Génesis 46
46
Egiptoman Jacob risqanmanta
1Israelmi tukuy kapuqnintin ripukurqa. Beersebaman chayaruspanmi animalkunata wañuchispa taytan Isaacpa Diosninman ofrecerqa. 2Chay tutam Israelta mosqoyninpi rimapayaspan Dios nirqa:
Jacob, Jacob, nispan.
Payñataqmi nirqa:
Kaypim kachkani, nispa.
3Chaymi Dios nirqa:
Ñoqam kani Dios, taytaykipa Diosnin. Ama manchakuychu Egipto nacionman riytaqa, chaypim hatun nacionta qanmanta hatarichisaq. 4Ñoqam qanwan kuska Egipto nacionman risaq. Ñoqataqmi kutichimusqaykipas, Joseypa qayllanpim wañukunkipas, nispa.
5Chaymi Beerseba llaqtamanta Jacob rirqa. Churinkunam taytanku Jacobta chaynataq wawakunatapas mamantinta Faraonpa apachimusqan carretakunapi aparqaku. 6#Hch 7.15.Jacobwan lliw mirayninkunam Canaán lawpi armasqanku animalkunata qatirikuspa Egipto nacionman ripukurqaku. 7Jacobmi Egipto nacionman rirqa, qaritapas warmitapas churinkunata, willkankunata hinaspa llapallan mirayninkunata pusarikuspan.
8Kaykunam Egipto nacionman riq Israel casta runakuna, otaq Jacobpa mirayninkuna:
Jacobpa piwi churinmi karqa Rubén. 9Rubenpa churinkunam karqa Hanoc, Falú, Hezrón hinaspa Carmi.
10Simeonpa churinkunam karqa: Jemuel, Jamín, Ohad, Jaquín, Zohar hinaspa Saúl. Saulqa karqa Canaán warmipa wawanmi.
11Leviypa churinkunam karqa: Gersón, Coat hinaspa Merari.
12Judapa churinkunam karqa: Er, Onán, Sela, Fares hinaspa Zara. Erwan Onanqa Canaán lawpim wañukurqaku. Farespañataqmi karqa Hezrón hinaspa Hamul.
13Isacarpa churinkunam karqa: Tola, Fúa, Job hinaspa Simrón.
14Zabulonpa churinkunam karqa: Sered, Elón hinaspa Jahleel.
15Paykunam Jacobpa warmin Leapa wachakusqan mirayninkuna, Padan-aram lawpi naceqkuna karqaku. Warmi churin Dinatawan yupaptinkum qaripas warmipas kimsa chunka kimsayuq karqaku.
16Gadpa churinkunam karqa: Zifión, Hagui, Ezbón, Suni, Eri, Arodi hinaspa Areli.
17Aserpa churinkunam karqa: Imna, Isúa, Isúi hinaspa Bería. Paninkuñataqmi karqa Sera. Beriapa churinkunam karqa Heber hinaspa Malquiel. 18Paykunam karqa Zilpapi Jacobpa mirayninkuna, Zilpatam Labán qorqa churin Leaman criadanpaq, paypa mirayninkunam chunka soqtayuq karqaku.
19Jacobpa warmin Raquelpa wawankunañataqmi karqa Joseywan Benjamín. 20#Gn 41.50-52.Joseypa churinkunam karqa: Manaseswan Efraín, On llaqtapi sacerdote Potifarpa churin Asenatpa wawankuna, Egipto nacionpi naceqkuna. 21Benjaminpa churinkunam karqa: Bela, Bequer, Asbel, Gera, Naamán, Ehi, Ros, Mupim, Hupim hinaspa Ard. 22Warmin Raquelpi Jacobpa mirayninkunam chunka tawayuq karqaku.
23Danpa churinmi karqa Husim.
24Neftaliypa churinkunam karqa: Jahzeel, Guni, Jezer hinaspa Silem. 25Paykunam Bilhapi Jacobpa mirayninkuna karqaku. Bilhatam Labán churin Raquelman criadanpaq qorqa, Bilhapa mirayninkunam karqa qanchis.
26Egipto nacionman Jacobwan riqkunam soqta chunka soqtayuq runakuna karqaku. Jacobpa churinkunapa warminkunam ichaqa mana yupasqachu karqa. 27#Hch 7.14.Joseypa churinkunam iskay karqa, paykunam Egiptopi nacerqaku. Jacobpa llapallan mirayninkunam, Egipto nacionman yaykuqkuna qanchis chunka runakuna karqaku.
28Jacobmi churin Judata Joseyman ñawpachirqa, chaynapi Gosén lawman hamuspa chaskinanpaq. Gosén lawman chayaruptinkum, 29carretanta hapispa José kallparqa taytan Israelta chaskinanpaq. Joseymi taytanwan tupaykuspan abrazakuykurqa, hinaspam unaysu waqakurqa. 30Chaymi Joseyta Israel nirqa:
Kayqaya kawsachkaqtaraq rikuykuyki, kunanqa wañukusaqñayá, nispa.
31Chaymantam wawqenkunatawan taytanpa ayllunkunata José nirqa:
Rispa rey Faraonman willamusaq: “Canaán lawpi kaq wawqeykunawan taytaypa ayllunkunam chayaramuwan. 32Paykunaqa oveja michiqkunam, chaymi ovejankuta, vacankuta hinaspa tukuy ima kapuqninkuta aparamunku” nispay. 33Rey Faraón qayasuspaykichik “¿ima oficioyuqtaq kankichik?” nispa tapusuptikichikqa, 34Kaynatam ninkichik: “Serviqnikikunaqa warma kasqaykumanta chaynataq ñawpaq taytaykumantapacham animalkuna michiqkunalla kaniku”, nispaykichik. Chaynapim Gosén lawpi yachankichik, Egipto runakunapaqqa millakuypaqmi kasqa oveja michiqkunawan kuskanchakuyqa.
Currently Selected:
Génesis 46: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012