Génesis 31
31
Jacob ayqekuyta munasqanmanta
1Jacobmi uyarirurqa Labanpa churinkuna imam rimasqankuta. Paykunam nirqaku: “Jacobqa taytanchikpa llapa kapuqninta hapikuykuspam apuyarun”, nispanku.
2Jacobqa qawarqataqmi Labanpa hukmanyarusqantawan manaña ñawpaq hina kasqantapas. 3Chaymi Jacobta Tayta Dios nirqa:
“Tayta-mamaykipa allpanman, aylluykikunapa kasqanman kutikuy, ñoqam qanwan kasaq”, nispa.
4Chaymi Raqueltawan Leata hatuspi animalkunawan kasqanman Jacob qayachirqa. 5Chaypim paykunata nirqa:
Taytaykichikmi hukmanyarun, manañam ñawpaqta hinañachu. Taytaypa Diosninmi ichaqa ñoqawan kachkan. 6Yachankichikmi taytaykichiktaqa llapallan kallpaywan servisqayta, 7taytaykichikmi ichaqa pagoytapas sapa kutilla cambiaspa engañawarqa, aswanqa Diosmi mana munarqachu mana allin ruwawananta. 8Taytaykichik Labanmi niwarqa:
“Cheqchikunam pagoyki kanqa”, nispa; chaymi llapallan animalkuna wachaq cheqchikunallata. “Allqakunam pagoyki kanqa” niwaptinñataqmi allqakunallata animalkuna wachaq.
9Chaynatam taytaykichikpa animalninkunata Tayta Dios qechuruspan ñoqaman qoykuwarqa.
10Ovejakunapa muyakusqan tiempopim mosqoyniypi rikurqani muyaq carnerokunaqa allqakuna, cheqchikuna hinaspa murukuna kasqanta. 11Chaymi mosqoyniypi Diospa angelnin sutiymanta qayawaptin nirqani: ¿Imata, taytáy? nispa. 12Payñataqmi niwarqa: “Muyaq carnerokunata qawariy. Llapallanmi allqakuna, cheqchikuna hinaspa murukuna. Labanpa tukuy mana allin ruwasusqaykitapas rikurqanim. 13#Gn 28.18-22.Ñoqam Bet-el lawpi rikuriqniki Dios kani. Chaypim rumiman aceiteta tallispayki prometikuwarqanki. Chaynaqa, kay llaqtamanta aylluykikunapa kasqanman kutiy”, nispa.
14Raquelwan Leañataqmi Jacobta nirqaku:
Taytaykupa wasinpiqa manañam imaykupas kanñachu 15ñoqaykumanta qollqe pagasqaykitapas lliwtañam tukurun, hinaspam ñoqaykutapas huklaw llaqtayuq warmikunata hinaña qawawachkanku. 16Taytaykumanta Diospa qechusqan tukuy imaqa ñoqaykupaqwan wawaykupaqmi. Chaynaqa, Diospa tukuy nisusqaykita ruway, nispa.
Jacobpa ripukusqanmanta
17Jacobmi warminkunatawan churinkunata camellokunaman sillaykachispan, 18Padan-aram lawpi llapallan animalkuna armasqanta qatirikuspa, Canaán lawpi taytan Isaacpa kasqanman kutikurqa. 19Labanñataqmi ovejankuna rutuq pasakuspa mana wasinpichu tarikurqa. Chaykamam Labanpa idolonkunata Raquel suwaramurqa. 20Aram casta Labantam Jacob engañarurqa upallalla ripukuspan. 21Jacobmi llapa imanta aparikuspa ripukurqa. Eufrates mayuta chimparuspam Galaad lawpi orqokunaman pasakurqa.
Jacobta Labán qatisqanmanta
22Jacob kimsa punchaw ripukusqan hawañam Labanman willaykurqaku. 23Chaymi Labán yacharuspan ayllunkunawan qatispanku qanchis punchawpiña Galaad law orqokunapi hayparurqaku. 24Hinaptinmi Aram casta Labanman chay tuta mosqoyninpi rikuriykuspan Dios nirqa:
Yanqataq Jacobta imatapas nichkawaq, nispa.
25Labanmi Jacobta hayparurqa carpankuna sayachisqan Galaad law orqokunapi, chaypim paypas ayllunkunapiwan carpankuta sayachirqaku. 26Chaymi Jacobta Labán nirqa: ¿Imanasqataq engañaruwanki? ¿Imanasqataq churiykunata guerramanta preso apachkaq hina aparamunki? 27¿Imanasqataq upallalla ayqeramurqanki? kaywanqa engañaruwankim. Willawankimanchiki karqa chaynapi takiwan, tinyawan, arpawan fiestata ruwaspa aviamunaypaq. 28Churiykunatapas nitaq willkaykunatapas mana muchaykuchkaptiymi ayqeramunki. Muspaypi hinam kaytaqa ruwaramunki.
29Chaynaqa, makillaypim kachkankichik imatapas ruwarunaypaq. Ichaqa taytaykipa Diosninmi chisi tuta mosqoyniypi niwarqa: “Yanqataq Jacobta imatapas niwaq”, nispa. 30Taytaykipa wasinman llumpayta kutiyta munaspaqa ¿imanasqataq diosniykunata suwaramuwarqanki? nispa.
