Deuteronomio 2
2
Chunniqpi purisqanku watakunamanta
1 #
Nm 21.4. Chaymantam Tayta Diospa niwasqanman hina, Puka lamar qochaman riq ñanninta chunniqman rirqanchik. Unaymi Seir orqopa muyuriqninkunapi purirqanchik. 2Hinaptinmi Tayta Dios niwarqa: 3“Unayñam kay orqopa muyuriqninpi purirunkichik, kunanqa norte lawmanña riychik. 4#Gn 36.8.Runakunata kaynata kamachiy: Esaupa mirayninkunapa allpantam pasankichik. Paykunaqa aylluykichikmi, Seir orqopim yachachkanku. Paykunaqa manchakusunkichikmi, chaywanpas anchatayá cuidakuychik. 5Amam paykunawanqa peleankichikchu, paykunapa allpantaqa manam taksallatapas qosqaykichikchu. Seir orqokunaqa Esaupa mirayninkunapam, paykunamanmi ñoqa qorqani. 6Mikunaykichikpaq imatapas munaspaqa paykunamantam rantinkichik, yaku tomasqaykichikmantapas pagankichikmi”, nispa. 7Señornikichik Tayta Diosmi tukuy ima ruwasqanchikpi bendeciwarqanchik, tawa chunka watañam ñoqanchikwan kasqanqa, chaymi kay manchakuypaq chunniqpi puriptinchikpas mana imapas pisiwarqanchikchu.
8Chaymantam Elat llaqtanta, Ezión-geber llaqtanta hinaspa Arabá law ñanninta rispa Seir orqopi yachaq ayllunchik Esaupa mirayninkunapa allpanpa hichpanta pasarqanchik, Arabá wayqoman riq ñanmanta rakikuspanchikmi Moab law chunniq ñanninta rirqanchik. 9#Gn 19.37.Hinaptinmi Tayta Dios niwarqa: “Moabitakunataqa amam imanankichikchu nitaqmi paykunawanqa peleankichikchu, paykunamanqa Lotpa mirayninkuna kasqanraykum Ar law allpata qorqani. Paykunapa allpantaqa manam qosqaykichikchu”, nispa.
10(Ñawpaqtam chay allpapi Em casta runakuna yacharqaku, paykunaqa kallpasapa hinaspa achkallañam karqaku, Anacpa mirayninkuna hina hatunkaray runakunam karqaku. 11Wakin runakunam hapirqaku chay hatunkaray runakunaqa Refaim castakuna kasqanta, Moab runakunam ichaqa Em castakunawan suticharqaku. 12Seir lawpiqa Hor casta runakunam ñawpaqta yacharqaku, ichaqa Esaupa mirayninkunam chaypi yachanankupaq paykunata qarqorurqaku. Chaynataqa ruwarqaku Israelpa mirayninkuna Tayta Diospa qosqan allpamanta qarqosqankuta hinam).
13Tayta Diosmi nirqa: “Kunanyá Zered mayuta chimpaychik”, nispa. Hinaptinmi Zered mayuta chimparqanchik.
14 #
Nm 14.28-35. Cades-barnea lawmanta hamuspa Zered mayuta chimpamunanchikkamam kimsa chunka pusaqniyuq wataña pasarurqa. Chay watakunakamaqa guerrapaq akllasqa miraykunapas lliwñam wañururqaku, imaynam Tayta Diospa jurasqanman hina. 15Tayta Diospa piñakuyninmi lliw wañunankukama paykunapa contranpi karqa.
16Maypacham guerrapaq akllasqa qarikuna wañuruptinkuñam, 17Tayta Dios niwarqa: 18“Kunanmi Moab castakunapa allpanta pasaspaykichik Ar llaqtaman rinkichik. 19#Gn 19.38.Amonitakunapa allpanman chayaspaykichikqa amam imanankichikchu, amataqmi paykunawanqa peleankichikpaschu. Amonitakunapa allpantaqa manam qosqaykichikchu. Chay allpataqa Lotpa mirayninkunamanmi herencianku kananpaq qorqani”, nispa.
