Éxodo 36

1Chaynatam Bezaleelwan Aholiabpas hinaspa lliw maestrokunapas ruwanqaku, imaynam Tayta Diospa yachay qosqanman chaynataq yuyay qosqanman hina, chaynapi Tayta Diospa kamachisqanman hina carpapi tukuy ima serviciokunata allinta ruwanankupaq.

Achkallaña ofrendakuna apamusqankumanta

2Moisesmi Bezaleelta hinaspa Aholiabta qayarqa, qayarqataqmi Tayta Diospa yachay qosqan llapallan yachayniyuq runakunatapas; chay runakunaqa kikillankumantam imapas ruwaypi yanapakunankupaq prometekurqaku. 3Paykunam Moisesmanta Israelpa mirayninkunapa lliw ofrenda apamusqankuta chaskirqaku, chaywan carpapi serviciokunata ruwanankupaq. Israelpa mirayninkunaqa hinallam ofrendankuta sapa punchaw apamuqku. 4Chayraykum carpa ruwaq maestrokuna sapakama llamkayninkuta saqeykuspa hamuspanku, 5Moisesta nirqaku:

Llaqtaqa Tayta Diospa kamachikusqanta ruwanapaq necesitasqanchikmantapas aswan achkatañam aparamunku, nispa.

6Chaymi Moisesqa maymi yachasqanku campamentopi kaynata kamachirqa:

“Qaripas warmipas amaña imatapas ruwachunkuñachu carpapaq ofrendata apamunankupaqqa”, nispa. Chaynata nispanmi ofrenda apamunankuta harkakururqa, 7carpa ruwanankupaq materialkuna puchu-puchuña kasqanrayku.

Santuariota ruwasqankumanta

(Ex 26.1-37)

8Allinnin maestrokunam carpata ruwarqaku. Chunka cortinakunatam lino qaytumanta, morado qaytumanta, grosella qaytumanta hinaspa guindo qaytumanta ruwarqaku. Chay cortinakunapim querubinkunata suma-sumaqta bordarqaku. 9Sapa cortinapa sayayninmi karqa chunka iskayniyuq metro parten, anchonñataqmi karqa iskay metro, llapan cortinakunam karqa chay sayayniyuqkamalla. 10Pichqa cortinakunatam sapakamata tinkinaspa sirarqaku, chaynallatam wakin pichqa cortinakunawanpas ruwarqaku. 11Chay pichqantin tinkinasqa cortinakunapa kaylaw-waklaw patanpim azul cordonmanta ojalkunata churarqaku. Chaynallatam huknin pichqantin tinkinasqa cortinakunapipas ruwarqaku. 12Ruwarqakutaqmi cordonmanta pichqa chunka ojalkunatapas, chaykunatam punta kaq pichqantin tinkinaspa sirasqa cortinapa patanpi churarqaku, chaynallatam ruwarqaku huknin pichqantin tinkinaspa sirasqa cortinapa patanpipas; chay ojalkunaqa karqa chimpa-chimpapuram. 13Ruwarqakutaqmi qorimanta pichqa chunka corchetekunatapas, chaykunawanmi punta kaq pichqantin tinkinaspa sirasqa cortinata huknin pichqantin tinkinaspa sirasqa cortinaman tinkirqaku, chaynapim carpaqa hukllaman huñusqa karqa.

14Ruwarqakutaqmi cabrapa pelonmanta chunka hukniyuq cortinakunatapas, chaytaqa ruwarqaku carpapa hawanta qatanankupaqmi. 15Chay cortinakunapa sayayninmi karqa chunka kimsayuq metro parten, anchonñataqmi karqa iskay metro. 16Pichqa cortinatam sapakamata tinkinaspa sirarqaku, soqtantin cortinakunatapas hina chaynallatam sirarqaku. 17Chay pichqata tinkinaspa sirasqa cortinapa patanpim cordonmanta pichqa chunka ojalkunata churarqaku, chay soqtata tinkinaspa sirasqa cortinakunapa patanpipas hina chayna pichqa chunkatam churarqaku. 18Ruwarqakutaqmi broncemanta pichqa chunka corchetekunatapas, chaykunawanmi cordonmanta ojalkunata hapichirqaku, chaynapim carpaqa chullallaman tinkisqa karqa.