31Jacobñataqmi nirqa:
Manchakuymi yaykuruwarqa churikikunata qechuruwanaykimanta. 32Pipas diosnikikunata suwakamuqqa wañuchun. Chaynaqa, ayllunchikkunapa qayllanpi maskakuruy, imaykikunatapas reqsikuspaqa apakuy, nispa.
Jacobqa manam yacharqachu Raquel suwakaramusqantaqa.
33Labanmi maskarqa Jacobpa carpanpi, Leapa carpanpi chaynataq iskaynin criadankunapa carpanpipas, ichaqa manam tarirqachu. Leapa carpanmanta lloqsiramuspam Raquelpa carpanman yaykurqa. 34Raquelñataqmi chay idolokunata camellokunapa monturan ukunman pakaruspa hawanpi tiyarurqa, chaynapim Labanqa mana tarirqachu. 35Hinaptinmi taytanta Raquel nirqa:
Taytáy, ama piñakuychu, manam hatariyta atiymanchu killaywanmi kachkani, nispa.
Chaymi Labanqa idolonkunata maskaspan mana tarirqachu. 36Jacobñataqmi piñakuspan Labanta kutipakurqa:
¿Ima mana allintataq ruwaruni? ¿Imataq huchay piñasqallaña qatimuwanaykipaqqa? 37Llapa imaykunata taqwiruchkaspaqa ¿imaykikunatataq tarirunki? Chaynaqa, ayllunchikkunapa qayllanman churamuy paykuna juzgawananchikpaq. 38Iskay chunka watam qanwan kuska karqani, ovejaykikunapas, cabraykikunapas manapunim sullurqachu, nitaqmi qampa kaqtaqa carneroykitapas mikurqanichu. 39Manataqmi purun animalkunapa puchuntapas apamurqaykichu, chinkaptinpas pagarqaykim, tuta otaq punchaw suwasqamantapas pagachikuwaqmi kanki.
40Punchawmi rupaypi ñakarirqani, tutanñataqmi chiripi ñakarirqani, puñuypas manam chayawarqachu. 41Chaynatam wasikipi iskay chunka wata karqani. Chunka tawayuq watam iskaynin churikikunamanta servirqayki, soqta watañataqmi animalnikikunamanta. Pagoytapas sapa kutillam cambiaruq kanki. 42Abrahampapas taytay Isaacpapas yupaychasqanku Dios ñoqawan mana kaptinqa lliwtachiki qechuruwankiman karqa. Ichaqa Diosmi ñakariywan llamkasqayta rikurqa, chaymi chisi tuta qaqchasurqanki, nispa.
Labanwan Jacob contratota ruwasqankumanta
43Jacobtam Labán nirqa:
Kay warmikunaqa ñoqapa churiykunam, kay qari wawakunapas ñoqapa willkaykunam, kay ovejakunapas ñoqapa ovejaykunam, tukuy kay qawasqaykiqa ñoqallapam. Chaynaqa, manam imanasaqchu churiykunatapas nitaq willkaykunatapas. 44Kunanyá contratota ruwasun, chaynapi contrato ruwasqanchik ñoqanchikpaq testigo kananpaq, nispa.
45Chaymi Jacob suytu rumita señal kananpaq sayachirqa, 46hinaspam ayllunkunata nirqa:
Rumikunata huñumuychik, nispa.
Llapallanku rumita montoruspankum chaypi mikurqaku. 47Chaytam arameokunapa rimayninpi Labán suticharqa “Jegar Sahaduta” nispa. Jacobñataqmi hebreokunapa rimayninpi suticharqa “Galaad” nispa.
48Hinaptinmi Labán nirqa:
Kunanmi kay montosqa rumi ñoqanchikpaq testigo kanqa, nispan.
Chayraykum Galaadwan suticharqaku. 49Suticharqakutaqmi “Mizpa” nispankupas. Chaynataqa suticharqaku Labán kaynata nisqanraykum:
Tayta Diosmi qawawasun qamtawan ñoqata maypiña kaptinchikpas. 50Churiykunata ñakarichispa huk warmikunatawan casaraptikiqa, manaña pi qawawaptinchikpas Diosmi testigo kanqa ñoqanchikpi, nispa.
51Labanqa nirqataqmi:
Kay montosqa rumikunawan kay suytu rumim ñoqanchik ukupi 52testigo kanqa. Mana allinta ruwanakunanchikpaqqa manam qanman hamusaqchu, nitaqmi qampas ñoqaman hamunkichu. 53Mana chayna kaptinqa Abrahampa, Nacorpa Diosninyá juzgawasunchik, nispa.
Chaymi Jacobqa taytan Isaacpa yupaychasqan Diosrayku jurarqa. 54Chaymantam Diospaq animalkunata wañuchispan Jacob kañarqa, hinaspam ayllunkunata qayaspa mikurqaku. Mikuruspankum chay tuta, chay orqopi puñurqaku.
55Labanmi paqarinnintin tutapayta hatarispan churinkunata willkankunata muchaykurqa, hinaspam paykunata bendeciykuspan wasinman kutikurqa.
Currently Selected:
Génesis 31: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012