1 Pɩyɛ 1
1
Sɛtʋ
1Ma Pɩyɛ weyi ɛkɛ Yesu Krɩstʋ tiyiyu yɔ, mamaɣnɩ takayaɣ kanɛ. Mamaɣ-kɛ mbá mɩ Ɛsɔ lɩzaa se ɩkɛ ɛ-ñɩma nɛ ɩfɛyɩ mɩ-tɛ yɔ. Ɩmɩzɩ ɖama ageeta wena payaɣ se Pɔntɩ nɛ Galaasii nɛ Kapaadoosi nɛ Aazii nɛ Bitinii yɔ a-taa. 2Caa Ɛsɔ kalɩzɩ-mɩ ɛzɩ ɛɛɖʋʋ yɔ se ɩkɛ ɛ-ñɩma. E-Fezuu Kiɖeɖeu ɖoŋ yebina nɛ ɩkɛ ḿbʋ́ nɛ ɩña Yesu Krɩstʋ. Mbʋ́ pʋyɔɔ yɔ, ɛ-calɩm pɔsɔ-mɩ se ɩpɩzɩ ɩwɛɛ cɩɖɩcɩɖɩ Ɛsɔ ɛsɩndaa. Mɛnsɛ-mɩ: Caa Ɛsɔ ɛtɛzɩ-mɩ labʋ lootiye nɛ ɛtɛzɩ mɩ-laŋa hɛzʋʋ.
Ɖɩsa Ɛsɔ weyi ɛyakɩ mbá pataɣ-ɩ liu yɔ pa-ñʋʋ yɔ
3Đɩsa Ɛsɔ, ɛnʋ lɛ ɖa-Kɩpaɣlʋ Yesu Krɩstʋ Caa. Ɛna ɖa-pʋtɔdɩyɛ siŋŋ nɛ ɛtɩŋnɩ Yesu Krɩstʋ fem nɛ ɛlɩɩnɩ sɩɖaa taa yɔ pʋ-yɔɔ nɛ ɛha-ɖʋ wezuu kɩfalʋʋ. Mbʋ́ Ɛsɔ labɩ ḿbʋ́ yɔ, piyebina nɛ ɖɩtaɣ liu siŋŋ. 4Đɔɖɔ lɛ, ɛhaɣ-ɖʋ ɛ-ñɩm mbʋ́ pɩɩɖazɩɣ yaa piipiyiɣ yaa pɩɩwɛɛkɩɣ kaʋ nɛ ɛsɩɩ-pʋ ɛsɔdaa nɛ ɛɖaŋnɩ ɛ-ñɩma yɔ. 5Mbá mɩ ɩwɛnɩ lidaʋ Krɩstʋ yɔɔ yɔ, Ɛsɔ huuzi mɩ-yɔɔ nɛ e-ɖoŋ se ihiɣ ñʋʋ yabʋ. Ɛtɛm ɖaŋʋʋ kpam se ɛwɩlɩ-pʋ ɛyáa kɛtɛzaɣ alɩwaatʋ taa.
6Pʋ-yɔɔ lɛ, paa pɩtɩŋɩɣnɩ kʋñɔmɩŋ ndɩ ndɩ yɔɔ nɛ mɩ-ɛsɛ ñɩŋ alɩwaatʋ pazɩ yɔ, mɩ-laŋa ɛhʋlʋmɩ siŋŋ. 7Pɩlakɩ-mɩ ḿbʋ́ se pana ɛzɩma mbʋ́ ɩwɛnɩ lidaʋ siŋŋ Ɛsɔ yɔɔ yɔ. Sika wɛʋ yɔ, kɔkɔŋ mʋʋ́ʋ. Paa ḿbʋ́ yɔ, paɖʋʋ-kɛ miŋ taa se pana se kɛkɛ kɩbaŋga naa kɛtɛkɛ. Ḿbʋ́ ɖɔɖɔ Ɛsɔ maɣzɩɣ mbá mɩ mi-lidaʋ kɩlɩ sika wazaɣ yɔ se ɛna kɩ-tɩnaɣ. Ḿbʋ́ yekina nɛ ɛsam-mɩ nɛ ɛɖʋ-mɩ hɩɖɛ kɩyakʋ ŋgʋ́ Yesu Krɩstʋ lɩzɩɣ ɛ-tɩ nɛ ɛwɩlɩ yɔ. 8Ɩtana-ɩ nɛ mɩ-ɛsɩyɛ, ɛlɛ́ ɩsɔɔlɩ-ɩ. Paa ɩtana-ɩ yɔ, ɩwɛnɩ lidaʋ ɛ-yɔɔ nɛ mɩ-laŋa hʋlʋmɩ siŋŋ, pɩfɛyɩ yɔɔdʋʋ. 9Mbʋ́ pʋyɔɔ yɔ, Ɛsɔ yakɩ mɩ-ñʋʋ yɔɔ ɩwɛnɩ lidaʋ.
