Ester 9
9
Judiokuna vencesqankumanta
1Adar killapa chunka kimsayuq punchawninpim, reypa kamachikusqan decretoman hina judiokunata enemigonkuna munaychakunanku karqa, ichaqa manam cumplikurqachu, aswanqa llapa judiokunam paykunapi munaychakururqaku. 2Rey Asueropa munaychakusqan provinciakunapim, llapa judiokuna maymi yachasqanku llaqtapi huñunakururqaku enemigonkupa contranpi peleanankupaq. Ichaqa manam mayqan enemigonkupas paykunapa contranpi sayariyta atirqachu, judiokunata manchakusqankurayku.
3Chaymi llapa provinciakunapi reypa churasqan kamachikuqkunapas, gobernadorkunapas hinaspa autoridadkunapas Mardoqueota manchakuspanku judiokunataña yanaparqaku. 4Mardoqueoqa ancha munayniyuqmi reypa palacionpi karqa, chaymi ancha reqsisqa kayninpas lliw provinciakunaman chayarqa, chaynapim payqa aswan-aswan munayniyuqña rikurirqa. 5Judiokunaqa lliw enemigonkunatam espadawan wañuchispa puchukarachirqaku, hinaspam munasqankuta ruwarurqaku.
6Reypa yachasqan Susa llaqtapipas pichqa pachak runakunatam wañurachirqaku. 7Wañurachirqakutaqmi Parsandata, Dalfonta, Aspata, 8Porata, Adaliata, Aridata, 9Parmasta, Arisaita, Vaizata hinaspa Aridaitapas. 10Paykunam karqaku judiokunapa enemigon Hamedatapa churin Amanpa chunkantin churinkuna; llapa kapuqninkutam ichaqa mana imanarqakuchu.
11Hina chay punchawllapitaqmi Susa llaqtapi wañuchisqankumantapas reyman willarqaku. 12Hinaptinmi reina Esterta rey Asuero nirqa:
Kay yachasqay Susa llaqtapipas judiokunaqa pichqa pachak runakunatam wañurachinku, wañurachinkutaqmi Amanpa chunkantin churinkunatapas; wakin provinciakunapiqa haykatachiki wañurachinku, chaynaqa ¿imatawanraqtaq mañakunki? ¿Imatawanraqtaq ruwanayta munanki? Imapas mañakusqaykiqa ruwasqam kanqa, nispa.
13Chaymi reina Ester nirqa:
Allinpaq rikchakapusuptikiqa, paqarinyá kay Susa llaqtapi judiokuna decretoman hina ruwaspanku llapa runakuna qawananpaq Amanpa chunkantin churinkunapa ayanta warkuchunku, nispa.
14Hinaptinmi reyqa chaynata Susa llaqtapi kamachikurqa. Chaymi Amanpa chunkantin churinkunapa ayanta warkururqaku.
15Adar killapa chunka tawayuq punchawninpim Susa llaqtapi yachaq judiokuna huktawan huñunakuruspanku kimsa pachak runakunatawanraq wañurachirqaku, ichaqa manam imankutapas aparqakuchu. 16Huklaw provinciakunapi yachaq judiokunapas adar killapa chunka kimsayuq punchawninpim vidankuta defiendenankupaq huñunakurqaku, hinaspam enemigonkuta vengakuspa qanchis chunka pichqayuq waranqa runakunata wañuchirqaku, ichaqa manam imankutapas aparqakuchu. 17Tukuy kaykunaqa pasakurqa adar killapa chunka kimsayuq punchawninpim. Chay killapa chunka tawayuq punchawninpiñataqmi samaspanku convidota ruwaspa kusikurqaku.
