Ezequiel 3
3
1Chaymantam niwarqa:
Runapa churin, ñawpaqnikipi kaq qellqata mikuy hinaspa Israelpa mirayninkunaman nimuy, nispa.
2Chaymi simiyta kichaykuptiy chay qellqasqa rollota mikurachiwarqa, 3#Ap 10.9-10.hinaspam kaynata niwarqa:
Runapa churin, saksanaykikama kay qosqay rollota mikuy, nispa.
Mikuruptiymi abejapa miskin hinaraq simiypi karqa. 4Niwarqataqmi kaytapas:
Runapa churin, chaynaqa Israelpa mirayninkunaman kay imam nisqaykunata willamuy. 5Manam kachachkaykiqa mana reqsisqayki rimayniyuq runakunamanchu, nitaqmi rimasqankupas mana entiendesqayki runakunamanchu, aswanqa Israelpa mirayninkunamanmi. 6Manam kamachichkaykiqa rimasqankupas mana entiendesqayki nacionkunamanchu rimasqankuta mana entiendenaykipaqqa. Sichum paykunaman kachaptiyqa kasusunkimanmi karqa. 7Israelpa mirayninkunam ichaqa mana uyarisunkichu, chaynaqa kanqaku ñoqatapas mana kasuwasqankuraykum. Israelpa mirayninkunaqa mana kasukuq rumi sonqo runakunam. 8Ichaqa ñoqam qamtapas paykuna hina mana kasukuq rumi sonqoman tikrasqayki. 9Diamanteta otaq mana chaylla pakiruq rumita hinam ruwasqayki. Amam paykunataqa manchakunkichu, nitaqmi qayllankupipas hukmanyankichu. Paykunaqa mana kasukuq miraykunam, nispa.
10Chaymantam niwarqa:
Runapa churin, kay rimapayasqaykunata sumaqta uyariwaspayki sonqoykipi waqaychay. 11Preso apasqa llaqtamasikikunata watukamuspa kaynata nimuy: “Tayta Diosmi kaynata nin”, nispayki. Uyarisunaykipaq otaq mana uyarisunaykipaqpas willamuy, nispa.
12Diospa Espiritun hoqariruwaptinñataqmi hatun qapariyta qepaypi kayna niqta uyarirqani:
¡Maymi yachasqanpiyá Tayta Dios hatunchasqa kachun! niqta.
13Uyarirqanitaqmi runaman rikchakuq kawsaqkunapa raprankuna qaqonakuspan bullallataña ruwasqantapas chaynataq waqtankupi ruedakunapa qapariynintapas. 14Ñoqatañataqmi Diospa Espiritun hoqariruwaspan huklawman aparuwarqa. Chaymi ñoqaqa llakisqallaña hinaspa piñasqallaña rirqani, Tayta Diospa makinñataqmi allinniqta hapiwarqa. 15Chaynapim Quebar mayupa patanpi Tel Abib llaqtaman chayarurqani. Chaypim Israelmanta preso apasqakuna yacharqaku, hinaspaymi paykunawan qanchis punchaw karqani, ichaqa manam ima ruwaytapas nitaq ima niytapas atirqanichu.
Ezequielqa llaqta waqaychaq hina kasqanmanta
(Ez 33.1-9)
16Chay qanchis punchaw pasaruptinmi Tayta Dios kaynata niwarqa:
17Runapa churin, qamtam llaqta waqaychaqta hina Israelpa mirayninkunapaq churayki. Imapas qanman nisqaytam ñoqapa rantiypi paykunaman willanki. 18Sichum mana allin ruwaq runata nisaq: “Wañunkipunim” nispa, hinaptin qamñataq mana qaqchawaqchu nitaq rimapayawaqchu mana allin kawsasqanmanta wanakuspa kawsananpaq, hinaptinqa chay runam huchanpi wañurunqa; ichaqa huchanpi wañusqanmantam qanmanta cuentata mañasqayki. 19Sichum chay mana allin ruwaq runata qaqchachkaptiki mana wanakunqachu huchanmantawan mana allin ruwayninmanta, hinaspaqa hucha ruwasqanraykum wañurunqa, qanmi ichaqa paymanta manaña huchayuq kanki. 20Sichum pipas allinkunata ruwachkaspan qepancharuwanqa hinaspam mana allintaña ruwaptinqa, ñoqam mitkananpaq trampata churarusaq, hinaptinmi wañurunqa. Ichaqa mana rimapayasqaykiraykum huchanpi wañurunqa. Hinaptinqa tukuy allinkuna ruwasqankunatapas manam qawarisaqchu, ichaqa paypa wañusqanmantam qanmanta cuentata mañasqayki. 21Sichum allin ruwaq runata mana huchallikunanpaq qaqchaptiki manaña huchallikunqachu hinaspaqa qaqchasqaykiraykum kawsanqa, hinaptinqa qampas mana huchayuqmi kanki, nispa.
Ezequiel mana rimaq rikurirusqanmanta
22Tayta Diosmi makinwan hapiykuwaspan niwarqa:
Hatarispayki pampaman lloqsiy, hinaptinmi chaypi rimapayasqayki, nispa.
23Chaynapim hatarispay pampaman rirqani. Chaypim Tayta Diospa kanchariynin kachkasqa, chay kanchariyqa kasqa Quebar mayupa patanpi rikusqay hinam. Chaymi qonqoranpa pampaman kumuykurqani 24Hinaptinmi Tayta Diospa Espiritun huntaykuwaspan sayarirachiwarqa, hinaspam kaynata rimapayawarqa:
Rispayki wasikipi wichqakaramuy. 25Runapa churin, qamtam waskawan chaqnasunkichik, chaynapim runakunapa chawpinmanqa manaña lloqsinkiñachu. 26Qalluykitapas paladarnikiman laqanarachiptiymi mana rimaqña rikurirunki. Paykunataqa mana kasukuq kaptinpas manañam qaqchayta atinkiñachu. 27Ichaqa rimapayaspaymi huktawan rimachisqayki, hinaptinmi kaynata ninki: “Tayta Diosmi kaynata nin”, nispayki. Uyariy munaqqa uyarinqam, mana uyariy munaqqa manam uyarinqachu. Paykunaqa mana kasukuq miraykunam, nispa.
Currently Selected:
Ezequiel 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012