1 Pedro 2
2
1Chaynaqa, saqeychikñayá mana allin ruwaykunata, engañakuykunata, iskay uya kayta, envidiakuykunata, cuento qepi kayta. 2Imaynam naceq wawakuna ñuñuta maskachkaq hinayá Diospa cheqap palabranta maskaychik, chaywan wiñaspa salvo kanaykichikpaq. 3#Sal 34.8.Qamkunaqa Señorpa kuyakuq sonqo kasqantaqa haypaykunkichikñam.
Kawsaq rumimanta
4Señorninchikmanyá asuykuychik, payqa kawsaq rumim, paytam runakuna wischupakurqaku, Diospaqmi ichaqa akllasqa ancha valorniyuq sumaq kawsaq rumi. 5Qamkunapas kawsaq rumi hinam kachkankichik. Diosmi qamkunawan rumiwan perqachkaq hina mana rikuy atina templota ruwachkan, chaynapi sacerdotekunaña kaspa Jesucristontakama mana rikuy atina sacrificiokunata Diosman ofrecenaykichikpaq. 6#Is 28.16.Chayraykum Qellqapas kaynata nin:
“Ñoqam Sión moqopi cimientopaq churani
kuyayllapaq suni takyaq akllasqa esquina rumita,
pipas chay rumipi hapipakuqqa manam penqaypichu kanqa”, nispa.
7 #
Sal 118.22. Qamkunapaqqa chay rumiqa ancha valorniyuqmi, mana iñiqkunapaqmi ichaqa Qellqapa kayna nisqan cumplikun:
“Wasi perqaqkunapa wischupakusqanku rumim
cimientopa esquinan hapiq rumiña rikurirun”, nispa.
8 #
Is 8.14-15. Kaytapas nintaqmi:
“Paymi mitkana rumi hinaspa urmachikuq hatun rumi”, nispapas.
Paykunaqa Diospa palabranta mana kasukusqankuraykum mitkarunku, chaypaqqa citasqañam karqaku.
Diospa akllasqan llaqtamanta
9 #
Ex 19.5-6. #
Dt 4.20; 7.6; 14.2; 26.18; Tit 2.14. Qamkunam ichaqa kankichik, Diospa akllasqan ayllukuna, Reyta serviq sacerdotekuna, Diospaq chuyanchasqan llaqta hinaspa Diospa rantisqan runankuna, chaynapi Diospa atiyninmanta willakunaykichikpaq, paymi tutayaymanta qayasurqankichik admirakuypaq achkiyninpi purinaykichikpaq.
10 #
Os 2.23. Ñawpaqtaqa manam llaqtaychu karqankichik,
kunanmi ichaqa Diospa llaqtanña kankichik.
Ñawpaqtaqa mana llakipayasqam karqankichik,
kunanmi ichaqa Diospa llakipayasqanña kachkankichik.
Diospa sirvientenkuna hina kawsanamanta
11Kuyasqay wawqe-panillaykuna, huklaw llaqtayuqta hinaspa illakuyllapi kaqta hinam ruegakuykichik, aychaykichikpa mana allinkuna munasqantaqa amayá ruwaychikchu, chaykunaqa almaykichikpa contranpim peleachkan. 12Diosta mana reqsiqkunapa qayllanpiyá allinta kawsaychik, chaynapim hucha ruwaqmanta hina contraykichikpi rimachkaspankupas allin ruwasqaykichikta qawaspanku, Diospa cuenta mañaq hamusqan punchawpi payta yupaychanqaku.
13Señorninchikraykuyá kasukuychik runakunamanta kaq autoridadkunata, reykunata, ancha munayniyuq kasqankurayku. 14Kasukuychikyá paypa churasqan kamachikuqkunatapas, paykunaqa churasqa kachkanku mana allin ruwaqkunata castiganankupaqmi hinaspa allin ruwaqkunatañataq hatunchanankupaqmi. 15Kaymi Diospa munayninqa: Allin kaqta ruwaspa, mana yachayniyuq runakunapa rimasqanta upallachiymi.
16Libre kaq runakuna hinayá kawsaychik, amataqyá libre kasqaykichikman hinaqa mana allinkunataqa ruwaychikchu, aswanqa Diosta serviq runakuna hinayá kawsaychik. 17Llapallantayá respetaychik, llapa iñiqmasikichiktapas kuyaychik, Diostapas hatunchaychik, reytapas kasukuychik.
Criadokunapa imaynam kanankumanta
18Criadokuna, patronnikichiktayá respetaspa kasukuychik, amayá allin runa kaptillanchu aswanqa piña-piña runa kaptinpas. 19Pipas Diospa munayninta yachachkaspa, mana kaqmanta ñakarispaqa pacienciakuchun, chayna ruwanatam Diosqa munan.
20Sichum qamkunapas mana allinkuna ruwasqaykichikmanta castigasqa kaspaykichikqa, ¿Ima allintaq kanman pacienciawan ñakariynikichikqa? Allin kaqkuna ruwasqaykichikmanta pacienciawan ñakariymi ichaqa Diospa qayllanpiqa allinpuni kanqa. 21Chaypaqmi Diosqa qayasurqankichik, Cristopas qamkunaraykum ñakarirqa, chaynapi paypa ejemplonta qatinaykichikpaq.
22 #
Is 53.9. Cristoqa manam huchallikurqachu, nitaqmi pitapas engañarqachu. 23Insultaptinkupas manam kutipakurqachu, ñakarichiptinkupas manam amenazarqachu, payqa mana piman sayapakuspa allin arreglo ruwaq Diospa makinmanmi churaykurqa.
24 #
Is 53.5. Kikin Cristom chakatasqa kaspan cuerponpi tukuy huchanchikkunata aparqa, chaynapi huchapaq wañusqaña kaspa allintaña kawsananchikpaq. Cristopa heridasqa kasqanwanmi sanoyayta haypankichik.
25 #
Is 53.6. Qamkunaqa chullaruq ovejakuna hinam karqankichik, kunanmi ichaqa Cristomanña kutirikunkichik, paymi allin michiq hina almaykichikta michichkan.
Currently Selected:
1 Pedro 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012