20(Chay allpatapas reqsirqaku hatunkaray runakunapa allpan nispankum, chaypi ñawpaqta Refaim castakuna yachasqankurayku. Paykunatam amonitakuna suticharqaku “zomzomeokuna”, nispanku. 21Chay llaqtaqa achkallaña runayuq hatun llaqtam karqa. Runankunapas Anacpa churinkuna hina hatunkaray runakunam karqaku. Paykunatam llapa amonitakunawan Tayta Dios tukurachirqa, chaynapim amonitakunaña chaypi yachachkanku. 22Paykunapaqpas Tayta Diosqa imaynam Seir orqopi yachaq Esaupa mirayninkunapaq ruwasqanta hinam ruwarqa. Horeokunata qarqoruptinmi Esaupa mirayninkunaña paykunapa rantinpi kunankama yachachkanku. 23Chaynatam Gaza llaqtapa muyuriqnin taksa llaqtakunapi yachaq aveokunatapas ruwarqa; llapa caftoreokunam Cretamanta hamuruspanku paykunata puchukarachirqaku, hinaspam paykunaña chaypi yachachkanku).
24Tayta Diosmi niwarqa: “Hatarispa Arnón mayuta chimpaychik, kunanmi Hesbón llaqtapi yachaq amorreokunapa reynin Sehonta vencechisqaykichik, hinaspam allpanta qosqaykichik. Chaynaqa, guerrapi peleaspa allpanta hapimuychik. 25Kunanmantapunim kay pachapi runakunata mancharichiyta qallarisaq. Qamkunamanta rimaqta uyarispankum mancharikuymanta katkatataspa qewipakunqaku”, nispa.
Rey Sehonta vencesqankumanta
(Nm 21.21-30)
26Chaymi Cademot chunniqmanta runakunata kacharqani Hesbón llaqtapi yachaq rey Sehonta sumaq simillawan kaynata nimunankupaq: 27“Allpayki chawpintam pasaruyta munaniku. Mana mayman muyuspam ñanllanta pasarusaqku. 28Mikunaykupaq pisiptinpas rantisqaykikum, yaku tomasqaykumantapas pagasqaykikum. Chaynaqa, allpayki chawpintayá pasarachiwayku. 29Seir orqopi yachaq Esaupa mirayninkuna chaynataq Ar llaqtapi yachaq moabitakuna hinayá qampas pasarachiwayku, Jordán mayuta chimparuspa Señorninchik Tayta Diospa qowananku allpaman chayarunaykukama”, nispanku.
30Ichaqa Hesbón llaqtapa reynin Sehonmi allpan pasananchikta mana munarqachu. Señorninchik Tayta Diosmi paytaqa pasaypaq rumi sonqota ruwarurqa, chaynapim ñoqanchikmanña qoykuwarqanchik.
31Hinaptinmi Tayta Dios niwarqa: “Kunan punchawmantapunim rey Sehonta chaynataq allpantapas qoykichik. Chaynaqa, allpanman yaykuspa hapimuychik”, nispa.
32Rey Sehonmi llapa tropankunapiwan Jahaza llaqtapi peleananchikpaq lloqsimurqa. 33Ichaqa Señorninchik Tayta Diosmi qoykuwarqanchik, chaymi payta, churinkunata hinaspa tropankunatapas vencerurqanchik. 34Llapallan llaqtankunata venceruspanchikmi tuñichirqanchik, hinaspam qarikunatapas, warmikunatapas chaynataq wawakunatapas mana puchuykuspa wañuchirqanchik. 35Llapa animalkunawan llaqtakunapa tukuy imankunam ichaqa ñoqanchikpaqña karqa. 36Arnón mayu patanpi Aroer llaqtamanta chaynataq wayqopi kaq llaqtamanta Galaad lawpi llaqtakunakamam mayqan llaqtapas mana imanayta atiwarqanchikchu, Señorninchik Tayta Diosmi llapallanta munaychakunanchikpaq qoykuwarqanchik. 37Amonitakunapa allpanman, Jaboc mayu lawpi llapallan kaqkunamanwan, orqo lawpi kaqkunamanmi ichaqa mana chayarqanchikchu, manaqa chayarqanchikchu Señorninchik Tayta Dios amam paykunamanqa yaykunkichikchu niwasqanchikraykum.
Currently Selected:
Deuteronomio 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012