1 Timootee KAJALAƔ TƆM
KAJALAƔ TƆM
Pɔyɔɔdʋʋ Timootee tɔm sakɩyɛ Yesu Tiyiyaa Tʋma Labʋ Tɔm Takayaɣ nɛ takayɩsɩ nzɩ́ Pɔɔlɩ ma Krɩstʋ ñɩma yɔ sɩ-taa. Toovenim lɛ se Timootee ɛɛkɛ Pɔɔlɩ ɛgbaɣdʋ nɔɔyʋ. Ɛtɩŋaɣ ɛ-wayɩ ɛ-nɩmaŋ sakɩyɛ taa. Pɔɔlɩ ɖʋ-ɩ tʋma kaɖɛ ñɩna sakɩyɛ, kɔzɩ kɔzɩ Tesalooniki nɛ Kɔrɛntɩ haɖaa taa.
Takayɩsɩ naalɛ Pɔɔlɩ ma Timootee. Ɛmawaɣ-sɩ lɛ, Krɩstʋ aŋgba kɛtɛm pazʋʋ ñɔʋ. Pɩɩwɛɛ se pasɩnɩ-yɛ nɛ apaɣlɩ, nɛ lidaʋ ŋgʋ́ a-taa ɛyáa wɛnɩ-kʋ Ɛsɔ yɔɔ yɔ, kɩpaɣlɩ ɖɔɖɔ.
Kajalaɣ takayaɣ kanɛ, katasɩɣ lɛɣtʋ Krɩstʋ ñɩma, Krɩstʋ aŋgba ñʋndɩnaa, nɛ Timootee ɛnʋ ɛ-maɣmaɣ.
Krɩstʋ ñɩma nabɛyɛ wɩlɩɣ lɛlaa cɛtɩm tɔm (1.3-7; 4.1-4; 6.3-5). Ɛyáa ḿbá, pamaɣzɩɣ se ɛjaɖɛ yɔɔ wondu fɛyɩ ɖeu. Pʋyɔɔ pekiziɣ halɩkpaɣyɛ nɛ peheyiɣ ɛyáa se pataatɔɔ tɔɔnasɩ nasɩyɩ. Ŋgʋ́, mbʋ́ pɩtɩŋa Ɛsɔ lɩzaa yɔ, pʋwɛ ɖeu. Pʋwɛɛ se Timootee ɛtɔzɩ tɔm tʋnɛ Krɩstʋ ñɩma.
Krɩstʋ aŋgba ndɩ ndɩ ñɔwa. Alɩzɩ a-ñʋndɩnaa. Ñʋndɩnaa ḿbá pa-sɩnɩyaa pʋwɛɛ se pasɩnɩ aŋgba ana a-taa ɛyáa nɛ pɔcɔnɩ kʋñɔndɩnaa nɛ kʋdɔndɩnaa yɔɔ. Ñʋndɩnaa ḿbá pa-maɣmaɣ paba lakɩ cooci nɛ pawɩlɩɣ ɛyáa Ɛsɔtɔm.
Krɩstʋ aŋgba ana, pɩfɛyɩ se nɔɔyʋ ɛcaa-yɛ tɔm. Pɩfɛyɩ ɖɔɖɔ se nɔɔyʋ ɛkɛzɩ-yɛ kɩjaʋ. Pʋwɛɛ se awɛɛ a-ɖeɖe ɖiɣɖiɣ. Takayaɣ kanɛ, ka-mayʋ heyiɣ ɛyáa ɛzɩma pɛsɛɛ Ɛsɔ yɔ (ñʋʋ 2 ñɩŋgʋ). Eheyiɣ ɖɔɖɔ Krɩstʋ aŋgba ñʋndɩnaa ɛzɩma pʋwɛɛ se pɛwɛɛ pa-haɖaa taa yɔ (ñʋʋ 3 ñɩŋgʋ).
Timootee caa kɛ Grɛɛsɩ tʋ. E-ɖoo kɛ Yuda Krɩstʋ tʋ. Ɛlɛ́ Timootee ɛnʋ, Pɔɔlɩ cɔlɔ ɛcaɣaɣ. Ɛnʋ kpɛlɩkɩnɩ-ɩ ɛjaɖɛ yɔɔ lɔŋ. Ɛkpaɣ-ɩ ɛzɩ ɛ-pɩɣa yɔ. Pʋwayɩ ɛpɩsɩ Krɩstʋ ŋgbɛyɛ ñʋʋdʋ. Takayaɣ kanɛ, ka-taa tɔm heyiɣ-i se ɛñaɣ pana nɛ ɛkɛ Yesu Krɩstʋ tiyiyu kɩbanʋ. Takayaɣ taa tɔm heyiɣ-i ɖɔɖɔ ɛzɩma pʋwɛɛ se ɛcɔnɩ Krɩstʋ aŋgba ndɩ ndɩ taa ɛyáa yɔɔ yɔ. Tɔm ńdʋ́, tiheyiɣ-i ndʋ́ pʋwɛɛ se ɛwɩlɩ ɛyáa ḿbá yɔ, nɛ paɣtʋ ndʋ́ pʋwɛɛ se ɛɖʋ-wɛ yɔ (kpaɣnɩ ñʋʋ 4 ñɩŋgʋ nɛ pɩsɩɩnɩ 6 ñɩŋgʋ).
Currently Selected:
1 Timootee KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in