2 Samuel 4
4
Is-bosetta wañuchisqankumanta
1Abnerpa Hebrón llaqtapi wañurusqanmanta Saulpa churin Is-boset yacharuspanmi pasaypaqta hukmanyarurqa, Israel runakunapas sinchitam mancharikurqaku. 2Is-bosetpam karqa iskay runankuna, Benjamín ayllumanta, Berot llaqtayuq Rimonpa churinkuna: Baana hinaspa Recab. Paykunaqa karqaku salteaq runakunapa kamachiqninkum. 3Beerot llaqtayuq runakunaqa Gitaim llaqtaman lluptiruspankum huklaw llaqtayuq hina chaypi yacharqaku.
4 # 2 S 9.3. Saulpa churin Jonatanpam karqa mana puriy atiq churin Mefi-boset sutiyuq. Mefi-boset pichqa watayuq kachkaptinmi Jezreel llaqtamanta Saulpa hinaspa Jonatanpa wañukusqanku noticia chayaramurqa, hinaptinmi Mefi-bosetpa uywaqnin warmi qepirikuspa utqayman ayqechkaspan chay wawata pampaman kachaykurqa, chaymantapunim suchuña rikurirurqa.
5Beerot llaqtayuq Rimonpa churinkunam, Recabwan Baana, chawpi punchaw rupaypi Is-bosetpa wasinman rirqaku. Chayaruspankum Is-bosetta puñuchkaqta tariykurqaku. 6Is-bosetpa wasin cuidaq warmim, trigo akllasqanpi puñururqa, hinaptinmi Recabwan wawqen Baana, mana pipa rikusqallanta Is-bosetpa wasinman yaykururqaku. 7Hinaspam Is-bosetta caman hawanpi puñuchkaqta wañurachirqaku; chaymantam umanta kuchuruspanku Arabá qechwanta tukuy tuta aparqaku. 8Hebrón llaqtaman chayaruspankum, Is-bosetpa umanta rey Davidman qawachispanku nirqaku:
¡Reynillayku, kayqaya wañuchiy munasuqniki enemigoyki Saulpa churin Is-bosetpa umanqa! Kunanmi ichaqa Saulta chaynataq miraynintapas Tayta Dios vengakurun, nispanku.
9Chaymi Beerot llaqtayuq Rimonpa churin Recabtawan wawqen Baanata David nirqa:
Tukuy sasachakuymanta libraqniy Tayta Diosraykum jurani: 10#2 S 1.1-16.Allin willakuypaq hapispa Saulpa wañusqanmanta willawaqniy runatapas, chay willawasqanmantam Siclag llaqtapi wañurachirqani. 11Qamkunataqa Aswanraqmi wañuchisqaykichik mana huchayuq runata wasinpi puñukuchkaqta wañuchisqaykichikmanta, hinaspam kay pachamanta chinkachisqaykichik, nispa.
12Chaymantam soldadonkunata David kamaykachiptin, chay iskaynin runakunata wañurachirqaku. Makinkunatawan chakinkunata kuchuruspankum Hebrón llaqtapi estanquepa waqtanpi warkururqaku. Is-bosetpa umantañataqmi Abnerpa sepulturanpi, Hebrón llaqtapi pamparurqaku.
Currently Selected:
2 Samuel 4: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012