Éxodo 10
10
Aqaruwaywan castigasqanmanta
1Tayta Diosmi Moisesta nirqa:
Faraonpa qayllanman yaykuy, paypa sonqontawan serviqninkunapa sonqontam rumiyarachini, chaynataqa ruwaruni paykunaman señalniykunata qawachinaypaqmi. 2Chaynapi Egipto nacionpi tukuy imam ruwasqaymanta churikikunaman hinaspa willkaykikunaman willanaykipaq. Chaynapim ñoqa Tayta Dios kasqayta yachankichik, nispa.
3Chaymi Moiseswan Aarón, Faraonpa qayllanman yaykuspa nirqaku:
Hebreo runakunapa Diosninmi kaynata nin: “¿Haykapikamataq ñoqapa qayllaypi mana uchuychakunkichu? Yupaychamuwanankupaq llaqtayta kachariy. 4Llaqtayta mana kachariyta munaptikiqa, paqarinmi aqaruwaykunata lliw nacionnikiman kacharimusaq. 5Hinaptinmi allpata tapaykunqa pampapas mana rikukuy atinankama. Chaymi runtu paramanta puchuqta tukunqa, campopi iklliq sachakunatapas lliwtam tukunqa. 6Chay aqaruwaykunam palacioykiman, serviqnikikunapa wasinman chaynataq Egipto nacionpi lliw runakunapa wasinmanpas huntarunqa. Chaynataqa Egipto nación kasqanmantapas, taytaykichikkunawan ñawpaq taytaykichikkunapas manam haykapipas rikurqakuchu”, nispa.
Chaynata niruspanmi Moisesqa Faraonpa qayllanmanta lloqsikurqa. 7Chaymi Faraonta serviqninkuna nirqaku:
¿Haykapikamataq kay runa sasachakuyllata qowasunchik? Israelpa mirayninkunata kachariy, chaynapi Tayta Diosta yupaychamunankupaq. ¿Manachu rikunki paykunarayku lliw Egipto nacionqa purmachisqa kasqanta? nispanku.
8Chaymi Moisestawan Aaronta qayachispan Faraón nirqa:
Rispaykichik Señornikichik Diosta yupaychamuychik. Ichaqa ¿pikunataq rinkichik? nispa.
9Hinaptinmi Moisés nirqa:
Tayta Diosta yupaychamunayku fiesta kasqanraykum, warmaykupiwan, yuyaqniykupiwan, qari churiykupiwan hinaspa warmi churiykupiwan risaqku. Ovejaykutawan vacaykutapas qatisaqkum, nispa.
10Chaymi Faraón nirqa:
Tayta Diosña qamkunawan kaptinpas warmaykichikkunatawanqa manam kacharikichikmanchu. Qamkunaqa mana allintam tanteachkankichik. 11Manam chaynaqa kanmanchu, qarikunalla rispa Tayta Diosta yupaychamuychik. Chaynatam mañakurqankichik, nispa.
Chaynata niruspanmi Faraonqa paykunata ñawpaqninmanta qarqorachirqa. 12Chaymi Moisesta Tayta Dios nirqa:
Egipto allpapa hawanman makikita haywariy, aqaruwaykuna hamuspan runtu parapa puchusqan lliw qorakunata tukunanpaq, nispa.
13Hinaptinmi Egipto allpapa hawanman tawnanta Moisés haywarirqa, chaymi Tayta Dios tutantin punchawnintin intipa qespimunan lawmanta Egipto nacionman wayrata pukuchimurqa. Chaymi paqarinnintin punchawpaq intipa qespimunan lawmanta aqaruwaykunata wayra aparamurqa. 14Chay aqaruwaykunam Egipto nacionpa hawanman hamuruspa puyu hinaña tiyarurqa; chayna aqaruwayqa manam haykapipas karqachu nitaqmi kanqachu. 15#Ap 9.2-3.Pampapas manaña rikukunankamam lliw allpata taparurqa, hinaspam runtu paramanta puchuq plantakunata, kawsaykunata, sachakunata hinaspa frutakunatapas tukururqa. Egipto nacionpiqa verde sachakunawan qorakunapas manam puchurqachu. 16Hinaptinmi utqayllamanña Moisestawan Aaronta qayachimuspan Faraón nirqa: Tayta Diospa chaynataq qamkunapa contraykichikpim huchallikuruni. 17Chaynaqa, kunanllañayá huchayta pampachaykuwaspa Tayta Diosta mañakuychik, kay plagallatañapas ñoqamanta wischunanpaq, chaynapi mana wañurunaykupaq, nispa.
18Chaymi Faraonpa ñawpaqninmanta lloqsiruspan Tayta Diosta Moisés mañakurqa. 19Hinaptinmi Tayta Dios intipa seqaykunan lawmanta sinchi wayrata pukurachimuspan aqaruwayta Puka lamar qochaman wischuykurqa, manam chulla aqaruwaypas Egipto nacionpiqa puchurqachu. 20Ichaqa Tayta Diosmi Faraonpa sonqonta rumiyarachirqa, chaymi Israelpa mirayninkunataqa mana kacharirqachu.
Sinchi tutayaywan castigasqanmanta
21 #
Ap 16.10. Moisestam Tayta Dios nirqa:
Makikita cieloman hoqariy llapa runa llapchaykachanankukama Egipto nacionpi sinchi tutayay kananpaq, nispa.
22Chaymi Moisés makinta cieloman hoqarirqa, hinaptinmi kimsa punchaw, yanay-yanay tutayay Egipto nacionta pampaykurqa. 23Kimsa punchawpunim mana pipas rikunakurqakuchu, nitaqmi maymi kasqanmantapas lloqsirqakuchu. Israelpa mirayninkunapa yachasqankupim ichaqa achkiy karqa.
24Chaymi Moisesta qayachispan Faraón nirqa:
Rispaykichik Tayta Diosta yupaychamuychik, pusaychiktaqyá warmaykichiktapas. Ovejaykichikwan vacaykichikmi ichaqa hinapi qepanqa, nispa.
25Hinaptinmi Moisés nirqa:
Qanmi animalkunataqa qowankiku Señorniyku Tayta Diospaq sacrificaspa ofrecemunaykupaq. 26Animalniykupas ñoqaykuwanmi rinqa, manam chullallapas qepanqachu, Tayta Diosta yupaychanaykupaqqa chay animalkunamantam hapisaqku. Manaraqmi yachanikuchu wakman chayanaykukama imawanmi Tayta Diosta yupaychanaykutapas, nispa.
27Ichaqa Tayta Diosmi Faraonpa sonqonta rumiyarachirqa, chayraykum mana kachariyta munarqachu. 28Chaymi Moisesta Faraón nirqa:
Qayllaymanta pasaway, ama masta rikurimuwaychu, yapatawan hamuruptikiqa wañurachisqaykim, nispa.
29Hinaptinmi Moisés nirqa:
Allintapunim nirunki: Manañam yapatawanqa qayllaykiman hamusaqñachu, nispa.
Currently Selected:
Éxodo 10: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