10Náyaa kosusi ñʋʋ yabʋ mbʋ́ Ɛsɔ ɖʋwa se ɛhaɣ-mɩ yɔ pʋ-tɔm ɖooo lɔŋ. Pañɩnaa nɛ patazɩ pɩ-taa se pana. 11Krɩstʋ Fezuu ŋgʋ́ kɩɩwɛ pa-taa yɔ, kiiheyi-wɛ kʋñɔŋ ŋgʋ́ ɛkɔŋ tɔɔʋ yɔ nɛ koboyaɣ ŋgá ɛkɔŋ mʋ́ʋ yɔ pɔ-tɔm. Pʋ-yɔɔ pɛcɛyaɣ pa-tɩ se patɩlɩ alɩwaatʋ ndʋ́ pʋkɔŋ labʋ yɔ nɛ ɛzɩma mbʋ́ pɩlakɩ yɔ. 12Ɛsɔ wɩlɩ-wɛ kpayɩ se tɔm ndʋ́ posusaɣ yɔ, pɩtɛkɛ pa-tɩ posusaɣ-tʋ. Ɛlɛ́, mɩ posusaɣ-tʋ. Lɛɛlɛɛyɔ, Laŋhɛzɩyɛ Tɔm susiyaa heyi-mɩ-tʋ. Fezuu Kiɖeɖeu ŋgʋ́ kɩlɩnɩ ɛsɔdaa yɔ, ki-ɖoŋ paba heyini-mɩ-tʋ. Halɩ Ɛsɔ tiyiyaa maɣmaɣ ñɩnaɣ se patɩlɩ-tʋ.
Wezuu kɩbaŋʋ caɣʋ tɔm
13Pʋ-yɔɔ lɛ, ɩmaɣzɩ mbʋ́ ɩlakɩ yɔ pʋ-yɔɔ camɩyɛ. Ɩɖɔkɩ mɩ-tɩ nɛ ɩtaa mɩ-ñʋʋ yabʋ liu siŋŋ. Ḿbʋ́ Ɛsɔ ɖʋwa se ɛkɔŋ-mɩ haʋ alɩwaatʋ ndʋ́ Yesu Krɩstʋ lɩzɩɣ ɛ-tɩ nɛ ɛwɩlɩ yɔ. 14Ɩña Ɛsɔ ɛzɩ piya nzɩ́ sɩñaŋ sɩ-caa yɔ. Iyele mbʋ́ mi-liu kɛwɛ alɩwaatʋ ndʋ́ ɩtasɩmdɩ-ɩ yɔ. 15Ɛsɔ wɛ cɩɖɩcɩɖɩ nɛ ɛ́yáa-mɩ. Pʋ-yɔɔ lɛ, mɩ ɖɔɖɔ ɩwɛɛ cɩɖɩcɩɖɩ mɩ-lakasɩ tɩŋa taa. 16Mbʋ́ pʋyɔɔ yɔ, pama Ɛsɔtɔm Takayaɣ taa se: «Ɩtaañɔtɩnɩ kɩdɛkɛdɩm, mbʋ́ pʋyɔɔ yɔ, maañɔtʋʋnɩ-pʋ.»