19Ruwarqakutaqmi carneropa pukaman teñisqa qalasninmanta qatatapas, chaypa hawanpaqñataqmi huk qatata fino qalasmanta ruwarqaku. 20Carpapa tablankunatañataqmi acacia sachamanta ruwarqaku, hinaspam allinta sayachirqaku. 21Sapa tablapa sayayninmi karqa tawa metro parten, anchonñataqmi parte metro masnin. 22Tablapura tupanachisqa kananpaqmi sapa tablapi iskay espigakuna karqa. Chaynatam carpapa llapallan tablankunata ruwarqaku. 23Iskay chunka tablakunatam carpapa alleq lawninpaq ruwarqaku. 24Ruwarqakutaqmi qollqemanta toqoyuq tiyanakunatapas tawa chunkata, iskay toqom sapa tablapaq karqa, chaymanmi tablapa iskay espigankuna yaykurqa. 25Carpapa ichoq lawninpaqpas iskay chunka tablakunatam ruwarqaku. 26Qollqemantam toqoyuq tawa chunka tiyanakunata ruwarqaku, iskay tiyanakunam sapa tablapa tiyananpaq karqa. 27Carpapa qepa lawninpaqñataqmi otaq intipa seqaykunan lawninpaqñataqmi soqta tablakunata ruwarqaku. 28Carpapa qepa esquinankunapaqmi iskay tablakunata ruwarqaku. 29Chay iskay tablakunam huklla kananpaq pampanmanta altonpi punta kaq anillokama tinkinasqa karqa, chaynatam esquinankunapaq chay iskay tablakunawan ruwarqaku. 30Pusaq tablakunatam ruwarqaku, chay pusaq tablakuna tiyananpaqñataqmi qollqemanta chunka soqtayuq tiyanakuna karqa, iskay tiyanam sapa tablapa tiyananpaq karqa.

31Carpapa huklawnin tablakunapaqpas acacia sachamantam pichqa listonkunata ruwarqaku. 32Kaylaw waqtanpi tablakunapaqpas pichqa listonkunatam ruwarqaku, pichqa listonkunatañataqmi qepa lawninpi tablakunapaq ruwarqaku. 33Chawpipi kaq listonmi tablakunapa chawpinta pasarqa kaylaw patanmanta waklaw patankama. 34Chay tablakunatam qoriwan llusirqaku, hinaspam qorimanta anillokunata churarqaku chayninta listonkuna pasananpaq; listonkunatapas qoriwanmi llusirqaku.

35Ruwarqakutaqmi morado qaytumanta, grosella qaytumanta, puka qaytumanta, kawpusqa linomanta velotapas; chay velopa hawanpim iskay querubinkunata kuyayllapaqta bordarqaku. 36Chay velota warkunankupaqñataqmi acacia qerumanta tawa pilarkunata ruwaspanku qoriwan llusirqaku, hinaspam qorimanta ganchokunata churarqaku; chay pilarkuna tiyananpaqmi qollqeta chulluchispa toqoyuq tawa tiyanakunata ruwarqaku.

37Ruwarqakutaqmi carpapa punkunpaq suma-sumaq bordasqa cortinatapas, chay cortinaqa karqa morado qaytumanta, grosella qaytumanta, guindo qaytumanta hinaspa kawpusqa linomantam. 38Chay cortinapaqmi acacia qerumanta pichqa pilarkunata ganchoyuqtakama ruwarqaku. Chay pilarkunapa puntanmi anillonkunapiwan qoriwan llusisqa karqa. Chay pichqa pilarkunapa tiyanankunañataqmi broncemanta karqa.

Currently Selected:

Éxodo 36: RCHQ2

Highlight

Copy