Ester 3
3
Judiokunapa contranpi Amán hatarisqanmanta
1Chaykuna pasaruptinmi rey Asuero, Agagpa miraynin Hamedatapa churin Amanta hatunchaspan llapallan kamachikuqkunapa kamachiqnin kananpaq churarurqa. 2Chaymi reypa serviqninkunawan palacio punkupi kaqkuna, Amanpa ñawpaqninpi kumuykuqku; chaynataqa ruwarqaku rey kamachikusqanraykum. Mardoqueom ichaqa mana qonqorakuqchu nitaq kumuykuqchu.
3Hinaptinmi reypa palacion punkunpi kaq serviqninkuna Mardoqueota nirqaku:
¿Imanasqataq reypa kamachikuyninta mana kasukunkichu? nispanku.
4Sapa punchaw chaynata tapupayaptinkupas payqa manam uyariqpas tukurqachu. Chayraykum Amanman willaykurqaku, Mardoqueopa kasukusqanta otaq mana kasukusqantapas qawanankupaq, paykunaman Mardoqueo Judío kasqanta willakusqanrayku. 5Chaymi #3.5 Amanqa karqa Israelpa enemigonmi, Amalec castakunapa mirayninmi.Amán sinchita piñakururqa, paypa ñawpaqninpi Mardoqueo mana qonqorakusqanta nitaq kumuykusqanta qawaykuspan. 6Ichaqa Mardoqueopa judío kasqanta yacharuspanmi, Amanqa mana payllatañachu wañuchiyta munarqa, aswanqa rey Asueropa munaychakusqanpi yachaq llapallan judío runakunatawanñam.
Judío runakuna wañuchisqa kanankupaq decretomanta
7Rey Asuero chunka iskayniyuq wataña munaychakuchkaptinmi, Nisán sutiyuq punta kaq killapi, Amanpa ñawpaqninpi #3.7 Suerte qawaytam hebreo simipi “PUR” ninku, chayqa Persa runakunapa costumbrenmi karqa, ruwayninkuta allin otaq mana allin kasqanta yachanankupaq.suerteta qawarqaku, ima killapim hinaspa ima punchawpim chay tanteasqanta ruwayman churananta yachananpaq. Chaymi Adarwan sutichasqa chunka iskayniyuq kaq killapi ruwananpaq lloqsirurqa. 8Hinaptinmi rey Asuerota Amán nirqa:
Munaychakusqayki llaqtakunapim huk casta runakuna cheqesqa hinaspa rakinasqa yachachkanku, leyninkupas sapaqmi, manam wakin llaqtakunapa hinachu, kamachikuynikikunatapas manam kasukunkuchu. Manam allinchu reypa munaychakuyninpi kayna runakunapa kawsayninqa. 9Allinpaq rikchakapusuptikiqa paykuna chinkachisqa kanankupaqyá huk kamachikuyta decretay, ñoqañataqmi kimsa pachak kimsa chunka kilo qollqeta, qori-qollqeki waqaychaqkunaman qosaq, munaychakuynikipa qori-qollqenman yapasqa kananpaq, nispa.
10Chaymi reyqa anillonta hurqoykuspan Hamedatapa churin Amanman qoykurqa, Amanqa karqa judío runakunapa enemigonmi, 11hinaspam kaynata nirqa:
Munachiwasqayki qollqekiqa qampaq kachun, chay runakunawanqa tanteasqaykiman hinayá ruway, nispa.
12Hinaptinmi chay watapi punta kaq killapa chunka kimsayuq punchawninpi, reypa secretarionkuna Amanpa kamachikusqanman hina regionkunapi hinaspa provinciakunapi gobernadorkunaman, chaynallataq nacionkunapi kamachikuqkunamanpas, qellqasqankuman chaynataq rimayninkuman hina qellqarqaku. Rey Asueropa sutinpi qellqaspankum anillonwan sellarqaku. 13Hinaspam reypa munaychakusqan provinciakunaman carta apaqkunawan apachirqaku. Chay decretopim rey kamachikurqa llapa judiokunata, joventapas yuyaqtapas, wawatapas warmitapas lliwta huk punchawllapi, Adarwan sutichasqa killapa chunka kimsayuq punchawninpi wañuchinankupaq hinaspa llapa tukuy imankutapas hapikuykunankupaq. 14Sapa provinciakunamanmi kay qellqasqa leypa copian apachisqa karqa, chay punchawpaq llapallanku listollaña kanankupaq. 15Reypa kamachikusqanman hinam chay cartakuna utqayman apasqa karqa, Susa llaqtapipas willachisqa kaptinmi llapa runakuna hatun chaqwapi tarikurqaku. Amanñataqmi reywan kuska tiyaykuspa upyakurqaku.
Currently Selected:
Ester 3: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012