17Alɩwaatʋ ndʋ́ ɩsɛɣ Ɛsɔ yɔ, ɩyaɣ-ɩ se Caa. Pʋ-yɔɔ lɛ, pʋwɛɛ se ɩñam-ɩ mbʋ́ pɩtɩŋa payɩ ɩlakɩ yɔ pɩ-taa mi-wezuu caɣʋ taa kedeŋa yɔɔ cɩnɛ. Mbʋ́ pʋyɔɔ yɔ, mɩ-Caa Ɛsɔ hʋʋnɩ ɛyáa tɩŋa payɩ mbʋ́ palaba yɔ pʋ-yɔɔ. Ɛɛcɔŋnɩ nɔɔyʋ ɛsɩndaa nɛ pʋcɔ ɛhʋʋnɩ-ɩ. 18Ɩtɛm naʋ se pɩtɛkɛ mbʋ́ pʋwɛɛkɩɣ ɛzɩ liidiye yaa sika yɔ pʋ-yɔɔ patɩŋnaa nɛ paya mɩ-ñʋʋ nɛ palɩzɩ-mɩ mɩ-cɔzɔnaa lakasɩ nzɩ́ sɩɩwazɩɣ pʋyʋ yɔ sɩ-taa. 19Ɛlɛ́, Krɩstʋ weyi ɛwɛ ɛzɩ heɣa ŋgá kɔ-yɔɔ fɛyɩ azuluma yaa pɩtacam ko-ɖoli yɔ, ɛnʋ pala ɖɔ-yɔɔ. Kɩlaʋ ŋ́gʋ́ kɩkɩlɩnɩ wazaɣ. 20Ɛsɔ kalɩzɩ-ɩ ɖooo lɔŋ nɛ pʋcɔ ɛla kedeŋa. Ɛlɩzɩ-ɩ nɛ ɛkɔɔ kɛtɛzaɣ alɩwaatʋ tʋnɛ tɩ-taa nɛ pʋwazɩ-mɩ. 21Ɛ-yɔɔ pɩtɩŋnaa nɛ ɩwɛnɩ lidaʋ Ɛsɔ yɔɔ. Ɛsɔ ɛnʋ efezini-i nɛ ɛlɩɩnɩ sɩɖaa taa nɛ ɛha-ɩ koboyaɣ. Ḿbʋ́ yekina nɛ ɩwɛnɩ lidaʋ Ɛsɔ ɛnʋ ɛ-yɔɔ nɛ ɩtaa-ɩ liu.
Ɖama sɔɔlʋʋ tɔm
22Lɛɛlɛɛyɔ, ɩɖɔŋ toovenim tɔm yɔɔ nɛ ɩwɛɛ cɩɖɩcɩɖɩ Ɛsɔ ɛsɩndaa se ɩpɩzɩ ɩsɔɔlɩ Krɩstʋ ñɩma lɛlaa nɛ toovenim. Pʋ-yɔɔ lɛ, ɩtɛzɩ ɖama sɔɔlʋʋ nɛ mɩ-laŋɩyɛ tɩŋa pilim. 23Mbʋ́ pʋyɔɔ yɔ, Ɛsɔtɔm ndʋ́ tɩwɛ tam nɛ tɩlakɩ ɛyáa tʋmɩyɛ yɔ, tɩ-yɔɔ pɩtɩŋnaa nɛ ihiɣ wezuu kɩfalʋʋ. Ḿbʋ́ pɩtɩŋnɩ mbʋ́ pɩɩsɩkɩ kaʋ yɔ pʋ-yɔɔ nɛ ihiɣ wezuu. 24Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
«Paa weyi ɛkɔŋ sɩbʋ
ɛzɩ ñɩtʋ wɩlʋʋ yɔ nɛ
e-koboyaɣ tɩŋa tɛ
ɛzɩ hɛtʋ tɔʋ yɔ.
25Ɛlɛ́, Kɩpaɣlʋ tɔm ñɛwɛɣ tam.»
Toovenim lɛ, Laŋhɛzɩyɛ Tɔm ndʋ́ posusi-mɩ yɔ, ńdʋ́ lɛ.
Currently Selected:
1 Pɩyɛ 1: KABI
Highlight
Share
Copy
Want to have your highlights saved across all your devices? Sign up or sign in