Génesis 38
38
Tamarmantawan Judamanta
1Chay punchawkunapim, wawqenkunamanta Judá rakikuruspan Adulam llaqtayuq Hirapa wasinman ripukurqa. 2Chaypim Canaán law Súa sutiyuq runapa warmi churinta rikuruspan paywan casarakurqa. 3Chay warmim wiksayakuruspa qari wawata wachakururqa, hinaspam Erwan suticharqa. 4Huktawan wiksayakuruspam qari wawata wachakururqa, hinaspam Onanwan suticharqa.
5Quezib llaqtapi Judá kachkaptinmi, warmin kasqallan wiksayakuruspan qari wawata wachakururqa, hinaspam Selawan suticharqa.
6Piwi churin Ertam Tamarwan Judá casarachirqa. 7Ichaqa Judapa piwi churin Ermi, Diospa qayllanpi mana allinkuna ruwaq karqa, chayraykum Dios wañurachirqa. 8Hinaptinmi churin Onanta Judá nirqa:
Wawqekipa viudanwan casarakuy, cuñado hina debernikita cumpliy, chaynapi wawqekipa miraynin ama chinkananpaq, nispa.
9Chaymi Onán wawqenpa viudanwan puñuspa pampallaman sutuchiq, wawqenpa miraynin kananta mana munaspan. Payqa yacharqam wiksayakuruptinqa chay wawa wawqenpa mirayninña kananta. 10Onanpa chay ruwasqanmi Diospaq mana allinchu karqa, chaymi paytapas wañurachirqa. 11Hinaptinmi llumchuynin Tamarta Judá nirqa:
Hina viudallayá taytaykipa wasinpi yachamuchkay, churiy Sela hatunyanankama, nispa.
Chaynataqa nirqa: “Yanqañataq churiy Selapas wawqenkuna hina wañurunman” nispanmi. Chaymi Tamarqa taytanpaman ripukurqa.
12Punchawkuna risqanman hinam Judapa warmin, Súa sutiyuq runapa churin wañukurqa; chaymi Judá lutonta mudaruspan Timnat llaqtata ovejankuna rutuq rirqa. Paytam Adulam llaqtayuq amistadnin Hira riysirqa. 13Chaymi Tamarman willaykurqaku:
“Suegroykim Timnat llaqtaman ovejankuna rutuq richkan”, nispanku.
14Hinaptinmi Tamarqa viuda pachanta hurqokuruspan, mana reqsirunankupaq velowan tapakuykuspan, Enaim llaqtaman yaykunapi tiyarqa, Timnatman rina ñanpa patanpi. Tamarqa yacharqam cuñadon Sela yuyayniyuqña kasqanta, yacharqataqmi suegronqa prometikusqanman hina mana casarachisqantapas.
15Chaymi Judaqa Tamarta rikuruspan chuchumikapaq hapirqa, uyan tapasqa kasqanrayku. 16Chay warmiman asuykuspanmi Judá nirqa:
Qanwan puñuytam munani, nispan.
Chaynataqa nirqa llumchuynin kasqanta mana yachasqanraykum. Chay warmiñataqmi nirqa:
¿Imatataq qowanki ñoqawan puñuruspaykiqa? nispa.
17Judañataqmi nirqa:
Huk chivatochatam apachimusqayki, nispa.
Hinaptinmi warmiñataq nirqa:
Apachimuwanaykikamayá prendata saqeykuway, nispa.
18Chaymi Judá tapurqa:
¿Ima saqenaytataq munanki? nispa.
Tamarñataqmi nirqa:
Watuyuq selloykitawan tawnaykita saqeykuway, nispa.
Chaymi qoykuspan paywan puñuruptin Tamar wiksayakururqa. 19Chaymanta kutikuspanmi Tamarqa tapakusqan velonta hurqokuruspan viuda pachanwan huktawan pachakuykurqa.
20Judañataqmi Adulam llaqtayuq amistadninwan huk chivatochata apachirqa, chaynapi chay warmiman saqesqan sellonta chaynataq tawnanta mañapamunanpaq, ichaqa manam tarimurqachu. 21Hinaspam chay warmiwan tupasqan lugarpi runakunata kaynata tapukurqa:
¿Maypitaq ñanpa patanpi tiyaq Enaimpi chuchumika warmi kachkan? nispa.
Hinaptinmi paykunañataq nirqaku:
Manam kaypiqa kanchu ima chuchumika warmipas nispanku.
22Chaymi kutispan Judata Hira nirqa:
Manam tarimunichu, runakunata tapukuptiypas “kaypiqa manam ima chuchumika warmipas kanchu” nimuwankum, nispan.
23Hinaptinmi Judá nirqa:
Mana tarimuptikiqa hinañayá chay saqemusqayta apakuchun, ama pipas asipayawananchikpaq. Ñoqaqa kay chivatochatam apachirqayki, aswanqa manam tarimunkichu, nispa.
24Kimsa killa pasaruptinmi Judaman kaynata willaykurqaku:
Llumchuyniki Tamarmi huchapakuruspa wiksayuq rikurirun, nispanku.
Chaymi Judá nirqa:
Hurqomuspa kañaychik, nispa.
25Chaymi payta hurqomuchkaptinku suegronman kaynata nimunankupaq kacharqa:
“Kaykuna saqewaqniy runapatam wiksayakuruni. Chaynaqa, reqsiykuy ¿pipataq kay watuyuq sellowan tawna?”, nispa.
26Hinaptinmi Judá reqsikuruspan nirqa:
Ñoqam huchayuqqa kani, payqa mana huchayuqmi, churiy Selawan mana casarachisqayraykum kayta ruwakurun, nispa.
Chaymatapunim Tamarwanqa manaña puñurqañachu.
27Tamarpa wachakunan tiempo chayaramuptinmi awa kasqa. 28Wachakuptinmi huknin wawa makichanta hurqoramurqa, hinaptinmi partera hapiruspan puka qaytuwan watarurqa:
Kaymi puntata lloqsimurqa, nispan.
29Makinta kaq kutiykarachiptinmi huknin wawqen lloqsiramurqa puntata, hinaptinmi partera nirqa:
¿Imaynatataq lloqsiramunaykipaq kichakamurqanki? nispa.
Chaymi #38.29 Hebreo simipi Fares ninanqa “kichasqa” otaq “llikisqa” ninanmi.Fareswan suticharqa. 30Paypa qepantañam puka qaytuwan watuchasqa wawqen lloqsiramurqa, paytam Zarawan suticharqa.
Currently Selected:
Génesis 38: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012