Room 7
7
Wɛtʋ kɩfatʋ ndʋ́ tɩ-taa pʋwɛɛ se ɖɩla Ɛsɔ tʋmɩyɛ yɔ
1Taabalaa, ɩtɛm sɩm tɔm ndʋ́ meheyiɣ-mɩ yɔ, mbʋ́ pʋyɔɔ yɔ, ɩsɩm paɣtʋ: ɩsɩm ḿbʋ́ se alɩwaatʋ ndʋ́ ɛyʋ wɛɣ wezuu yɔ pʋwɛɛ se ɛɖɔ tɩ-yɔɔ. 2Ɩcɔnɩ ɩna, halʋ weyi ɛwalaa yɔ, paɣtʋ yekina se ɛ nɛ ɛ-walʋ pataayasɩ ɖama alɩwaatʋ ndʋ́ ɛ́lɛ́ wɛnɩ ɛ-ɛsɛ yɔ. Ɛlɛ́, yee walʋ ɛnʋ ɛsɩba yɔ, puholi halʋ ɛnʋ nɛ paɣtʋ ndʋ́ tɩɩwɛ ɛ nɛ ɛ-walʋ pɛ-hɛkʋ taa yɔ tɩ-taa. 3Ɛlɛ́, yee ɛ-walʋ ɛwɛnɩ ɛ-ɛsɛ nɛ ɛkʋyɩ ɛ-yɔɔ nɛ ɛɖɛɛ ɛwalɩ nɔɔyʋ yɔ, payaɣ-ɩ se acɛyɛ tʋ. Ɛlɛ́, yee ɛ-walʋ ɛsɩba yɔ, puholi-i nɛ paɣtʋ ńdʋ́ ti-nesi taa. Ɛpɩzɩɣ ɛwalɩ abalʋ lɛlʋ, paatɔŋ se ɛkɛ acɛyɛ tʋ. 4Man-taabalaa, ḿbʋ́ ɖɔɖɔ pʋwɛnɩ-mɩ. Paɣtʋ tatasɩ wɛnaʋ ɖoŋ mɩ-yɔɔ, mbʋ́ pʋyɔɔ yɔ, ɩwɛ ɛzɩ sɩɖaa yɔ. Mbʋ́ pʋyɔɔ yɔ, mɩ nɛ Krɩstʋ weyi ɛsɩba yɔ, ɩkpɛndaa nɛ ɩwɛɛ e-nesi taa. Ɛnʋ lɛ weyi ɛsɩba nɛ Ɛsɔ fezi-i yɔ. Đa nɛ ɩ ɖɩkpɛndaa se ɖa-tʋmɩyɛ ɛwɛɛ Ɛsɔ wazaɣ. 5Toovenim lɛ, alɩwaatʋ ndʋ́ ɖɩlakaɣ ɛzɩ ɖe-liu wɛʋ yɔ, paɣtʋ yɔɔ pɩtɛzaɣ-ɖʋ labʋ liu se ɖɩla kɩwɛɛkɩm. Ŋgʋ́, pɩtɛŋnɩ-ɖʋ sɩm. 6Đooo lɛ, ɖɩɩwɛ ɛzɩ yomaa yɔ paɣtʋ nesi taa. Ɛlɛ́, lɛɛlɛɛyɔ ɖɩwɛ ɛzɩ sɩɖaa yɔ nɛ tɩtatasɩ ɖoŋ wɛnaʋ ɖɔ-yɔɔ. Ɛsɔ lɩzɩ-ɖʋ ti-nesi taa. Pʋ-yɔɔ ɖɩlɛɣzɩ ɛzɩma mbʋ́ ɖɩlakaɣ Ɛsɔ tʋmɩyɛ yɔ ɛzɩ Fezuu Kiɖeɖeu wɩlʋʋ-ɖʋ yɔ. Đɩɩtasɩɣ-ɖɩ labʋ ɛzɩ paɖʋʋ paɣtʋ taa yɔ.
Paɣtʋ wazɩɣ-ɖʋ we?
7Se we ɖɩɩyɔɔdɩ yɔ? Mooyiizi paɣtʋ kɛ kɩwɛɛkɩm naa we? Pɩtɛkɛ ḿbʋ́ kpem! Ɛlɛ́, tɩ-yɔɔ pɩtɩŋnaa nɛ mantɩlɩ mbʋ́ pɩkɛ kɩwɛɛkɩm yɔ. Mbʋ́ pʋyɔɔ yɔ, yee pataaɖʋ tɩ-taa se: «Taaɖʋ ɛsɩyɛ lɛlʋ ñɩm yɔɔ» yɔ, mantaatɩlɩ mbʋ́ ɛsɩyɛ ɖʋʋ kɛnaa yɔ. 8Peeɖe kɩwɛɛkɩm tɩŋnɩ waɖɛ nɖɩ́ ɖɩwɛ mbʋ́ paɖʋ paɣtʋ taa yɔ pɩ-taa nabʋyʋ yɔɔ nɛ pɩkpa ɖoŋ man-taa nɛ piyele manɖʋʋ ɛsɛ wondu ndɩ ndɩ yɔɔ. Mbʋ́ pʋyɔɔ yɔ, paɣtʋ ɛfɛyɩ yɔ, kɩwɛɛkɩm fɛyɩnɩ ɖoŋ. 9Đooo mantaatɩlɩ paɣtʋ lɛ, maawɛ wezuu. Ɛlɛ́, mansɩm-tʋ lɛ, kɩwɛɛkɩm kpa ɖoŋ man-taa 10nɛ mantɩpɩsɩ ɛzɩ sɩɖʋ yɔ: paɣtʋ ndʋ́ pɩɩwɛɛ se tɩha-m wezuu yɔ, tiwoni-m sɩm taa. 11Mbʋ́ pʋyɔɔ yɔ, waɖɛ ńɖɩ́ ɖɩ-yɔɔ pɩtɩŋnaa nɛ kɩwɛɛkɩm tɩŋnɩ mbʋ́ paɖʋ paɣtʋ taa yɔ pʋ-yɔɔ nɛ pɩcɛtɩ-m nɛ pʋkʋ-m.