18Susa llaqtapi yachaq judiokunañataqmi huñunakuspanku adar killapa chunka kimsayuq punchawninpiwan chunka tawayuq punchawninpi vidankuta defiendekurqaku; hinaspam chunka pichqayuq punchawninpiña samaruspanku convidota ruwaspanku anchata kusikurqaku. 19Chayraykum mana murallasqa llaqtachakunapi yachaq judiokunapas, adar killapa chunka tawayuq punchawninpi kusikuywan convidota ruwaspanku regalokunatapas hukninkumanta hukninkukama apachinakunku.
Purim sutiyuq fiestamanta
20Mardoqueom tukuy kaykunata qellqaspan, rey Asueropa munaychakusqan provinciakunapi judiokunaman cartakunata apachirqa, karupi chaynataq hichpapi kaqkunamanpas. 21Paykunatam kamachirqa sapa wata adar killapa chunka tawayuq hinaspa chunka pichqayuq punchawninpi huñunakuspanku fiestata ruwanankupaq, 22chay punchawkunapi judiokuna enemigonkumanta librasqa kasqankuta, llakinkupas kusikuymanña tikrakusqanta, waqayninkupas kusikuy punchawmanña tikrakusqanta yuyarinankupaq; hinaspa convidota chay punchawkunapi ruwaspanku vecinonkuman mikuyta apachispanku wakchakunamanpas regalokunata qonankupaq.
23Chaymi judiokunaqa Mardoqueopa kamachisqanman hina, chay fiesta ruway qallarisqankuta huk costumbremanña tikrarurqaku. 24#Est 3.7.Agagpa miraynin Hamedatapa churin Amanmi tantearurqa judiokuna puchukarachiyta; payqa karqa judiokunapa enemigonmi, chayraykum Amanqa Purta choqarqa, judiokunata puchukarachispa tukurunanpaq. 25Ichaqa reypa ñawpaqninman reina Ester hamuruspa mañakuptinmi, reyqa huk decretota kamachikurqa, judiokunapa contranpi Amanpa mana allinkuna tanteasqan kikillanman wichiykunanpaq. Chaynapim Amanqa churinkunapiwan warkunapi warkurachikurqaku.
26Chayraykum chay punchawkunata #9.26 Hebreo simipi Purim ninanqa “librasqa” ninanmi.“Purim” nispa suticharqaku, “pur” simimanta paqarisqanrayku. Mardoqueopa cartanman hinam chaynataq qawasqankuman hinaspa kikinku ukupi pasasqanman hinam, 27judiokunaqa kamachinakurqaku, kikinkupas, mirayninkupas chaynataq paykunaman hukllawakuqkunapas mana qonqaykuspa, kay iskay punchaw fiestata watan-watan ruwanankupaq. Chaynata ruwanankupaqmi kamachikuyta chaskirqaku, 28chay punchawkunata yuyarispanku, sapa ayllu, lliw provinciakunapi chaynataq llaqtakunapipas, mirayninkunapas fiestata ruwanankupaq; chaynapi llapa judiokuna chaynataq qepa miraykunapas kay Purim fiestata mana qonqaykuspa ruwanankupaq.
29Hinaptinmi Abihailpa churin reina Esterwan judío Mardoqueo, hatun atiyniyuq kayninkuman hina, iskay kaq cartata qellqarqaku, Purim fiestaqa kasukuspa ruwayman churasqa kananpaq. 30Chay cartakunatam llapallan judiokunaman chaynataq rey Asueropa munaychakusqan pachak iskay chunka qanchisniyuq provinciakunamanpas apachirqaku, sumaq kuyakuy chaynataq cheqap rimaywan qellqasqata. 31Chay qellqawanmi reqsichirqa Mardoqueopa chaynataq reina Esterpa kamachisqanman hina ima punchawkunapim Purim fiestata ruwanankutapas. Yachachirqataqmi imaynam ayunanankutapas chaynataq sasachakuyninkupi imaynam waqanankutapas. 32Chaynapim Purim fiestamanta Esterpa kamachisqankunaqa allin sapinchasqa hinaspa huk libropi qellqasqa karqa.
Currently Selected:
Ester 9: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012