukusun” nisparaq.
14Tukuy Atiyniyuq Tayta Diosmi rinrillaypi kaynata niykuwarqa:
Kay mana allin ruwasqaykichikmantaqa manapunim pampachasqaykichikchu,
huchaykichikpim wañunkichikpas, nispa.
Tukuy Atiyniyuq Tayta Diosmi chaynata nin.
Palaciopi mayordomo Sebna wañunanmanta
15Tukuy Atiyniyuq Tayta Diosmi kaynata niwarqa: Palacioman rispa mayordomo Sebnata kaynata nimuy:
16¿Imatataq kaypi ruwachkanki?
¿Pitataq mañakurqanki sepulturaykita kaypi uchkukunaykipaq?
¿Pitaq nisurqanki kay qaqa uchkupi waqtapanaykipaq?
17Diosqa imatapas wischuchkaq hinaraqmi karuman wischurusunki,
kallpasapa runa hinaraqmi yusuysigota wikaparusunki.
18Wankusqa kururta hina karupi hatun llaqtakama chamqarusuptikim chaypi wañumunki,
alabakunayki carretakunapas chaypim tukunqa,
patronnikipa ayllunpaqmi hatun penqay kanki.
19Maymi kasqaykimantam hurqorusqayki,
maymi llamkasqaykimantam qarqorusqayki.
20Chay punchawmi qayamusaq
Hilciaspa churin serviqniy Eliaquimta.
21Paytam pachaykiwan pachachispa
chumpikiwanñataq weqawninta watasaq,
paytañam churasaq qampa rantikipi kamachikunanpaq.
Chaynapim Jerusalenpi yachaqkunapaq
hinaspa Judá runakunapaq
taytanku hina kanqa.
22 #
Ap 3.7. Davidpa wasinpa llaventa hapiykachiptiymi,
paypa kichasqantaqa mana pipas wichqanqachu,
wichqasqantaqa manam pipas kichayta atinqachu.
23Payraykum taytanpa ayllun hatunchasqa kanqa.
Ñoqam perqapi estaca takasqata hina takyachisaq,
chaymi mana kuyuriq kanqa.
24Paymanmi taytanpa hinaspa ayllunkunapa llapa ima kapuqnintapas,
taksanmanta hatunninkama warkunqaku.
25Tukuy Atiyniyuq Tayta Diosmi nin:
Chay tiempopim perqaman takasqa estaca chutakaramunqa,
pakikuruspam wichiykamunqa,
hinaptinmi llapallan chaypi warkusqanku kaqkuna lliw ñutukurunqa,
Tayta Diosmi chaynata nin.
Currently Selected:
Isaías 22: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012