12Pʋ-yɔɔ lɛ, Ɛsɔ ɖʋnɩ paɣtʋ, ɛnʋ ɖʋnɩ ɖɔɖɔ mbʋ́ pʋwɛ tɩ-taa yɔ. Ḿbʋ́ wɩlɩɣnɩ-ɖʋ mbʋ́ pʋtʋʋzaa yɔ. Paɣtʋ wɛ ɖeu nɛ tɩwɛɛ siɣsiɣ. 13Mbʋ́ pʋwɛ ɖeu yɔ, pɩpɩsɩnɩ mbʋ́ pʋkʋʋ ma yɔ yaa we? Pɩtɛkɛ ḿbʋ́ kpem! Kɩwɛɛkɩm kɔnɩnɩ-pʋ. Ḿbʋ́ kɩwɛɛkɩm wɩlɩ pɩ-maɣmaɣ pɩ-tɩ keɣlee: pɩtɩŋnɩ mbʋ́ pʋwɛ ɖeu yɔ pʋ-yɔɔ nɛ pʋkʋ-m. Ḿbʋ́ pɩtɩŋnɩ mbʋ́ paɖʋ paɣtʋ taa yɔ pʋ-yɔɔ nɛ kɩwɛɛkɩm tɛzɩ pɩ-tɩ wɩlʋʋ kpaagbaa keɣlee se pɩfɛyɩ ɖeu kpem.
Ɛyʋ wɛ kɩwɛɛkɩm nesi taa kpem
14Đɩna toovenim se Fezuu Kiɖeɖeu ɖʋnɩ paɣtʋ. Ɛlɛ́, ma mɛnkɛ ɛjam weyi kɩwɛɛkɩm yabɩ-ɩ nɛ ɛwɛɛ pi-nesi taa ɛzɩ yom yɔ. 15Mbʋ́ pʋyɔɔ yɔ, maanɩɣ man-tɩ tɔm. Maalakɩ mbʋ́ me-liu wɛɛ yɔ. Ɛlɛ́, mbʋ́ maacaɣ kpem yɔ malakɩ. 16Yee malakɩ mbʋ́ maacaɣ yɔ yɔ, mentisaa se paɣtʋ wɛ ɖeu. 17Yee ḿbʋ́ pɩtɛkɛ malakɩnɩ ḿbʋ́. Ɛlɛ́, kɩwɛɛkɩm mbʋ́ pʋwɛ man-taa yɔ pɩlakɩna. 18Mbʋ́ pʋyɔɔ yɔ, manawa se mbʋ́ pʋwɛ ɖeu yɔ, pɩfɛyɩ man-taa: pʋ-tɔbʋʋ se wɛtʋ ndʋ́ tɩ-taa mɛwɛɛ yɔ, mɛnfɛyɩ ɖoŋ lidaʋ nʋmɔʋ taa. Toovenim lɛ, me-liu wɛɛ se mala mbʋ́ pʋwɛ ɖeu yɔ. Ɛlɛ́, maapɩzɩɣ. 19Maalakɩ ɖeu mbʋ́ me-liu wɛɛ yɔ, ɛlɛ́, malakɩ ɛzaɣ́tʋ ndʋ́ maacaɣ yɔ. 20Yee malakɩ mbʋ́ maacaɣ yɔ yɔ, pɩwɩlɩɣ se pɩtɛkɛ malakɩnɩ-pʋ. Ɛlɛ́, kɩwɛɛkɩm mbʋ́ pʋwɛ man-taa yɔ pɩlakɩna. 21Pʋ-yɔɔ mana man-taa se: alɩwaatʋ ndʋ́ tɩtɩŋa mancaɣ se mala ɖeu yɔ, ɛzaɣ́tʋ ɖeke manpɩzɩɣ labʋ. 22Ma-maɣmaɣ man-taa hʋlʋmɩnɩ Ɛsɔ paɣtʋ. 23Ɛlɛ́, manaɣ se nabʋyʋ wɛ man-taa ɖɔɖɔ, pʋ nɛ mbʋ́ pɩkɛdɩnɩ-m ma-lɩmaɣza taa yɔ palʋkɩ. Ḿbʋ́ pɩsɩɣnɩ-m kɩwɛɛkɩm mbʋ́ pʋwɛ man-taa yɔ pu-yom. 24Mɔn-tɔm wɛ pʋtɔdɩyɛ! Mon-tomnaɣ yɔɔ lɛ, mansɩkɩ. Alɩzɩɣ-m ka-taa? 25Ɛsɔ lɩzɩɣnɩ-m! Đɩtɩŋnɩ ɖa-Kɩpaɣlʋ Yesu Krɩstʋ yɔɔ nɛ ɖɩsam-ɩ!
Yee ḿbʋ́ ma-maɣmaɣ manpɩzɩɣ mɔnɖɔ Ɛsɔ paɣtʋ yɔɔ ma-lɩmaɣza taa. Ɛlɛ́, mɛ-wɛtʋ ñɔɖɔŋ kɩwɛɛkɩm nʋmɔʋ taa.
Currently Selected:
Room 7: KABI
Highlight
Share
Compare
Copy
Want to have your highlights saved across all your devices? Sign up or sign in
