Ester 4
4
1Mardoqueom tukuy kaykunata yacharuspan pachankunata llikiparqa, hinaspam qachqa pachawan pachakuruspan, umanman uchpata tallikuykuspan llaqtapa chawpinta qaparillawanña waqastin rirqa. 2Hinaspanmi reypa palacion punkukama chayarurqa, ichaqa manam ukuman yaykurqachu chayna pachayuqqa mana yaykuna kasqanrayku. 3Reypa kamachisqan decreto sapa provinciakunaman chayaruptinmi, llapa judiokuna hatun llakikuypi, ayunopi, waqakuypi karqaku, achkaqmi qachqa pachawan churakuykuspa uchpapi puñurqaku.
Castankunapa favorninpi reyta Ester mañakusqanmanta
4Tukuy chaykuna pasakusqantam reina Esterman willaykurqaku serviqnin sipaskuna chaynataq serviqnin eunucokunapas, chaymi reina Esterqa sinchillataña llakikuspan Mardoqueoman pachata apachirqa, chaynapi qachqa pachankunata hurqokuspan chay apachisqan pachawan mudakunanpaq, Mardoqueom ichaqa mana munarqachu. 5Chaymantam reina Ester, reypa serviqnin Hatacta qayachispan Mardoqueoman kacharqa imam pasakusqanmantawan imanasqam chayna pachasqa kasqanmanta tapumunanpaq. 6Chaymi Hatac rirqa Mardoqueopa kasqanman; Mardoqueoqa plazapim kachkarqa reypa palacionpa punkunpi. 7Hinaptinmi imam pasasqanmanta payman Mardoqueo willarqa, willarqataqmi llapa judiokuna wañuchisqa kanankupaq Amanpa reyman qollqe qoy munasqantapas. 8Qorqataqmi judío runakuna chinkachisqa kanankupaq Susa llaqtapi cheqechisqanku decretopa copiantapas, chaynapi Esterpas yachananpaq. Kunarqataqmi reyman asuykuspa castankunapa favorninpi mañakunanpaqpas.
9Hatacmi Esterpa kasqanman kutispan Mardoqueopa nisqanta willamurqa. 10Chaymi Esterqa Hatacwan Mardoqueoman kaynata willachimurqa:
11Reypa serviqninkunawan munaychakusqan provinciakunapi runakunaqa yachankum reypa leyninqa: “Qaripas otaq warmipas mana qayasqa kachkaspan reypa uku law pationman yaykuqqa wañuchisqam kanqa, yaykuspaqa yaykunman pimanpas qori varanta rey haywariptillanmi” nisqanta. Ñoqaqa kimsa chunka punchawñam reypa qayllanman yaykunaypaq mana qayasqachu kani, nispa.
12Esterpa nisqankunata Mardoqueoman willaykuptinkum, 13payñataq Esterman kaynata nichimurqa: ¿Judío kachkaspapas reypa palacionpi kasqaykiraykuchu wañuymanta lluptiyta piensachkanki? 14Sichum kunan rimarinayki kachkaptin upallakuptikiqa judío runakunapa libraqninqa huklawmantam hamunqa, chaywanpas qamqa taytaykipa ayllunkunapiwanmi puchukanki. Ichapas kayna sasachakuypi yanapawanaykikupaq reina kayman chayarqanki, nispa.
15Hinaptinmi Esterñataq kaynata willachimurqa:
16Susa llaqtapi judío runakunatayá ñoqapaq ayunanankupaq huñuramuy, kimsa punchaw kimsa tutam ama mikunkichikchu nitaq tomankichikchu. Ñoqapas serviqniy sipaskunapiwanmi ayunasaq, chaymantañam reypa qayllanman yaykusaq, leyman hina mana yaykuna kachkaptinpas, wañunay otaq kawsanay kaptinpas, nispa.
17Chaymi Mardoqueo rispan Esterpa kamachisqanman hina ruwarqa.
Currently Selected:
Ester 4: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012